50 ಅಡಿ ಬ್ಯಾನರ್ ಹಾರಿಸಿ ವಿರಾಟ್ ಕೊಹ್ಲಿಗೆ ಗೌರವ ಸಲ್ಲಿಸಿದ ಆರ್‌ಸಿಬಿ ಫ್ಯಾನ್ ಕ್ಲಬ್ ಮಂಗಳೂರು

•   Mon, May 19 2025 02:17:57 PM



• ಬೆಂಗಳೂರು, ಮೇ. 19 (DaijiworldNews/AA): ರಾಯಲ್ ಚಾಲೆಂಜರ್ಸ್ ಬೆಂಗಳೂರು (ಆರ್‌ಸಿಬಿ) ಫ್ಯಾನ್ ಕ್ಲಬ್ ಮಂಗಳೂರು, ಮೇ 17ರಂದು ಚೆನ್ನಸ್ವಾಮಿ ಕ್ರೀಡಾಂಗಣದಲ್ಲಿ ಆರ್‌ಸಿಬಿ ಹಾಗೂ ಕೆಕೆಆರ್ ನಡುವೆ ನಡೆದ ಪಂದ್ಯದಲ್ಲಿ 50 ಅಡಿ ಉದ್ದದ ಬೃಹತ್ ಬ್ಯಾನರ್ ಹಾರಿಸಿ ವಿರಾಟ್ ಕೊಹ್ಲಿಗೆ ಅನನ್ಯ ಗೌರವ ಸಲ್ಲಿಸಿದೆ.

  ವಿರಾಟ್ ಕೊಹ್ಲಿಗೆ ಅರ್ಪಿತ:
  ಆರ್‌ಸಿಬಿ ಫ್ಯಾನ್ ಕ್ಲಬ್ ಮಂಗಳೂರು, ರೆಡ್-ಬಾಲ್ ಫಾರ್ಮ್ಯಾಟ್ ನಿಂದ ನಿವೃತ್ತಿ ಘೋಷಿಸಿದ ವಿರಾಟ್ ಕೊಹ್ಲಿಯವರ ಸಾಧನೆಗೆ ಗೌರವ ಸೂಚಿಸಲು ಈ ಕ್ರಿಯಾತ್ಮಕ ಹೆಜ್ಜೆ ಇಟ್ಟಿತು. ಇದೇ ಸಂದರ್ಭದಲ್ಲಿ, ಆರ್‌ಸಿಬಿ ಅಭಿಮಾನಿಗಳು ಬಿಳಿ ಜರ್ಸಿ ಧರಿಸಿ ತಮ್ಮ ಪ್ರೀತಿಯ ನಾಯಕನಿಗೆ ಸಲ್ಯೂಟ್ ನೀಡಿದರು. ಮಂಗಳೂರಿನ ಅಭಿಮಾನಿಗಳು ಆರ್‌ಸಿಬಿಗಾಗಿ ಹಾರಿಸಿದ 50 ಅಡಿ ಬ್ಯಾನರ್ ಚಿನ್ನಸ್ವಾಮಿ ಸ್ಟೇಡಿಯಂನಲ್ಲಿ ಅತಿ ದೊಡ್ಡ ಬ್ಯಾನರ್ ಎಂಬ ಹೆಗ್ಗಳಿಕೆಗೆ ಪಾತ್ರವಾಯಿತು.

  ಮಳೆಯಿಂದ ಉತ್ಸಾಹ ಕುಂಠಿತವಾಗಿಲ್ಲ!
  ಮಂಗಳೂರಿನ 10 ಜನ ಯುವ ಅಭಿಮಾನಿಗಳು ಬೆಂಗಳೂರಿನಲ್ಲಿ ನಡೆದ ಈ ಪಂದ್ಯವನ್ನು ನೋಡಲು ತೆರಳಿದ್ದರು. ಆದರೆ, ನಗರದಲ್ಲಿ ಸುರಿದ ಭಾರೀ ಮಳೆಯಿಂದ ಪಂದ್ಯ ರದ್ದಾದರೂ, ಆರ್‌ಸಿಬಿ ಅಭಿಮಾನಿಗಳ ಉತ್ಸಾಹ ಮತ್ತು ತಂಡದ ಬಗ್ಗೆ ಇರುವ ನಿಷ್ಠೆ ಎಂದಿನಂತೆ ಅಚಲವಾಗಿಯೇ ಉಳಿಯಿತು.

  "ಥ್ಯಾಂಕ್ ಯು ಕಿಂಗ್ ಕೊಹ್ಲಿ #269"
  ಸ್ಟೇಡಿಯಂನಲ್ಲಿ ಈ ಬೃಹತ್ ಬ್ಯಾನರ್ ಹಾರಿಸುವ ಮೂಲಕ ಮಂಗಳೂರಿನ ಆರ್‌ಸಿಬಿ ಫ್ಯಾನ್ ಕ್ಲಬ್ ವಿರಾಟ್ ಕೊಹ್ಲಿ ಬಗೆಗಿನ ತಮ್ಮ ಅಭಿಮಾನ ಹಾಗೂ ಪ್ರೀಯಿಯನ್ನು ಪ್ರದರ್ಶಿಸಿದೆ. ವಿರಾಟ್ ಕೊಹ್ಲಿಯಂತಹ ಮಹಾನ್ ಕ್ರಿಕೆಟಿಗನ ಕಾರಣದಿಂದಲೇ ಅನೇಕರು ಟೆಸ್ಟ್ ಕ್ರಿಕೆಟ್ ಅನ್ನು ಪ್ರೀತಿಸಲು ಪ್ರಾರಂಭಿಸಿದ್ದು, ಅವರ ಸೇವೆಗೆ ಚಿನ್ನಸ್ವಾಮಿ ಸ್ಟೇಡಿಯಂನಲ್ಲಿ ಈ ರೀತಿಯ ಗೌರವ ಸಾಟಿಯಿಲ್ಲದ ಸಂಭ್ರಮವಾಗಿತ್ತು.