ಮೊಸರಿನ ಪ್ಯಾಕೆಟ್​​ಗೆ ರಿಫಂಡ್​ ಪಡೆಯಲು ಹೋಗಿ 98 ಸಾವಿರ ರೂ. ಕಳೆದುಕೊಂಡ ಮಹಿಳೆ

•   Mon, Oct 26 2026 05:02:57 PM



• ಬೆಂಗಳೂರು, ಅ.26 (DaijiworldNews/AK): ಇಂದು ನಗರಗಳ ಬಹುತೇಕ ಜನರು ದೈನಂದಿನ ಗೃಹೋಪಯೋಗಿ ವಸ್ತುಗಳಿಗೆ ಇನ್​​ಸ್ಟಂಟ್​​ ಡೆಲಿವರಿ ಆ್ಯಪ್​​ಗಳಿಗೆ ಮೊರೆ ಹೋಗುತ್ತಿದ್ದಾರೆ. ಆದರೆ ಇದನ್ನೇ ಬಂಡವಾಳ ಮಾಡಿಕೊಂಡು ಆನ್​​ಲೈನ್​​ ವಂಚನೆ ಪ್ರಕರಣಗಳು ಹೆಚ್ಚುತ್ತಿವೆ. ಇದಕ್ಕೆ ಸರಿ ಒಂದು ಘಟನೆ ಎಂಬಂತೆ ಬೆಂಗಳೂರಿನ ಮಹಿಳೆಯೋರ್ವರು ರಿಫಂಡ್​​ ಪಡೆಯಲು ಹೋಗಿ ಬರೋಬ್ಬರಿ 98 ಸಾವಿರ ರೂ. ಕಳೆದುಕೊಂಡ ಘಟನೆ ನಡೆದಿದೆ.

  ಕಸ್ಟಮರ್ ಕೇರ್ ಪ್ರತಿನಿಧಿಗಳೆಂದು ಮಹಿಳೆಯನ್ನು ಸಂಪರ್ಕಿಸಿದ್ದ ವಂಚಕರು, ಮಹಿಳೆಗೆ ವಾಟ್ಸ್​​ಆ್ಯಪ್​​ ಲಿಂಕ್​​ ಕಳುಹಿಸಿದ್ದರು. ಬಳಿಕ ಅವರು ಹೇಳಿದ್ದ ಪ್ರಕ್ರಿಯೆಯನ್ನು ಅನುಸರಿಸಿದ ಬಳಿಕ ವಂಚನೆ ನಡೆದಿದೆ ಎನ್ನಲಾಗಿದೆ.

  ಮಹಿಳೆ ಅಕ್ಟೋಬರ್ 17ರಂದು ಬ್ಲಿಂಕಿಟ್‌ನಲ್ಲಿ ಮೊಸರಿನ ಪ್ಯಾಕೆಟ್ ಆರ್ಡರ್ ಮಾಡಿದ್ದರು. ಪ್ಯಾಕೆಟ್ ಹಾನಿಗೊಳಗಾದ ಸ್ಥಿತಿಯಲ್ಲಿ ಬಂದಿದ್ದರಿಂದ ಅವರು ಡೆಲಿವರಿ ಏಜೆಂಟ್‌ಗೆ ದೂರು ನೀಡಿದ್ದರು. ಈ ವೇಳೆ ಕಸ್ಟಮರ್ ಕೇರ್ ಅನ್ನು ಸಂಪರ್ಕಿಸುವಂತೆ ಏಜೆಂಟ್ ಸಲಹೆ ನೀಡಿದ್ದ. ನಂತರ ಮಹಿಳೆ ಆನ್‌ಲೈನ್‌ನಲ್ಲಿ ಕಸ್ಟಮರ್ ಕೇರ್ ನಂಬರ್ ಹುಡುಕಿ, ಅಲ್ಲಿ ಸಿಕ್ಕ ಸಂಖ್ಯೆಗೆ ಕರೆ ಮಾಡಿದ್ದರು. ಕರೆ ಸ್ವೀಕರಿಸಿದ ವ್ಯಕ್ತಿ ಹಣ ಮರುಪಾವತಿ ಮಾಡುವುದಾಗಿ ಭರವಸೆ ನೀಡಿ, ಕೆಲವು ಹಂತಗಳನ್ನು ಅನುಸರಿಸುವಂತೆ ಸೂಚಿಸಿದ್ದ ಎನ್ನಲಾಗಿದೆ.

  ಬಳಿಕ ವಾಟ್ಸ್‌ಆ್ಯಪ್‌ನಲ್ಲಿ ಲಿಂಕ್ ಕಳುಹಿಸಿ, ಹಾನಿಗೊಳಗಾದ ಮೊಸರಿನ ಪ್ಯಾಕೆಟ್‌ನ ಫೋಟೋ ಅಪ್‌ಲೋಡ್ ಮಾಡುವಂತೆ ಕೇಳಿದ್ದ. ಮಹಿಳೆ ಫೋಟೋ ಕಳುಹಿಸಿದ ನಂತರ ಮತ್ತೊಬ್ಬ ವ್ಯಕ್ತಿ ಕರೆ ಮಾಡಿ, ಮರುಪಾವತಿ ಪ್ರಕ್ರಿಯೆ ನಡೆಯುತ್ತಿದೆ ಎಂದು ಹೇಳಿ ಡಿಜಿಟಲ್ ಪಾವತಿ ಖಾತೆಯನ್ನು ಪರಿಶೀಲಿಸುವಂತೆ ಸೂಚಿಸಿದ್ದ. ಹೀಗಾಗಿ ಮಹಿಳೆ ಖಾತೆ ತೆರೆದು ಬ್ಯಾಲೆನ್ಸ್ ಪರಿಶೀಲಿಸಲು ಪಾಸ್‌ವರ್ಡ್ ನಮೂದಿಸಿದಾಗ, ಆ್ಯಪ್ ಇದ್ದಕ್ಕಿದ್ದಂತೆ ಪರದೆಯಿಂದ ಮಾಯವಾಗಿದೆ. ಕೆಲವೇ ಹೊತ್ತಿನಲ್ಲಿ ಅವರ ಬ್ಯಾಂಕ್ ಖಾತೆಯಿಂದ 98 ಸಾವಿರ ರೂ. ಕಡಿತವಾಗಿರುವುದು ತಿಳಿದುಬಂದಿದೆ ಎಂದು ಟೈಮ್ಸ್​​ ಆಫ್​​ ಇಂಡಿಯಾ ವರದಿ ಮಾಡಿದೆ.