ಜಾಗತಿಕ ಅನಿಶ್ಚಿತತೆ ಮಧ್ಯೆಯೂ ಭಾರತದ ಆರ್ಥಿಕತೆ ಅತ್ಯಂತ ಸದೃಢವಾಗಿದೆ- ಕೇಂದ್ರ ಹಣಕಾಸು ಸಚಿವಾಲಯ

•   Fri, Oct 30 2026 05:29:14 PM



• ನವದೆಹಲಿ, ಅ.30 (DaijiworldNews/AA): ಜಾಗತಿಕ ಆರ್ಥಿಕತೆಯಲ್ಲಿ ತಲೆದೋರುತ್ತಿರುವ ಅನಿಶ್ಚಿತತೆಗಳು ಮತ್ತು ಸವಾಲುಗಳ ಮಧ್ಯೆಯೂ ಭಾರತದ ಆರ್ಥಿಕತೆಯು ಅತ್ಯಂತ ಸದೃಢವಾಗಿದೆ ಎಂದು ಕೇಂದ್ರ ಹಣಕಾಸು ಸಚಿವಾಲಯದ ವರದಿಯಲ್ಲಿ ತಿಳಿಸಲಾಗಿದೆ.

  'ದೇಶದ ಬಲವಾದ ಆರ್ಥಿಕ ಮೂಲಭೂತ ಅಂಶಗಳು ಯಾವುದೇ ಜಾಗತಿಕ ಆಘಾತಗಳನ್ನು ಅಥವಾ ಏರಿಳಿತಗಳನ್ನು ಎದುರಿಸಲು ಭದ್ರವಾದ ಬುನಾದಿಯನ್ನು ಒದಗಿಸುತ್ತವೆ. ಪ್ರಪಂಚದಾದ್ಯಂತ ಆರ್ಥಿಕ ಬೆಳವಣಿಗೆಯು ಮಂದವಾಗುತ್ತಿರುವ ಮತ್ತು ಭೌಗೋಳಿಕ ರಾಜಕೀಯ ಬಿಕ್ಕಟ್ಟುಗಳು ಹೆಚ್ಚುತ್ತಿರುವ ಈ ಸಂದರ್ಭದಲ್ಲಿಯೂ, ಭಾರತೀಯ ಮಾರುಕಟ್ಟೆಯು ತನ್ನ ಆಂತರಿಕ ಬಲದಿಂದಾಗಿ ಅತ್ಯುತ್ತಮ ಸ್ಥಿರತೆಯನ್ನು ಕಾಯ್ದುಕೊಂಡಿದೆ' ಎಂದು ಅಕ್ಟೋಬರ್ ತಿಂಗಳ ಮಾಸಿಕ ಆರ್ಥಿಕ ಅವಲೋಕನಾ ವರದಿ ತಿಳಿಸಿದೆ.

  'ದೇಶದ ಹಣಕಾಸು ವ್ಯವಸ್ಥೆ, ಗೃಹ ಬಳಕೆ ಬೇಡಿಕೆ, ಹೂಡಿಕೆ ಅವಕಾಶಗಳು ಮತ್ತು ದೃಢವಾದ ಉತ್ಪಾದನಾ ವಲಯವು ಆರ್ಥಿಕತೆಯ ಚಕ್ರವನ್ನು ವೇಗವಾಗಿ ಮುನ್ನಡೆಸುತ್ತಿದ್ದು, ಇದು ಬಾಹ್ಯ ಆರ್ಥಿಕ ಅಸ್ಥಿರತೆಯ ಪರಿಣಾಮವನ್ನು ತಗ್ಗಿಸಲು ಸಹಕಾರಿಯಾಗಿದೆ' ಎಂದು ಸಚಿವಾಲಯ ತಿಳಿಸಿದೆ.

  'ಈ ಹಣಕಾಸು ವರ್ಷದ (2026-27) ಮೊದಲ ಕ್ವಾರ್ಟರ್‌ನಲ್ಲಿ (2026ರ ಏಪ್ರಿಲ್‌ನಿಂದ ಜೂನ್) ಜಿಡಿಪಿ ಎಲ್ಲರ ನಿರೀಕ್ಷೆಮೀರಿ ಶೇ. 7.8ರಷ್ಟು ಬೆಳವಣಿಗೆ ಹೊಂದಿದೆ. ಆ ನಂತರವೂ ಭಾರತದ ಆರ್ಥಿಕತೆಯ ಶಕ್ತಿ ಬಲವಾಗಿಯೇ ಇದೆ. ಅದಾದ ಬಳಿಕ ಬಹುತೇಕ ಎಲ್ಲಾ ರಾಷ್ಟ್ರೀಯ ಅಂತರರಾಷ್ಟ್ರೀಯ ಏಜೆನ್ಸಿಗಳು ಭಾರತದ ಆರ್ಥಿಕ ಬೆಳವಣಿಗೆಯ ನಿರೀಕ್ಷೆಗಳನ್ನು ಹೆಚ್ಚಿಸಿವೆ. ಹಣಕಾಸು ಸಚಿವಾಲಯ ಕೂಡ ಹೆಚ್ಚು ಆಶಾದಾಯಕವಾಗಿದ್ದು, ಪ್ರಸಕ್ತ ಹಣಕಾಸು ವರ್ಷದಲ್ಲಿ ಭಾರತದ ಆರ್ಥಿಕತೆ ಶೇ. 7.3ರಷ್ಟು ಹೆಚ್ಚಬಹುದು' ಎಂದು ಹಣಕಾಸು ಇಲಾಖೆಯ ವರದಿಯಲ್ಲಿ ಅಭಿಪ್ರಾಯಪಡಲಾಗಿದೆ.