ಮಂಗಳೂರು: ಜನಸ್ನೇಹಿಯತ್ತ 'ಕುಡ್ಲ ಪೊಲೀಸ್' - ನಮ್ಮ ಬೀಟ್, ನಮ್ಮ ಹೆಮ್ಮೆ - ನೀವು ಕೈಜೋಡಿಸಿ

•   Fri, Aug 16 2019 01:20:17 PM



• ಮಂಗಳೂರು, ಆ 16 (Daijiworld News/MSP): ಮಂಗಳೂರು ನಗರ ಪೊಲೀಸ್ ಕಮೀಷನರೇಟ್ ವ್ಯಾಪ್ತಿಯ ಎಲ್ಲಾ ಪೊಲೀಸ್ ಠಾಣಾ ವ್ಯಾಪ್ತಿಯಲ್ಲಿ ಪೊಲೀಸ್ ಅಧಿಕಾರಿಗಳು ಮತ್ತು ಸಾರ್ವಜನಿಕರನ್ನು ಒಳಗೊಂಡ 'ನಮ್ಮ ಕುಡ್ಲ ಪೊಲೀಸ್' ವಾಟ್ಸ್ ಆ್ಯಪ್ ಗ್ರೂಪ್ 'ಮೈ ಬೀಟ್ ಮೈ ಪ್ರೈಡ್' (ನಮ್ಮ ಬೀಟ್, ನಮ್ಮ ಹೆಮ್ಮೆ)ಗೆ ಶುಕ್ರವಾರ ಆಯುಕ್ತಾಲಯದ ಕಚೇರಿಯಲ್ಲಿ ನಡೆದ ಕಾರ್ಯಕ್ರಮದಲ್ಲಿ ಪೊಲೀಸ್ ಆಯುಕ್ತ ಡಾ.ಪಿ.ಎಸ್.ಹರ್ಷ ಚಾಲನೆ ನೀಡಿದರು.

  

  

  

  

  

  

  

  "ನಮ್ಮ ಬೀಟ್, ನಮ್ಮ ಹೆಮ್ಮೆ ಎಂಬ ಯೋಜನೆ ಮಂಗಳೂರು ನಗರ ಪೊಲೀಸರು ನಗರದ ಗಸ್ತು ವ್ಯವಸ್ಥೆಯನ್ನು ಸಬಲಗೊಳಿಸುವ ಈ ಯೋಜನೆಯಾಗಿದೆ. ಇದರ ವಿಶೇಷತೆ ಏನೆಂದರೆ ಇಡೀ ನಗರವನ್ನು ಚಿಕ್ಕದ ಬೀಟ್ ಗಳನ್ನಾಗಿ ವಿಂಗಡನೆ ಮಾಡಿ ಪ್ರತಿ ಬೀಟ್ ಗೆ ಒಬ್ಬ ಪೇದೆ ಅಥವಾ ಒಬ್ಬಮುಖ್ಯ ಪೇದೆ ಅವರನ್ನು ಮುಖ್ಯಸ್ಥರನ್ನಾಗಿ ನೇಮಕ ಮಾಡಲಾಗುತ್ತದೆ. ಮಾತ್ರವಲ್ಲದೆ ಪ್ರತಿ ಬೀಟ್ ಗೂ ವಾಟ್ಸಪ್ ಗ್ರೂಪ್ ರಚಿಸಿ ಅದರಲ್ಲಿ ಸಾಮಾಜದ ಎಲ್ಲಾ ವರ್ಗ, ಸಮುದಾಯದ ನಾಗರೀಕರನ್ನು ಸದಸ್ಯರನ್ನಾಗಿ ಸೇರ್ಪಡೆಗೊಳಿಸಿ ಅವರ ಸಲಹೆ ಸೂಚನೆ ಮಾಹಿತಿಗಳನ್ನು ವಿನಿಮಯ ಮಾಡಿಕೊಳ್ಳುವ ವೇದಿಕೆಯನ್ನಾಗಿ ವಾಟ್ಸಪ್ ಗ್ರೂಪ್ ಬಳಸಲಾಗುತ್ತದೆ"  ಎಂದು ಇದೇ ವೇಳೆ 'ಮೈ ಬೀಟ್ ಮೈ ಪ್ರೈಡ್' ಬಗ್ಗೆ ಡಾ.ಪಿ.ಎಸ್.ಹರ್ಷ ವಿವರಿಸಿದರು.

