'ಭಾರತದಲ್ಲಿ ಯುಎಇ 25 ಶತಕೋಟಿ ಹೂಡಿಕೆ; ಇಂಧನ ಕ್ಷೇತ್ರದಲ್ಲಿ ಭಾರತ-ಯುಎಇ ಸಹಕಾರ'- ಪಿಯೂಷ್ ಗೋಯಲ್

•   Mon, Sep 28 2026 08:43:30 PM



• ಮುಂಬೈ, ಸೆ.28 (DaijiworldNews/AA): ಪಶ್ಚಿಮ ಏಷ್ಯಾ ಬಿಕ್ಕಟ್ಟಿನ ನಡುವೆಯೂ, ಯುಎಇ ಭಾರತದಲ್ಲಿ ಇನ್ನೂ 25 ಶತಕೋಟಿ ಡಾಲರ್ ಹೂಡಿಕೆ ಮಾಡಲು ಯೋಜಿಸುತ್ತಿದೆ ಎಂದು ಕೇಂದ್ರ ವಾಣಿಜ್ಯ ಮತ್ತು ಕೈಗಾರಿಕಾ ಸಚಿವ ಪಿಯೂಷ್ ಗೋಯಲ್ ಹೇಳಿದ್ದಾರೆ.

  ಮುಂಬೈನಲ್ಲಿ ನಡೆದ 14ನೇ ಭಾರತ-ಯುಎಇ ಹೂಡಿಕೆ ಕಾರ್ಯಪಡೆ ಸಭೆಯ ನಂತರ ಮಾತನಾಡಿದ ಅವರು, "ಯುಎಇ ಈಗಾಗಲೇ ಭಾರತದಲ್ಲಿ 25 ಶತಕೋಟಿ ಡಾಲರ್ ಹೂಡಿಕೆ ಮಾಡಿದೆ. ಭಾರತದಲ್ಲಿ ತೈಲ ಸಂಗ್ರಹಾಗಾರಗಳು, ಎಲ್‌ಪಿಜಿ, ಎಲ್‌ಎನ್‌ಜಿ ಮತ್ತು ಸಮುದ್ರದಡಿಯ ಅನಿಲ ಪೈಪ್‌ಲೈನ್‌ಗಳಂತಹ ಕ್ಷೇತ್ರಗಳಲ್ಲಿ ಇಂಧನ ಸಹಕಾರ ಅನ್ವೇಷಿಸುತ್ತಿರುವಾಗಲೇ, ಮಹತ್ವದ ನಿರ್ಧಾರ ತೆಗೆದುಕೊಂಡಿದೆ" ಎಂದರು.

  "ಭಾರತ ಮತ್ತು ಯುಎಇ ದ್ವಿಪಕ್ಷೀಯ ವ್ಯಾಪಾರವನ್ನು 100 ಶತಕೋಟಿ ಡಾಲರ್‌ಗೆ ದ್ವಿಗುಣಗೊಳಿಸಿವೆ ಮತ್ತು 2032ರ ವೇಳೆಗೆ ಅದನ್ನು 200 ಶತಕೋಟಿ ಡಾಲರ್‌ಗೆ ಹೆಚ್ಚಿಸುವ ಗುರಿ ಹೊಂದಲಾಗಿದೆ. ಭಾರತದಲ್ಲಿನ ತೈಲ ಸಂಗ್ರಹಾಗಾರಗಳಲ್ಲಿ ಯುಎಇಯ ಹೆಚ್ಚಿನ ಹೂಡಿಕೆಯ ಸಾಧ್ಯತೆಯನ್ನು ಎರಡೂ ದೇಶಗಳು ಪರಿಶೀಲಿಸುತ್ತಿವೆ. ಜೊತೆಗೆ ದೇಶದಲ್ಲಿ ಅನಿಲವನ್ನು ಸಾಗಿಸಲು ಮತ್ತು ಸಂಗ್ರಹಿಸಲು ಸಮುದ್ರದಡಿಯ ಪೈಪ್‌ಲೈನ್‌ಗಳ ಸಾಧ್ಯತೆಯನ್ನೂ ಅನ್ವೇಷಿಸುತ್ತಿವೆ" ಎಂದು ಮಾಹಿತಿ ನೀಡಿದರು.

