Entertainment
ಚೀನಾಕ್ಕೆ ಹೋಗಿ ಕೊರೋನಾ ವೈರಸ್ ನಾಶ ಮಾಡಿದೆ..! - ರಾಖಿ ಸಾವಂತ್
- Wed, Feb 05 2020 04:50:18 PM
-
ಬೆಂಗಳೂರು, ಫೆ 05 (Daijiworld News/MB) : ತನ್ನ ವಿಚಿತ್ರವಾದ ವಿಡಿಯೊಗಳು, ವಿವಾದಗಳ ಮೂಲಕ ಪದೇ ಪದೇ ಸುದ್ದಿಯಾಗುತ್ತಿರುವ ಬಾಲಿವುಡ್‌ ನಟಿ ರಾಖಿ ಸಾವಂತ್ ಇದೀಗ ಕೊರೋನಾ ವೈರಸ್ ನಾಶ ಮಾಡಲೆಂದು ಚೀನಾಕ್ಕೆ ತೆರಳಿದ್ದಾರೆ. ಅಷ್ಟು ಮಾತ್ರವಲ್ಲದೇ "ನಾನು ವೈರಸ್‌ನ್ನು ನಾಶ ಮಾಡಿದ್ದೇನೆ" ಎಂದು ಹೇಳಿದ ವಿಡಿಯೋವನ್ನೂ ಕೂಡಾ ಪೋಸ್ಟ್‌ ಮಾಡಿದ್ದಾರೆ.
ಈ ಕುರಿತು ಅವರು ಮಾತನಾಡಿರುವ ಸೆಲ್ಫೀ ವಿಡಿಯೊ ಸಾಮಾಜಿಕ ಜಾಲತಾಣಗಳಲ್ಲಿ ವೈರಲ್‌ ಆಗಿದ್ದು ಅದರಲ್ಲಿ "ನಾನು ಕೊರೋನಾ ವೈರಸ್ ನಾಶ ಮಾಡಲು ನಾಸಾದಿಂದ ಔಷಧಿ ತರಿಸಿಕೊಂಡಿದ್ದು ಈಗ ಚೀನಾಕ್ಕೆ ತೆರಳಿದ್ದೇನೆ. ನನ್ನ ಈ ಕಾರ್ಯಾಚರಣೆ ಯಶಸ್ವಿಯಾಗಲಿ ಎಂದು ಜನರು ಪ್ರಾರ್ಥಿಸಬೇಕು" ಎಂದು ಅವರು ಹೇಳಿದ್ದಾರೆ.
ಚೀನಾಕ್ಕೆ ತೆರಳುವ ಸಂದರ್ಭದಲ್ಲಿ ರಾಖಿ ಸಾವಂತ್ ಸೆಲ್ಫಿ ವಿಡಿಯೋ ಮಾಡಿದ್ದು ಪಕ್ಕದಲ್ಲಿ ಕುಳಿತಿರುವ ಪ್ರಯಾಣಿಕರನ್ನು ಮಾತನಾಡಿಸುತ್ತಾ ತಾನು ಕೊರೋನಾ ವೈರಸ್‌ನ್ನು ನಾಶ ಮಾಡುವುದಾಗಿ ಹೇಳಿದ್ದಾರೆ.
ವಿಮಾನದಲ್ಲಿರುವ ಎಲ್ಲಾ ಎಲೆಕ್ಟ್ರಾನಿಕ್ ಸಾಧನಗಳನ್ನು ಸ್ವಿಚ್ ಆಫ್ ಮಾಡಿ ಎಂದು ಹೇಳಿದ ಬಳಿಕ ಸೆಲ್ಫೀ ವಿಡಿಯೊದಲ್ಲಿ ಮಾತನಾಡಿದ ರಾಖಿ ಸಾವಂತ್, "ಮೋದೀಜೀ ನಾನು ಚೈನಾಕ್ಕೆ ಹೋಗುತ್ತಿದ್ದೇನೆ, ವೈರಸ್ಸನ್ನು ನಾಶ ಮಾಡಿಯೇ ಹಿಂದಿರುಗುತ್ತೇನೆ, ನೀವು ಕೂಡಾ ನನಗಾಗಿ ಪ್ರಾರ್ಥನೆ ಮಾಡಿ" ಎಂದು ಹೇಳಿದ್ದಾರೆ.
ಇನ್ನು ಯಾವುದೇ ಸಾವು ಸಂಭವಿಸುವುದಿಲ್ಲ, ಕೊರೋನಾ ವೈರಸ್ಸೇ ಇರುವುದಿಲ್ಲ, ಯಾಕೆಂದರೆ ನಾನು ನಾಸಾದಿಂದ ಔಷಧಿ ತರಿಸಿಕೊಂಡಿದ್ದೇನೆ. ವಿಮಾನದಲ್ಲಿ ಉಸಿರಾಟ ಮಾಡಬಹುದು ಆದರೆ ಚೈನಾಕ್ಕೆ ಇಳಿದ ಬಳಿಕ ಉಸಿರಾಡುವುದು ಸಾಧ್ಯವಿಲ್ಲ ಎಂದಿದ್ದಾರೆ.
ಚೀನಾಕ್ಕೆ ಹೋಗಿ ಇಳಿದ ಬಳಿಕ ರಾಖಿ ಪುನಃ ವಿಡಿಯೋ ಮಾಡಿದ್ದು ಅದರಲ್ಲಿ, "ನಾನು ಚೈನೀಸ್ ಕ್ಯಾಪ್ ಧರಿಸಿದ್ದೇನೆ, ಚೈನೀಸ್ ಜನರಂತೆಯೇ ಕಾಣಿಸುತ್ತಿದ್ದೇನೆ. ಚಿಣಿ ಮಿಣಿ ಚಾಂವ್ ಚಾಂವ್, ವೈರಸ್ ಕೋ ಖಾಂವ್ ಖಾಂವ್" ಎಂದು ಹೇಳುತ್ತಾ ಮುಖವಾಡ ಧರಿಸಿದ ಚೀನಾದ ಜನರತ್ತ ವಿಡಿಯೋ ತಿರುಗಿಸಿದ್ದಾರೆ.
ಈಗ ಕೊರೋನಾ ವೈರಸ್ ನಾಶ ಮಾಡಿರುವುದಾಗಿ ವಿಡಿಯೋ ಮುಖೇನ ಹೇಳಿದ್ದಾರೆ.
ಚಾನಲ್ ಫಾಲೋ ಮಾಡಿ
