ಮಂಗಳೂರು: ಕಸ್ಟಮ್ ಅಧಿಕಾರಿ ಸೋಗಿನಲ್ಲಿ ಫೇಸ್‌ಬುಕ್ ಫ್ರೆಂಡ್ ನಿಂದ 13,62 ಲಕ್ಷ ವಂಚನೆ

•   Thu, Jun 06 2019 03:07:02 PM



• ಮಂಗಳೂರು, ಜೂ 6 (Daijiworld News/MSP): ಫೇಸ್‌ಬುಕ್ ಮೂಲಕ ಫ್ರೆಂಡ್ ಆದ ವ್ಯಕ್ತಿಯೊಬ್ಬ ಡಾಲರ್ ಕೊಡಿಸುವ ಆಮಿಷವೊಡ್ಡಿ ಸುರತ್ಕಲ್ ನಿವಾಸಿಯೊಬ್ಬರಿಗೆ ಬರೋಬ್ಬರಿ 13,62,800 ರೂ. ವಂಚಿಸಿದ ಬಗ್ಗೆ ದೂರು ದಾಖಲಾಗಿದೆ.

  

  ಸುರತ್ಕಲ್ ನಿವಾಸಿಗೆ ಜನವರಿ ತಿಂಗಳ ಮೊದಲನೇ ವಾರದಲ್ಲಿ ಫೇಸ್ ಬುಕ್‌ನಲ್ಲಿ ಜೈನ್ ಪೂಜಾರಿ ಎಂಬ ವ್ಯಕ್ತಿಯಿಂದ ಫ್ರೆಂಡ್ ರಿಕ್ವೆಸ್ಟ್ ಬಂದಿತ್ತು. ಸಹಜವಾಗಿ ಅದನ್ನು ಅವರು ಅಕ್ಸೆಪ್ಟ್ ಮಾಡಿದ್ದಾರೆ. ಆ ನಂತರ ದಿನಗಳಲ್ಲಿ ಜೈನ್ ಪೂಜಾರಿ ಹಾಗೂ ಇತರ ವ್ಯಕ್ತಿಗಳು ಇವರ ಮೊಬೈಲ್‌ಗೆ ಬೇರೆ ಬೇರೆ ಸಂಖ್ಯೆಯ ಮೊಬೈಲ್ ಕಂಪನಿಗಳಿಂದ ಕರೆ ಮಾಡಿ ವಂಚಿಸುವ ಪ್ರಯತ್ನ ಮಾಡಿದ್ದಾರೆ.

  ನಿಮ್ಮ ಹೆಸರಿಗೆ ವಿದೇಶದಿಂದ ಡಾಲರ್ ಇರುವ ಪೆಟ್ಟಿಗೆ ಬಂದಿದೆ. ಅದನ್ನು ಬಿಡಿಸುವ ಸಲುವಾಗಿ ಕಸ್ಟಮ್ ಅಧಿಕಾರಿಗಳು ಎಂದು ಹೇಳಿ ಹಲವರು ಕರೆ ಮಾಡಿ ಅವರಿಂದ ಕಂತು ಕಂತಾಗಿ ವಿವಿಧ ದಿನಾಂಕಗಳಲ್ಲಿ ಹಣವನ್ನು ತಮ್ಮ ಖಾತೆಗೆ ವರ್ಗಾಯಿಸಿಕೊಂಡಿದ್ದಾರೆ.

  ಡಾಲರ್ ಬರುವ ಆಸೆಯಿಂದ ಸುರತ್ಕಲ್ ನಿವಾಸಿ ಅವರು ಕೇಳಿದಷ್ಟು ಹಣವನ್ನು ವಿವಿಧ ಕಂತುಗಳಲ್ಲಿ ಅವರ ಖಾತೆಗೆ ವರ್ಗಾವಣೆ ಮಾಡಿದ್ದಾರೆ. ಆದರೆ ಇನ್ನಷ್ಟು ಹಣಕ್ಕೆ ಬೇಡಿಕೆ ಇಟ್ಟು ವಂಚಕರು ಕರೆ ಮಾಡುತ್ತಿದ್ದಾಗ ಸಂಶಯಗೊಂಡು ಸೈಬರ್ ಕ್ರೈಂ ಪೊಲೀಸ್ ಠಾಣೆಗೆ ದೂರು ನೀಡಿದ್ದಾರೆ.

  ಕಸ್ಟಮ್ಸ್‌ ಅಧಿಕಾರಿ ಹಾಗೂ ಸೊತ್ತಿನ ವಾರಿಸುದಾರರೆಂದು ನಂಬಿಸಿ ವಿವಿಧ ಕಾರಣ ಒಡ್ಡಿ ಒಟ್ಟು 13,62,800 ರೂ. ಹಣವನ್ನು ಪಡೆದು ವಂಚಿಸಿದ್ದಾರೆ ಎಂದು ದೂರಿನಲ್ಲಿ ತಿಳಿಸಿದ್ದಾರೆ.