ಉಡುಪಿ: ಸಾರ್ವಜನಿಕ ಬಳಕೆಗೆ ಹಾಕಿದ್ದ ಸಿಮೆಂಟ್ ಬೆಂಚ್ ತನ್ನ ಮನೆಗೆ.! - ಆರೋಪಿಗೆ ಶಿಕ್ಷೆ

•   Sat, Mar 07 2020 10:31:23 AM



• ಉಡುಪಿ, ಮಾ 07 (DaijiworldNews/MSP): ಉಡುಪಿ ತಾಲೂಕು ಕುತ್ಪಾಡಿ ಗ್ರಾಮದ ಪಡುಕೆರೆ ಸಮುದ್ರದ ಬಳಿ ಸಾರ್ವಜನಿಕರು ಕುಳಿತುಕೊಳ್ಳಲು ಅನುಕೂಲವಾಗುವಂತೆ ಪಂಚಾಯತ್ ವತಿಯಿಂದ ಆಯ್ದ ಸ್ಥಳಗಳಲ್ಲಿ ಹಾಕಲಾದ ಸಿಮೆಂಟ್ ಬೆಂಚುಗಳ ಪೈಕಿ ಒಂದು ಸಿಮೆಂಟ್ ಬೆಂಚನ್ನು , ವ್ಯಕ್ತಿಯೋರ್ವ ತನ್ನ ಅದನ್ನು ತನ್ನ ಮನೆಯಲ್ಲಿ ಸ್ವಂತ ಉಪಯೋಗಕ್ಕಾಗಿ ಬಳಸಿಕೊಂಡಿದ್ದ.

   

  ಮಾತ್ರವಲ್ಲದೇ 2014, ಏಪ್ರಿಲ್ 16 ರಂದು ಆತ ಇನ್ನೊಂದು ಬೆಂಚನ್ನು ಸುತ್ತಿಗೆಯಿಂದ ಪುಡಿ ಮಾಡಿ ಹಾಕಿದ್ದ. ಇದರಿಂದ ಸಾರ್ವಜನಿಕ ಉಪಯೋಗಕ್ಕಾಗಿ ಹಾಕಿದ ಬೆಂಚನ್ನು ಸ್ವಂತ ಉಪಯೋಗಕ್ಕೆ ಬಳಸಿಕೊಂಡಿದ್ದು ಮಾತ್ರವಲ್ಲದೇ ಸರಕಾರಿ ಸ್ವತ್ತು ನಾಶಗೊಳಿಸಿ ರೂ. 3,500 ನಷ್ಟವುಂಟು ಮಾಡಿದ ಬಗ್ಗೆ ಕುತ್ಪಾಡಿ ಪಂಚಾಯತ್‍ ಪ್ರಕರಣ ದಾಖಲಿಸಿತ್ತು.
  
  ಈ ಬಗ್ಗೆ ಉಡುಪಿ ನಗರ ಠಾಣೆಯ ಉಪ ನಿರೀಕ್ಷಕ ಮಧು ಟಿ.ಎಸ್ ತನಿಖೆ ನಡೆಸಿ ದೋಷಾರೋಪಣೆ ಪತ್ರ ಸಲ್ಲಿಸಿದ್ದರು.  ಈ ಪ್ರಕರಣವು ಉಡುಪಿ 1ನೇ ಹೆಚ್ಚುವರಿ ಸಿ.ಜೆ ಮತ್ತು ಜೆ.ಎಂ.ಎಫ್.ಸಿ. ನ್ಯಾಯಾಲಯದಲ್ಲಿ ವಿಚಾರಣೆ ನಡೆದಿದ್ದು, ಪ್ರಕರಣದಲ್ಲಿ ಸಾಕ್ಷ್ಯ ಹಾಗೂ ಪೂರಕ ಸಾಕ್ಷ್ಯವನ್ನು ಹಾಗೂ ವಾದ ವಿವಾದವನ್ನು ಆಲಿಸಿ ಆರೋಪಿತರ ವಿರುದ್ಧ ಮೇಲಿನ ಪ್ರಕರಣವು ಸಾಬೀತಾಗಿದೆ ಎಂದು ತೀರ್ಮಾನಿಸಿ ನ್ಯಾಯಾಧೀಶ ಎಮ್.ಎನ್.ಮಂಜುನಾಥ್‍ರವರು ಆರೋಪಿತರಿಗೆ ಅಪರಾಧಿ ಪರಿವೀಕ್ಷಣಾ ಅಧಿನಿಯಮ ಕಲಂ: 4ರಡಿ 1 ವರ್ಷ ಪರಿವೀಕ್ಷಣೆಯಲ್ಲಿಟ್ಟು ರೂ.3,500 ನ್ನು ಪರಿಹಾರವಾಗಿ ಪಂಚಾಯತ್‍ಗೆ ನೀಡಬೇಕೆಂದು ಆದೇಶಿಸಿ, ಗುರುವಾರ ತೀರ್ಪು ನೀಡಿರುತ್ತಾರೆ.
  ಸರ್ಕಾರದ ಪರವಾಗಿ ಉಡುಪಿಯ ಕಾನೂನು ಅಧಿಕಾರಿ ಮಮ್ತಾಜ್ ವಿಚಾರಣೆ ನಡೆಸಿ ವಾದ ಮಂಡಿಸಿದ್ದರು.