'ದೇವಿ ಕೃಪೆ ಜನರ ಮೇಲೆ, ಜನರ ಕೃಪೆ ನಮ್ಮ ಸರ್ಕಾರದ ಮೇಲಿರಲಿ'- ಡಿಕೆ ಶಿವಕುಮಾರ್

•   Sun, Oct 11 2026 03:32:25 PM



• ಮೈಸೂರು, ಅ.11 (DaijiworldNews/AA): ಮೈಸೂರಿನಲ್ಲಿ ಇಂದಿನಿಂದ ದಸರಾ ಉತ್ಸವಕ್ಕೆ ಚಾಲನೆ ಸಿಕ್ಕಿದೆ. ಇನ್ನೂ 11 ದಿನ ಇಡೀ ದೇಶ ಹಾಗೂ ವಿದೇಶದ ಜನ ದಸರಾ ಮೂಲಕ ಮೈಸೂರನ್ನ ನೋಡುತ್ತಾರೆ. ಆ ದೇವಿ ಕೃಪೆ ಜನರ ಮೇಲೆ ಇರಲಿ, ಜನರ ಕೃಪೆ ನಮ್ಮ ಸರ್ಕಾರದ ಮೇಲಿರಲಿ ಎಂದು ಸಿಎಂ ಡಿಕೆ ಶಿವಕುಮಾರ್ ತಿಳಿಸಿದರು.

  ಮೈಸೂರು ದಸರಾ ಉದ್ಘಾಟನಾ ವೇದಿಕೆಯಲ್ಲಿ ಮಾತನಾಡಿದ ಅವರು, "ನನಗೂ ಸ್ವಾಮೀಜಿಗಳ ನಡುವೆ ಇರುವ ಸಂಬಂಧ ಪ್ರಶ್ನಾತೀತ, ನಾನು ಯಾವತ್ತೂ ಸ್ವಾಮೀಜಿಗಳು ನನ್ನ ಸೇವೆ ಮಾಡಿ ಎಂದು ಹೇಳಿಲ್ಲ. ಸ್ವಾಮೀಜಿಗಳು ಈ ನಾಡಿನ ಸೇವೆ ಮಾಡಿ ಎಂದೇ ಹೇಳಿದ್ದೇನೆ. ಆದ್ರೆ ಕೆಲವರು ನನ್ನ ಹೇಳಿಕೆಯನ್ನ ತಿರುಚಿದ್ರು. ಈ ಮಾತಿಗೆ ಯಾರು ತಲೆ ಕೆಡಿಸಿಕೊಳ್ಳಬೇಡಿ" ಎಂದು ಹೇಳಿದರು.

  "ನಾನು ಜನರ ಪ್ರತಿನಿಧಿ. ಇಲ್ಲಿನ ಎಲ್ಲಾ ಸ್ವಾಮೀಜಿಗಳು ಭಕ್ತರ, ತಮ್ಮ ಸಮುದಾಯದ ಪ್ರತಿನಿಧಿಗಳು. ಇದು ನನ್ನ ಬದುಕಿನ ಸ್ಮರಣೆಯ ದಿನ, ಭಾಗ್ಯದ ದಿನ, ನನ್ನ ಬದುಕಿನ ಹೊಸ ಅಧ್ಯಾಯ. ಮಠದ ಮಹತ್ವ ಗೋಪುರದಲ್ಲಿ ಇರಲ್ಲ. ಸಮಾಜಕ್ಕೆ ಮಾಡುವ ಸೇವೆಯಲ್ಲಿ ಮಠದ ಮಹತ್ವ ಅಡಗಿದೆ. ಹಾಗೆಯೇ ಚಾಮುಂಡಿಯ ಶಕ್ತಿ ಜ್ಯೋತಿ, ಶ್ರೀಗಳ ಅರಿವಿನ ಜ್ಯೋತಿಯನ್ನು ನಾವು ಹಚ್ಚಿದ್ದೇವೆ. ಸ್ವಾಮೀಜಿಗಳು ನಾಡಿನ ಹಬ್ಬಕ್ಕೆ ಹೊಸ ಮೆರಗು ತಂದಿದ್ದಾರೆ. ಕೊಪ್ಪಳ ಶ್ರೀಗಳ ಸೇವೆ ಇಡೀ ದೇಶಕ್ಕೆ ಮಾದರಿ. ಜಲದೀಕ್ಷೆ ನೀಡುವ ಭಗೀರಥ ಕೊಪ್ಪಳ ಶ್ರೀಗಳು. ಇಡೀ ನಾಡಿಗೆ ಜಲ ದೀಕ್ಷೆ ಬೇಕಿದೆ" ಎಂದರು.

  "ನಾವು ಒಗ್ಗಟ್ಟಿನಿಂದ ಮುನ್ನಡೆಯುತ್ತಿದ್ದೇವೆ ಎಂದು ಸಾರುವುದೇ ದಸರಾ. ಕಂಬಳಕ್ಕೆ ವಿರೋಧ ಇದ್ದರೂ ನಾವು ಕಲೆ, ಸಂಸ್ಕೃತಿಯನ್ನ ಪ್ರೋತ್ಸಾಹಿಸಲು ದಸರಾಗೆ ತಂದಿದ್ದೇವೆ. ದಸರಾ ಅನ್ನೋದು ಬಣ್ಣಗಳ ಹಬ್ಬ, ಮೈಸೂರಿನ ಸಂಸ್ಕೃತಿ ಒಬ್ಬರಿಂದ ಆದದ್ದಲ್ಲ, ಎಲ್ಲಾರಿಂದ ಆದದ್ದು. ಮೈಸೂರಿನ ಸಂಪತ್ತು ಅರಮನೆ ಮಾತ್ರವಲ್ಲ. ಅರಮನೆ ಮೇಲಿನ ನಂಬಿಕೆಯೆ ಮೈಸೂರಿನ ಸಂಪತ್ತು. ಯುದ್ಧ ಹೋರಾಟದಿಂದ ಕೆಲ ನಗರಗಳು ಬೆಳೆದಿರೋದನ್ನ ನಾವು ನೋಡಿದ್ದೇವೆ. ಆದ್ರೆ ಮೈಸೂರು ಸಂಸ್ಕೃತಿಯಿಂದ ಬೆಳೆದಿರುವ ನಗರ. ಮೈಸೂರು ಕೂಡ ಹೊಸ ಬ್ರ‍್ಯಾಂಡ್‌ಗೆ ಕಾಲಿಡುತ್ತಿದೆ. ಈ ಬಾರಿಯ ದಸರಾ ಮೆರವಣಿಗೆ ವಿಶಿಷ್ಟವಾಗಿರುತ್ತದೆ. ಭೂ ಸೇನೆ, ವಾಯು ಸೇನೆ, ನೌಕಾ ಸೇನೆಯ ಸ್ತಬ್ಧ ಚಿತ್ರಗಳೂ ಮೆರವಣಿಗೆಯಲ್ಲಿ ಕಂಗೊಳಿಸಲಿವೆ" ಎಂದು ಸಂತಸ ವ್ಯಕ್ತಪಡಿಸಿದರು.