ಬ್ರಿಟನ್ ಪ್ರಧಾನಿಯಾಗಿ ಬೋರಿಸ್ ಜಾನ್ಸನ್ ಪುನರಾಯ್ಕೆ

•   Fri, Dec 13 2019 12:56:06 PM



• ಲಂಡನ್, ಡಿ 13(Daijiworld News/MSP): ಬ್ರಿಟನ್ ಪ್ರಧಾನಿ ಬೋರಿಸ್ ಜಾನ್ಸನ್ ನೇತೃತ್ವದ ಕನ್ಸರ್ವೇಟಿವ್ ಪಕ್ಷ ಹೊಸ ದಾಖಲೆಯೊಂದಿಗೆ ಮತ್ತೊಮ್ಮೆ ಅಧಿಕಾರ ಹಿಡಿದಿದೆ. ಭಕನ್ಸರ್ವೇಟಿವ್ ಪಕ್ಷ ರ್ಜರಿ ಜಯ ಸಾಧಿಸಿದ್ದು, ಬೋರಿಸ್ ಜಾನ್ಸನ್ ಮತ್ತೆ ಪ್ರಧಾನಿಯಾಗಿ ಆಯ್ಕೆಯಾಗಿದ್ದಾರೆ.

  

  ಮತಗಟ್ಟೆ ಸಮೀಕ್ಷೆಗಳು ಕನ್ಸರ್​ವೇಟಿವ್ ಪಕ್ಷದ ಗೆಲುವಿನ ಮುನ್ಸೂಚನೆ ನೀಡಿತ್ತು. ಅವಧಿಗೆ ಮುನ್ನ ನಡೆದ ಬ್ರಿಟನ್ ಸಾರ್ವತ್ರಿಕ ಚುನಾವಣೆಯಲ್ಲಿ ಹಾಲಿ ಫಲಿತಾಂಶದ ಅನ್ವಯ 650 ಸ್ಥಾನಗಳ ಪೈಕಿ 600 ಸ್ಥಾನಗಳ ಫಲಿತಾಂಶ ಪ್ರಕಟವಾಗಿದ್ದು ಕನ್ಸರ್​ವೇಟಿವ್ ಪಕ್ಷ 360ಕ್ಕೂ ಹೆಚ್ಚು ಸ್ಥಾನಗಳನ್ನು ಗೆದ್ದು ಅಭೂತಪೂರ್ವ ಗೆಲುವು ಸಾಧಿಸಿದೆ. ಹೀಗಾಗಿ ಕಳೆದ ಬಾರಿಯ ಫಲಿತಾಂಶಕ್ಕೆ ಹೋಲಿಕೆ ಮಾಡಿದ್ರೆ ಕನ್ಸರ್ವೇಟಿವ್ ಪಕ್ಷ 43 ಹೆಚ್ಚುವರಿ ಸ್ಥಾನಗಳನ್ನು ಪಡೆದುಕೊಂಡಿದೆ.

  ಈ ಚುನಾವಣೆಯಲ್ಲಿ ‘ಬ್ರೆಕ್ಸಿಟ್’ ಘೋಷಣೆಯೊಂದಿಗೆ ಅಂದರೆ ಯೂರೋಪಿಯನ್ ಒಕ್ಕೂಟದಿಂದ ಬ್ರಿಟನ್ ಬೇರ್ಪಡೆಯಾಗುವುದು ಪ್ರಮುಖ ವಿಚಾರವಾಗಿತ್ತು. ಹೀಗಾಗಿ "ಗೆಟ್ ಬ್ರೆಕ್ಸಿಟ್ ಡನ್" ಘೋಷಣೆಯೊಂದಿಗೆ ಚುನಾವಣೆಗೆ ಧುಮುಕಿದ್ದ ಪ್ರಧಾನಿ ಬೋರಿಸ್ ಜಾನ್ಸನ್ ಹಾದಿ ಸುಗಮವಾದಂತಾಗಿದೆ. ಬ್ರೆಕ್ಸಿಟ್ ಗೆ ವಿರೋಧವಾಗಿದ್ದ ಲೇಬರ್ ಪಾರ್ಟಿ ಹೀನಾಯ ಸೋಲು ಕಂಡಿದೆ.