ಐಎಎಸ್​ ಅಧಿಕಾರಿ ಎಂ. ಪ್ರಿಯಾಂಗಾ ಅವರ ಸ್ಪೂರ್ತಿದಾಯಕ ಕಥೆ

•   Wed, Aug 05 2026 08:23:06 AM



•  ತಮಿಳುನಾಡು, ಆ. 05 (DaijiworldNews/AK): ಮನೆಯಲ್ಲಿಯೇ ಇದ್ದು, ಸಾಮಾಜಿಕ ಜಾಲತಾಣ ಹಾಗೂ ವಿವಿಧ ಮೂಲಗಳಿಂದ ಅಧ್ಯಯನ ಸಾಮಗ್ರಿ ಸಂಗ್ರಹಿಸಿ ಸ್ಪಷ್ಟ ಗುರಿಯೊಂದಿಗೆ ಪರಿಶ್ರಮಪಟ್ಟು ಓದಿದರೆ ಯಶಸ್ಸು ಕಟ್ಟಿಟ್ಟ ಬುತ್ತಿ  ಅನ್ನುವುದಕ್ಕೆ ಐಎಎಸ್​ ಅಧಿಕಾರಿ ಎಂ. ಪ್ರಿಯಾಂಗಾ ಅವರೇ ಸಾಕ್ಷಿ. ಅವರ ಸ್ಪೂರ್ತಿದಾಯಕ ಕಥೆ ಇಲ್ಲಿದೆ.

  ಪ್ರಿಯಾಂಗಾ ಅವರು ಮೂಲತಃ ತಮಿಳುನಾಡಿನ ವೆಲ್ಲೂರು ಜಿಲ್ಲೆಯವರು. ತಂದೆ ವಿದ್ಯುತ್​ ಇಲಾಖೆಯಲ್ಲಿ ಲೈನ್​ ಇನ್​ಸ್ಪೆಕ್ಟರ್​ ಆಗಿ ನಿವೃತ್ತರಾಗಿದ್ದು, ತಾಯಿ ಗೃಹಿಣಿ. ಪಿಯುಸಿವರೆಗೂ ಸರ್ಕಾರಿ ಅನುದಾನಿತ ಶಾಲಾ-ಕಾಲೇಜುಗಳಲ್ಲಿ ಅಧ್ಯಯನ ಮಾಡಿದ ಇವರು, 10ನೇ ತರಗತಿಯಲ್ಲಿ ಜಿಲ್ಲೆಗೆ ದ್ವೀತಿಯ ಸ್ಥಾನ ಪಡೆದಿದ್ದು, 12ನೇ ತರಗತಿಯಲ್ಲಿ 95% ಅಂಕ ಗಳಿಸಿದ್ದಾರೆ. ಸೇಲಂನ ಸರ್ಕಾರಿ ಕಾಲೇಜ್​ನಲ್ಲಿ ಬಿಇ ಎಲೆಕ್ಟ್ರಾನಿಕ್ಸ್​ ಆ್ಯಂಡ್​ ಕಮ್ಯುನಿಕೇಷನ್​ನಲ್ಲಿ ಪದವಿ ಪಡೆದಿದ್ದಾರೆ.

  ಮೊದಲು ಐಟಿ ಕಂಪನಿಯಲ್ಲಿ ಕೆಲಸ ಮಾಡುತ್ತಿದ್ದ ಅವರು 2012ರಿಂದ ಯುಪಿಎಸ್​ಸಿ ಪರೀಕ್ಷೆಗೆ ಅಧ್ಯಯನ ಮಾಡಲು ಪ್ರಾರಂಭಿಸಿದರು. ಮೊದಲ ಪ್ರಯತ್ನದಲ್ಲಿ ಪ್ರಿಲಿಮ್ಸ್​ ಕ್ಲಿಯರ್​ ಆಯಿತು. ಆದರೆ ಮೇನ್ಸ್​ ಕ್ಲಿಯರ್​ ಆಗಲಿಲ್ಲ. 3ನೇ ಪ್ರಯತ್ನದಲ್ಲಿ ಪ್ರಿಲಿಮ್ಸ್​ ಸಹ ಪಾಸಾಗಲಿಲ್ಲ. ಹಾಗೆಂದು ಪ್ರಯತ್ನ ಬಿಡಲಿಲ್ಲ. ಯಶಸ್ಸಿಗಾಗಿ ಮರಳಿ ಯತ್ನವ ಮಾಡು ಎಂಬ ಮಾತಿನಂತೆ 4ನೇ ಪ್ರಯತ್ನದಲ್ಲಿ 149ನೇ ರ‍್ಯಾಂಕ್​ ಗಳಿಸಿದರು.

  ಕೇಂದ್ರ ಸರ್ಕಾರದ ಶಾರ್ಟ್​ ಸರ್ವೀಸ್​ ಕಮಿಷನ್​ (SSC) ಪರೀಕ್ಷೆಯಲ್ಲಿ ಪಾಸಾಗಿ 2015ರಲ್ಲಿ ಪೋಸ್ಟಲ್​ ಅಸಿಸ್ಟಂಟ್​ ಆಗಿ ಸೇರಿಕೊಂಡರು. ಕೆಲಸದ ಜತೆಗೆ ಪರೀಕ್ಷೆ ತಯಾರಿ ಮುಂದುವರೆಸಿದ್ದರಿಂದ ಯಾವುದೇ ಖಾಸಗಿ ಸಂಸ್ಥೆಗಳಿಂದ ಕೋಚಿಂಗ್​ ತೆಗೆದುಕೊಳ್ಳಲಿಲ್ಲ. ಸಾಮಾಜಿಕ ಜಾಲತಾಣಗಳ ಮೂಲಕ ಅಧ್ಯಯನ ಸಾಮಗ್ರಿ ಸಂಗ್ರಹಿಸಿ, ಸ್ವ-ಅಧ್ಯಾಯ ಮಾಡಿದರು. ಈ ಮೂಲಕ ಪ್ರಿಯಾಂಗಾ ಯಶಸ್ಸು ಪಡೆದರು.