ಪ್ರಯಾಣಿಕರೇ ಎಚ್ಚರ : ರೈಲ್ವೆ ಇಲಾಖೆಯಿಂದ ಮಹತ್ವದ ನಿಯಮ- 5,000 ದಂಡ, ಜೈಲು ಶಿಕ್ಷೆ ಪ್ರಕಟ

•   Mon, Oct 19 2026 05:35:35 PM



• ಬೆಂಗಳೂರು,ಅ.19 (DaijiworldNews/AK): ಈ ಹಿಂದೆ ನಮ್ಮ ಮೆಟ್ರೋದಲ್ಲಿ ಜೋರಾಗಿ ಮಾತನಾಡಿದರೆ ಮೊಬೈಲ್​​ನಲ್ಲಿ ಹಾಡು ಇಟ್ಟರೆ ದಂಡವನ್ನು ವಿಧಿಸುವ ನಿಯಮವನ್ನು ಮಾಡಲಾಗಿತ್ತು . ಇದೀಗ ಇನ್ಮುಂದೆ ರೈಲು ಪ್ರಯಾಣದ ವೇಳೆ ಮೊಬೈಲ್ ಫೋನ್‌ನಲ್ಲಿ ಇಯರ್‌ಫೋನ್‌ ಬಳಸದೆ ಲೌಡ್‌ಸ್ಪೀಕರ್ ಮೋಡ್‌ನಲ್ಲಿ ಹಾಡುಗಳನ್ನು ಕೇಳುವುದು, ವಿಡಿಯೋ ಅಥವಾ ರೀಲ್ಸ್ ನೋಡುವುದು ಹಾಗೂ ಜೋರಾಗಿ ಮಾತನಾಡುವುದು ನಿಮಗೆ ಸಂಕಷ್ಟ ತರಲಿದೆ. ಇಂತಹ ವರ್ತನೆಯಿಂದ ಇತರ ಪ್ರಯಾಣಿಕರಿಗೆ ಉಂಟಾಗುವ ಅನಾನುಕೂಲತೆಯನ್ನು ತಡೆಯಲು ಭಾರತೀಯ ರೈಲ್ವೆ ಕಠಿಣ ಮಾರ್ಗಸೂಚಿ ಪ್ರಕಟಿಸಿದ್ದು, ತಪ್ಪಿದಲ್ಲಿ ದಂಡ ಹಾಗೂ ಜೈಲು ಶಿಕ್ಷೆ ಎದುರಿಸಬೇಕಾಗುತ್ತದೆ ಎಂದು ಎಚ್ಚರಿಸಿದೆ.

  ಜನ್ ವಿಶ್ವಾಸ್ (ತಿದ್ದುಪಡಿ) ಕಾಯ್ದೆಯ ಪ್ರಕಾರ ರೈಲ್ವೆ ಕಾಯ್ದೆಯ ಸೆಕ್ಷನ್ 145 (2) (ಎ) ಅಡಿಯಲ್ಲಿ, ಸಾರ್ವಜನಿಕ ಸ್ಥಳ ಅಥವಾ ರೈಲುಗಳಲ್ಲಿ ಮೊಬೈಲ್ ಫೋನ್‌ಗಳನ್ನು ಸ್ಪೀಕರ್ ಮೋಡ್‌ನಲ್ಲಿ ಬಳಸುವ ಮೂಲಕ ಅಥವಾ ಜೋರಾಗಿ ಮಾತನಾಡುವ ಮೂಲಕ ಇತರರಿಗೆ ತೊಂದರೆ ಉಂಟು ಮಾಡುವವರ ವಿರುದ್ಧ ಕಠಿಣ ಕ್ರಮ ಕೈಗೊಳ್ಳಲಾಗುವುದು.

  ರೈಲ್ವೆ ಅಧಿಕಾರಿಯ ಎಚ್ಚರಿಕೆಯ ನಂತರವೂ ನಿಯಮ ಉಲ್ಲಂಘನೆ ಮುಂದುವರಿಸಿದರೆ, 6 ತಿಂಗಳ ಸರಳ ಜೈಲು ಶಿಕ್ಷೆ ಮತ್ತು/ಅಥವಾ 5,000 ರೂ.ಗಳವರೆಗೆ ದಂಡ ವಿಧಿಸಬಹುದಾಗಿದೆ.

  ದಕ್ಷಿಣ ರೈಲ್ವೆ ಸೇರಿದಂತೆ ವಿವಿಧ ವಲಯಗಳು ಈ ಕುರಿತು ಜಾಗೃತಿ ಮೂಡಿಸಲು ಸೂಚನೆ ನೀಡಿವೆ. ಅಲ್ಲದೆ, ನಿಯಮ ಉಲ್ಲಂಘಿಸುವವರ ವಿರುದ್ಧ ಕ್ರಮ ಕೈಗೊಳ್ಳಲು ಟಿಕೆಟ್ ಪರೀಕ್ಷಕರಿಗೆ ಹಾಗೂ ರೈಲ್ವೆ ಸಿಬ್ಬಂದಿಗೆ ಅಧಿಕಾರ ನೀಡಲಾಗಿದೆ. ಎಸಿ ಕೋಚ್‌ಗಳು ಹಾಗೂ ಮೌತವಾದ ವಾತಾವರಣದಲ್ಲಿ ಪ್ರಯಾಣಿಸುವಾಗ ಕೆಲವರು ಮೊಬೈಲ್‌ನಲ್ಲಿ ಸಿನಿಮಾ, ಧಾರಾವಾಹಿ ಹಾಗೂ ಸಾಮಾಜಿಕ ಜಾಲತಾಣಗಳ ರೀಲ್ಸ್‌ಗಳನ್ನು ಹೈ ವಾಲೂಮ್‌ನಲ್ಲಿ ಇಟ್ಟುಕೊಂಡು ಇಡೀ ಬೋಗಿಗೆ ಕಿರಿಕಿರಿ ಉಂಟುಮಾಡುತ್ತಾರೆ ಎಂಬ ದೂರುಗಳು ನಿರಂತರವಾಗಿ ಕೇಳಿಬಂದಿದ್ದವು.

  ಪ್ರಯಾಣಿಕರು ಸಾರ್ವಜನಿಕ ಶಿಷ್ಟಾಚಾರವನ್ನು ಪಾಲಿಸಬೇಕು. ಆಡಿಯೋ ಕೇಳಲು ಕಡ್ಡಾಯವಾಗಿ ಇಯರ್‌ಫೋನ್‌ಗಳನ್ನು ಬಳಸುವುದು, ಕರೆಗಳನ್ನು ಸಂಕ್ಷಿಪ್ತವಾಗಿ ಮತ್ತು ಮಿತವಾದ ಧ್ವನಿಯಲ್ಲಿ ಮಾತನಾಡುವಂತೆ ರೈಲ್ವೆ ಇಲಾಖೆ ಕೋರಿದೆ.