  "ಯುಎಇ ವಿಶ್ವಾಸಾರ್ಹ ಪಾಲುದಾರ ದೇಶವಾಗಿದೆ. ಇಂಧನ ಭದ್ರತೆಗಾಗಿ ಸಂಪರ್ಕ ಸೇತುವೆಗಳನ್ನು ನಿರ್ಮಿಸಲು ಯುಎಇಯೊಂದಿಗೆ ಕೆಲಸ ಮಾಡುತ್ತಿದ್ದೇವೆ. ಭಾರತದಲ್ಲಿ ತೈಲ ಸಂಗ್ರಹಾಗಾರಗಳನ್ನು ವಿಸ್ತರಿಸುವ ಕುರಿತು ಅಧ್ಯಯನಗಳು ನಡೆಯುತ್ತಿವೆ ಮತ್ತು ಈ ಕ್ಷೇತ್ರದಲ್ಲಿ ಯುಎಇಯಿಂದ ಗಮನಾರ್ಹ ಹೂಡಿಕೆ ಹೆಚ್ಚಳವನ್ನು ನಿರೀಕ್ಷಿಸಲಾಗುತ್ತಿದೆ" ಎಂದು ತಿಳಿಸಿದರು.

  "ಇಂಧನ ಕ್ಷೇತ್ರದಲ್ಲಿನ ಸ್ಥಿತಿಸ್ಥಾಪಕತ್ವ ಮತ್ತು ಭದ್ರತೆಯನ್ನು ಬಲಪಡಿಸುವ ಪ್ರಯತ್ನದ ಭಾಗವಾಗಿ, ಭಾರತ, ಯುಎಇಯನ್ನು ಎಲ್‌ಪಿಜಿ ಮತ್ತು ಎಲ್‌ಎನ್‌ಜಿಯ ಪ್ರಮುಖ ಮೂಲವನ್ನಾಗಿ ಪರಿಗಣಿಸುತ್ತಿದೆ ಹಾಗೂ ಸಮುದ್ರದಡಿಯ ಪೈಪ್‌ಲೈನ್‌ಗಳ ಸಾಧ್ಯತೆಯನ್ನೂ ಅಧ್ಯಯನ ಮಾಡುತ್ತಿದೆ. ಅಗತ್ಯವಿರುವ ಎಲ್‌ಪಿಜಿ, ಎಲ್‌ಎನ್‌ಜಿ ಮತ್ತು ಇತರ ಅನಿಲಗಳಿಗೆ ಯುಎಇ ಪ್ರಮುಖ ಮೂಲವಾಗುವ ಸಾಧ್ಯತೆಯನ್ನು ಪರಿಶೀಲಿಸುತ್ತಿದ್ದೇವೆ. ಈ ಕುರಿತು ಅಧ್ಯಯನವೂ ನಡೆಯುತ್ತಿದೆ. ಸಮುದ್ರದಡಿ ಪೈಪ್‌ಲೈನ್‌ಗಳ ಮೂಲಕ ಅನಿಲವನ್ನು ಸಾಗಿಸಿ ಭಾರತದಲ್ಲಿ ಸಂಗ್ರಹಿಸುವ ಮೂಲಕ ಇಂಧನ ಕ್ಷೇತ್ರದಲ್ಲಿ ಹೆಚ್ಚಿನ ಸ್ಥಿತಿಸ್ಥಾಪಕತ್ವ ಮತ್ತು ಭದ್ರತೆಯನ್ನು ಸಾಧಿಸಲು ಸಾಧ್ಯವೇ ಎನ್ನುವುದನ್ನು ಎದುರು ನೋಡುತ್ತಿದ್ದೇವೆ" ಎಂದು ವಿವರಿಸಿದರು.