  "ಹೊಸ ಬೀಟ್‌ ವ್ಯವಸ್ಥೆಯಿಂದ ಜನರಿಗೆ ಪಾಸ್‌-ಪೋಟ್‌ ವೆರಿಫಿಕೇಶನ್‌, ಕೆಲಸಗಳ ಕುರಿತಾದ ವರಿಫಿಕೇಶನ್‌ ಮುಂತಾದ ಪೊಲೀಸ್‌ ಸೇವಗಳನ್ನು ಪಡೆಯುವಲ್ಲಿ ಹೆಚ್ಚಿನ ಸಹಾಯ ಸಿಗಲಿದೆ. ಮಾತ್ರವಲ್ಲದೆ ಸ್ಥಳಿಯ ಬೀಟ್‌ ಮುಖ್ಯಸ್ಥ ಕಾನ್ಸ್‌ಟೇಬಲ್‌ ಅಧವಾ ಹೆಡ್‌ ಕಾನ್ಸ್‌ಟೇಬಲ್‌ ಅವರು ಈ ಸೇವೆಗಳನ್ನು ಪಡೆಯುವಲ್ಲಿ ಹೆಚ್ಚಿನ ಸಹಾಯ ಸಿಗಲಿದೆ. ಸ್ಥಳೀಯ ಬೀಟ್ ಮುಖ್ಯಸ್ಥ ಕಾನ್ಸ್ ಟೇಬಲ್ ಅವರು ಸೇವೆಗಳನ್ನು ನೇರವಾಗಿ ನಾಗರಿಕರ ಬಾಗಿಲಿಗೆ ತಲುಪಿಸುವಲ್ಲಿ ಈ ಒಂದು ಹೊಸ ಯೋಜನೆ ಸಹಕಾರಿಯಾಗಲಿದೆ. ಹಾಗಾಗಿ ಹೆಚ್ಚು ಹೆಚ್ಚು ಜನ ಈ ಹೊಸ ಯೋಜನೆಗೆ ಕೈಜೋಡಿಸಿದಲ್ಲಿ, ಹಾಗೂ ಈ ಯೋಜನೆ ಸದೃಢಗೊಳಿಸಲು ಕೈಜೋಡಿಸಿ ತಮ್ಮ ಸಲಹೆ ಸೂಚನೆಗಳನ್ನು ನೀಡಿದಲ್ಲಿ ಅತ್ಯಂತ ಸಮರ್ಪಕವಾಗಿ ನಗರ ವ್ಯಾಪ್ತಿಯ ಪೊಲೀಸ್ ಸೇವೆಗಳನ್ನು ಒದಗಿಸಿಸುವ ಪೊಲೀಸರಿಗೆ ಸಹಾಯಕಾರಿಯಾಗುತ್ತದೆ" ಎಂದು ತಿಳಿಸಿದರು.

  "ನಗರವನ್ನು 756 ಬೀಟ್ ವ್ಯವಸ್ಥೆಗಳಾಗಿ ವಿಂಗಡಿಸಲಾಗಿದ್ದು ಇದರಲ್ಲಿ ಈಗಾಗಲೇ  722 ವಾಟ್ಸಪ್ ಗ್ರೂಪ್ ರಚಿಸಲಾಗಿದೆ. ಪೊಲೀಸ್ ಆಯುಕ್ತರಿಂದ ಹಿಡಿದು ಎಸ್ಸೈವರೆಗಿನ ಪ್ರತಿ ಅಧಿಕಾರಿಗಳು ಮಾಸಿಕವಾಗಿ ಬೀಟ್ ಪೊಲೀಸರ ಜೊತೆ ಬೀಟ್ ಮಾಡಲಿದ್ದಾರೆ. ಇದರಿಂದಾಗಿ ಜನರ ಬಳಿಗೆ ಪೊಲೀಸರು ತೆರಳಿ ಸಮಸ್ಯೆಗೆ ಸಮರ್ಪಕವಾಗಿ ಸ್ಪಂದಿಸಲು ಸಾಧ್ಯವಾಗುತ್ತದೆ ಎಂದರು. ಈ ಹೊಸ ಯೋಜನೆಗೆ ಹೊಸ ಆ್ಯಪ್ ರಚಿಸಲಾಗಿದ್ದು, ಜನಸ್ನೇಹಿ ಬೀಟ್ ಪೊಲೀಸ್ ಜೊತೆ ಕೈ ಜೋಡಿಸಲು ಆಸಕ್ತಿ ಇರುವವರು ಹೆಸರು ನೋಂದಾಯಿಸಿ ವ್ಯವಸ್ಥೆ ಬಲಪಡಿಸಲು ಕೈ ಜೋಡಿಸಬಹುದು" ಎಂದು ಪೊಲೀಸ್ ಆಯುಕ್ತ ಡಾ.ಪಿ.ಎಸ್.ಹರ್ಷ ತಿಳಿಸಿದರು

  ಕಾರ್ಯಕ್ರಮದಲ್ಲಿ ಡಿಸಿಪಿಗಳಾದ ಲಕ್ಷ್ಮೀ ಗಣೇಶ್, ಅರುಣಾನಿಶ್ ಗಿರಿ, ನಿವೃತ್ತ ಡಿವೈಎಸ್ಪಿ ಟಿಸಿಎಂ ಶರೀಫ್, ಡಾ. ಉದಯ ಕುಮಾರ್, ರಾಜವರ್ಮ ಬಲ್ಲಾಳ್ ಮತ್ತಿತರರು ಉಪಸ್ಥಿತರಿದ್ದರು. ಮಂಗಳೂರು ದಕ್ಷಿಣ ಉಪವಿಭಾಗದ ಎಸಿಪಿ‌ ಕೋದಂಡರಾಮ ಸ್ವಾಗತಿಸಿದರು. ಇನ್ ಸ್ಪೆಕ್ಟರ್ ಗುರು ಕಾಮತ್ ಕಾರ್ಯಕ್ರಮ ನಿರೂಪಿಸಿದರು.