National
ಪುಣೆಯಲ್ಲಿ ಮೊಳಗಿದ 5,000ಕ್ಕೂ ಹೆಚ್ಚು ಢೋಲ್ - ತಾಶಾ - ಗಿನ್ನೆಸ್ ವಿಶ್ವ ದಾಖಲೆ ನಿರ್ಮಾಣ
- Tue, Oct 06 2026 02:21:11 PM
-
ಪುಣೆ, ಅ.06 (DaijiworldNews/TA): ಮಹಾರಾಷ್ಟ್ರದ ಸಾಂಸ್ಕೃತಿಕ ನಗರಿ ಪುಣೆ ಮತ್ತೊಮ್ಮೆ ತನ್ನ ಸಾಂಸ್ಕೃತಿಕ ವೈಭವವನ್ನು ಜಗತ್ತಿನ ಮುಂದೆ ಅನಾವರಣಗೊಳಿಸಿದೆ. ಅಕ್ಟೋಬರ್ 4ರಂದು ಪಿಂಪರಿ-ಚಿಂಚವಡ್‌ನ ಮೊಶಿಯಲ್ಲಿ ನಡೆದ ಬೃಹತ್ ಢೋಲ್-ತಾಶಾ ಪ್ರದರ್ಶನವು ಗಿನ್ನೆಸ್ ವಿಶ್ವ ದಾಖಲೆಗೆ ಸೇರ್ಪಡೆಯಾಗಿದೆ.
ಹಿಂದೂಭೂಷಣ ಸ್ಮಾರಕ ಟ್ರಸ್ಟ್ ಆಯೋಜಿಸಿದ್ದ ಈ ಅದ್ಧೂರಿ ಸಾಂಸ್ಕೃತಿಕ ಕಾರ್ಯಕ್ರಮದಲ್ಲಿ ಮಹಾರಾಷ್ಟ್ರದ ವಿವಿಧ ಭಾಗಗಳಿಂದ ಆಗಮಿಸಿದ್ದ 151 ಢೋಲ್-ತಾಶಾ ಪಥಕ್‌ಗಳ 5,000ಕ್ಕೂ ಹೆಚ್ಚು ಕಲಾವಿದರು ಭಾಗವಹಿಸಿದ್ದರು. ಸಾವಿರಾರು ಮಂದಿ ಒಂದೇ ಸಮಯದಲ್ಲಿ ಢೋಲ್ ಹಾಗೂ ತಾಶಾ ವಾದ್ಯಗಳನ್ನು ಬಾರಿಸುವ ಮೂಲಕ ಅಪರೂಪದ ದೃಶ್ಯಕ್ಕೆ ಸಾಕ್ಷಿಯಾದರು.
ಕಾರ್ಯಕ್ರಮದಲ್ಲಿ 151 ತಂಡಗಳ ಕಲಾವಿದರು ಏಕಕಾಲದಲ್ಲಿ ಒಂದೇ ತಾಳ ಮತ್ತು ಲಯದಲ್ಲಿ ಢೋಲ್-ತಾಶಾ ನುಡಿಸಿದರು. ಸಾವಿರಾರು ವಾದ್ಯಗಳು ಏಕಕಾಲದಲ್ಲಿ ಮೊಳಗಿದ ಕ್ಷಣ ನೆರೆದಿದ್ದ ಪ್ರೇಕ್ಷಕರಲ್ಲಿ ರೋಮಾಂಚನ ಮೂಡಿಸಿತು. ಗಿನ್ನೆಸ್ ವಿಶ್ವ ದಾಖಲೆ ಪ್ರತಿನಿಧಿಗಳು ಕಾರ್ಯಕ್ರಮದ ಸ್ಥಳದಲ್ಲೇ ಹಾಜರಿದ್ದು, ನಿಗದಿತ ನಿಯಮಾವಳಿಗಳ ಪ್ರಕಾರ ಪ್ರದರ್ಶನವನ್ನು ಪರಿಶೀಲಿಸಿದರು. ಬಳಿಕ ಈ ಬೃಹತ್ ಪ್ರದರ್ಶನವನ್ನು ವಿಶ್ವ ದಾಖಲೆಯಾಗಿ ಅಧಿಕೃತವಾಗಿ ಗುರುತಿಸಲಾಯಿತು.
ಮರಾಠ ಸಾಮ್ರಾಜ್ಯದ ಛತ್ರಪತಿ ಸಂಭಾಜಿ ಮಹಾರಾಜರ ಸ್ಮರಣಾರ್ಥ ಹಾಗೂ ಅವರಿಗೆ ಗೌರವ ಸಲ್ಲಿಸುವ ಉದ್ದೇಶದಿಂದ ಈ ವಿಶೇಷ ಕಾರ್ಯಕ್ರಮವನ್ನು ಆಯೋಜಿಸಲಾಗಿತ್ತು. ಮಹಾರಾಷ್ಟ್ರದ ಶೌರ್ಯ, ಪರಂಪರೆ ಮತ್ತು ಸಾಂಸ್ಕೃತಿಕ ವೈಭವವನ್ನು ಜಗತ್ತಿಗೆ ಪರಿಚಯಿಸುವ ಉದ್ದೇಶದಿಂದ ಕಾರ್ಯಕ್ರಮ ರೂಪಿಸಲಾಗಿತ್ತು ಎಂದು ಆಯೋಜಕರು ತಿಳಿಸಿದ್ದಾರೆ. 5,000ಕ್ಕೂ ಹೆಚ್ಚು ಕಲಾವಿದರು ಒಂದೇ ವೇದಿಕೆಯಲ್ಲಿ ಢೋಲ್-ತಾಶಾ ನುಡಿಸಿದ ಈ ಅಪರೂಪದ ಪ್ರದರ್ಶನದ ಮೂಲಕ ಮಹಾರಾಷ್ಟ್ರದ ಸಾಂಪ್ರದಾಯಿಕ ಕಲೆಗೆ ಜಾಗತಿಕ ಮಟ್ಟದಲ್ಲಿ ಮತ್ತೊಂದು ಗೌರವ ದೊರೆತಂತಾಗಿದೆ.
ಚಾನಲ್ ಫಾಲೋ ಮಾಡಿ
