ಸೀರೆ ಉಡಲು ಪರದಾಡಿದ ವಿದೇಶಿ ಯುವತಿಗೆ ನೆರವಾದ ಮಹಿಳಾ ಪೊಲೀಸ್ - ವೈರಲ್ ಆಯ್ತು ಮಾನವೀಯತೆ ವೀಡಿಯೋ

•   Wed, Jul 15 2026 03:25:24 PM



• ಆಗ್ರಾ, ಜು. 15 (DaijiworldNews/TA): ತಾಜ್ ಮಹಲ್‌ಗೆ ಭೇಟಿ ನೀಡಿದ್ದ ಅರ್ಜೆಂಟೀನಾದ ಮಹಿಳೆಯೊಬ್ಬರು ಭಾರತೀಯ ಸಾಂಪ್ರದಾಯಿಕ ಉಡುಗೆಯಾದ ಸೀರೆ ಧರಿಸಿ ಫೋಟೊ ತೆಗೆಯಿಸಿಕೊಳ್ಳುವ ಆಸೆ ವ್ಯಕ್ತಪಡಿಸಿದ್ದರು. ಆದರೆ ಸೀರೆ ಉಡಲು ಪರದಾಡುತ್ತಿದ್ದ ಅವರನ್ನು ಗಮನಿಸಿದ ಮಹಿಳಾ ಪೊಲೀಸ್ ಕಾನ್‌ಸ್ಟೆಬಲ್ ನೆರವಿಗೆ ಧಾವಿಸಿದ್ದು, ಈ ಮಾನವೀಯ ಕ್ಷಣದ ವಿಡಿಯೊ ಇದೀಗ ಸಾಮಾಜಿಕ ಜಾಲತಾಣಗಳಲ್ಲಿ ವೈರಲ್ ಆಗಿದೆ.

  

  ತಾಜ್ ಮಹಲ್ ಭದ್ರತೆಯಲ್ಲಿ ಕರ್ತವ್ಯ ನಿರ್ವಹಿಸುತ್ತಿದ್ದ ಮಹಿಳಾ ಕಾನ್‌ಸ್ಟೆಬಲ್ ಗುಡ್ಡಿ ದೇವಿ, ವಿದೇಶಿ ಪ್ರವಾಸಿಗೆ ಸೀರೆ ಉಡಲು ಕಷ್ಟಪಡುತ್ತಿರುವುದನ್ನು ಗಮನಿಸಿ, ಯಾವುದೇ ಹಿಂಜರಿಕೆ ಇಲ್ಲದೆ ಸ್ವತಃ ಸೀರೆಯನ್ನು ಸರಿಪಡಿಸಿ ಧರಿಸಲು ಸಹಾಯ ಮಾಡಿದರು. ಸೀರೆ ಧರಿಸಿದ ಬಳಿಕ ಅರ್ಜೆಂಟೀನಾ ಮಹಿಳೆಯ ಮುಖದಲ್ಲಿ ಮೂಡಿದ ಸಂತೋಷ ಎಲ್ಲರ ಗಮನ ಸೆಳೆಯಿತು. ಪೊಲೀಸ್ ಸಿಬ್ಬಂದಿಯ ಆತ್ಮೀಯ ನೆರವಿಗೆ ಕೃತಜ್ಞತೆ ಸಲ್ಲಿಸಿದ ಅವರು, ಗುಡ್ಡಿ ದೇವಿಯವರೊಂದಿಗೆ ಭಾವಪೂರ್ಣವಾಗಿ ಛಾಯಾಚಿತ್ರಕ್ಕೂ ಪೋಸ್ ನೀಡಿದರು. ಈ ವಿಡಿಯೊವನ್ನು ಉತ್ತರ ಪ್ರದೇಶ ಪೊಲೀಸರು ತಮ್ಮ ಅಧಿಕೃತ ಸಾಮಾಜಿಕ ಜಾಲತಾಣದಲ್ಲಿ ಹಂಚಿಕೊಂಡಿದ್ದು, ಸಾವಿರಾರು ಮಂದಿ ಮಹಿಳಾ ಪೊಲೀಸ್ ಸಿಬ್ಬಂದಿಯ ಮಾನವೀಯತೆ ಮತ್ತು ಆತಿಥ್ಯವನ್ನು ಶ್ಲಾಘಿಸಿದ್ದಾರೆ.

  ಹಿರಿಯ ಪೊಲೀಸ್ ಅಧಿಕಾರಿಗಳ ಪ್ರಕಾರ, ತಾಜ್ ಮಹಲ್‌ಗೆ ಭೇಟಿ ನೀಡುವ ದೇಶೀಯ ಹಾಗೂ ವಿದೇಶಿ ಪ್ರವಾಸಿಗರಿಗೆ ಕೇವಲ ಭದ್ರತೆ ಒದಗಿಸುವುದಷ್ಟೇ ಅಲ್ಲ, ಅಗತ್ಯವಿದ್ದಾಗ ಮಾನವೀಯ ನೆರವು ನೀಡುವಂತೆ ಸಿಬ್ಬಂದಿಗೆ ವಿಶೇಷ ತರಬೇತಿಯನ್ನೂ ನೀಡಲಾಗುತ್ತಿದೆ. ಈ ಘಟನೆ ಭಾರತದ ‘ಅತಿಥಿ ದೇವೋ ಭವ’ ಸಂಸ್ಕೃತಿಯ ಜೀವಂತ ಉದಾಹರಣೆಯಾಗಿದೆ ಎಂದು ಅವರು ತಿಳಿಸಿದ್ದಾರೆ.

  ಇತ್ತೀಚಿನ ವರ್ಷಗಳಲ್ಲಿ ಅಮೆರಿಕ, ಯುರೋಪ್, ಆಸ್ಟ್ರೇಲಿಯಾ ಸೇರಿದಂತೆ ಹಲವು ದೇಶಗಳ ಮಹಿಳಾ ಪ್ರವಾಸಿಗರು ತಾಜ್ ಮಹಲ್‌ ಮುಂದೆ ಸೀರೆ ಅಥವಾ ಲೆಹೆಂಗಾ ಧರಿಸಿ ಫೋಟೊಶೂಟ್ ಮಾಡಿಸಿಕೊಳ್ಳುವುದನ್ನು ಜನಪ್ರಿಯ ಟ್ರೆಂಡ್ ಆಗಿಸಿಕೊಂಡಿದ್ದಾರೆ. ಇದರಿಂದ ಆಗ್ರಾದಲ್ಲಿ ಸೀರೆ ಬಾಡಿಗೆ ಮತ್ತು ಡ್ರೇಪಿಂಗ್ ಸೇವೆ ನೀಡುವ ಸಣ್ಣ ಉದ್ಯಮಗಳಿಗೂ ಉತ್ತೇಜನ ದೊರೆತಿದೆ. ಮಹಿಳಾ ಕಾನ್‌ಸ್ಟೆಬಲ್ ತೋರಿದ ಈ ಆತ್ಮೀಯ ನಡೆ ಸಾಮಾಜಿಕ ಜಾಲತಾಣಗಳಲ್ಲಿ ವ್ಯಾಪಕ ಮೆಚ್ಚುಗೆಗೆ ಪಾತ್ರವಾಗಿದ್ದು, ಕರ್ತವ್ಯದ ಜೊತೆಗೆ ಮಾನವೀಯ ಮೌಲ್ಯಗಳನ್ನು ಎತ್ತಿ ಹಿಡಿದ ಘಟನೆ ಎಂದು ನೆಟ್ಟಿಗರು ಪ್ರಶಂಸಿಸಿದ್ದಾರೆ.

  इसलिए हमारे यहां कहते हैं अतिथि देवों भव:
  
  विदेश से ताज देखने आई महिला की साड़ी अचानक खुल गई। आगरा पुलिस की महिला कॉन्स्टेबल ने पूरी तत्परता से ऐसे हेल्प की pic.twitter.com/3fUtJELdSw

  — Ashish rai (@journorai) July 14, 2026