2 ಬಾರಿ ಯುಪಿಎಸ್‌ಸಿ ಪಾಸ್ ಮಾಡಿದ ಅಪರಾಜಿತಾ ರಾಯ್ ಸಾಧನೆ

•   Tue, May 12 2026 07:13:05 AM



• ಸಿಕ್ಕಿಂ ,ಮೇ. 12 (DaijiworldNews/AK): ಯುಪಿಎಸ್‌ಸಿ ಪರೀಕ್ಷೆಯನ್ನು ಪಾಸ್​ ಮಾಡುವವರ ಹಿಂದೆ ಅನೇಕ ಹೋರಾಟದ ಕಥೆಗಳಿವೆ. ಅಂತಹವರಲ್ಲಿ ಇಂದು ನಾವು ಐಪಿಎಸ್ ಅಪರಾಜಿತಾ ರಾಯ್ ಅವರ ಕಥೆಯನ್ನು ತಿಳಿಯೋಣ.

  

  ಅಪರಾಜಿತಾ ರಾಯ್ ಸಿಕ್ಕಿಂನ ಮೊದಲ ಮಹಿಳಾ ಐಪಿಎಸ್ ಅಧಿಕಾರಿ. 2010, 2011ರ ಸತತ ಎರಡೂ ವರ್ಷಗಳಲ್ಲಿ UPSC ಸಿವಿಲ್ ಸರ್ವೀಸಸ್ ಪರೀಕ್ಷೆಯಲ್ಲಿ ತೇರ್ಗಡೆಯಾಗಿದ್ದಾರೆ. ಐಪಿಎಸ್ ತರಬೇತಿಯ ಸಮಯದಲ್ಲಿ ಅವರು ಪೊಲೀಸ್ ಅಕಾಡೆಮಿಯಲ್ಲಿ ಹಲವಾರು ಪ್ರಶಸ್ತಿಗಳನ್ನು ಗೆದ್ದಿದ್ದಾರೆ.

  ಅಪರಾಜಿತಾ ರಾಯ್ ಅವರ ತಂದೆ ಜ್ಞಾನೇಂದ್ರ ರಾಯ್, ಸಿಕ್ಕಿಂನ ವಿಭಾಗೀಯ ಅರಣ್ಯಾಧಿಕಾರಿ. ಆದರೆ ಅಪರಾಜಿತಾ 8 ವರ್ಷದವಳಿದ್ದಾಗ ನಿಧನರಾದರು. ಆಕೆಯ ತಾಯಿಯ ಹೆಸರು ರೋಮಾ ರಾಯ್. ಅಪರಾಜಿತಾ ರೈ ಬಾಲ್ಯದಿಂದಲೂ ಅಧ್ಯಯನದಲ್ಲಿ ತುಂಬಾ ಚುರುಕಾಗಿದ್ದರು. ಅವರು 2004 ರಲ್ಲಿ ICS ಬೋರ್ಡ್ ಪರೀಕ್ಷೆಯಲ್ಲಿ ಶೇಕಡಾ 95 ಅಂಕಗಳೊಂದಿಗೆ ರಾಜ್ಯಕ್ಕೆ ಅಗ್ರಸ್ಥಾನ ಪಡೆದರು. ಅವರ ಶಾಲೆಯ ತಾಶಿ ನಮ್ಗ್ಯಾಲ್ ಅಕಾಡೆಮಿಯಲ್ಲಿ ಅತ್ಯುತ್ತಮ ಆಲ್ ರೌಂಡರ್ ವಿದ್ಯಾರ್ಥಿಗಾಗಿ ಸಂಸ್ಥಾಪಕರ ಪದಕವನ್ನು ಪಡೆದುಕೊಂಡಿದ್ದರು.

  ಮಾಧ್ಯಮಿಕ ಶಿಕ್ಷಣದ ನಂತರ, ಅವರು ರಾಷ್ಟ್ರೀಯ ಪ್ರವೇಶ ಪರೀಕ್ಷೆಯಲ್ಲಿ ಉತ್ತೀರ್ಣರಾದರು ಮತ್ತು 2009 ರಲ್ಲಿ ಪಶ್ಚಿಮ ಬಂಗಾಳದ ನ್ಯಾಯಾಂಗ ವಿಜ್ಞಾನಗಳ ರಾಷ್ಟ್ರೀಯ ವಿಶ್ವವಿದ್ಯಾಲಯದಿಂದ BA LLB (ಆನರ್ಸ್) ಪದವಿಯನ್ನು ಪಡೆದರು. ಇಲ್ಲಿ ಅವರು ನ್ಯಾಯಶಾಸ್ತ್ರ ಮತ್ತು ಸಾರ್ವಜನಿಕ ಆಡಳಿತ ಎರಡರಲ್ಲೂ ಚಿನ್ನದ ಪದಕವನ್ನು ಪಡೆದಿದ್ದಾರೆ. ಅವರು 2009 ರಲ್ಲಿ ಮೊದಲ ಬಾರಿಗೆ UPSC ನಾಗರಿಕ ಸೇವೆಗಳ ಪರೀಕ್ಷೆಯನ್ನು ತೆಗೆದುಕೊಂಡಿದ್ದರು. ಆದರೆ ಕ್ಲಿಯರ್ ಮಾಡುವಲ್ಲಿ ವಿಫಲರಾಗಿದ್ದರು.

  ಮತ್ತೊಮ್ಮೆ 2010 ರಲ್ಲಿ UPSC ನಾಗರಿಕ ಸೇವೆಗಳ ಪರೀಕ್ಷೆಗೆ ಹಾಜರಾಗಿದ್ದರು. ಈ ಬಾರಿ 768ನೇ ರ್‍ಯಾಂಕ್‌ ಪಡೆದಿದ್ದರು. ಆದರೆ ಇದರಿಂದ ಆಕೆ ತೃಪ್ತರಾಗದೇ ಮತ್ತೆ 2011ರಲ್ಲಿ ಯುಪಿಎಸ್‌ಸಿ ಸತತ ಮೂರನೇ ಬಾರಿ ಪರೀಕ್ಷೆ ಬರೆದು ಅಖಿಲ ಭಾರತ ಮಟ್ಟದಲ್ಲಿ 358ನೇ ಸ್ಥಾನ ಪಡೆದಿದ್ದರು. ಮೂರನೇ ಪ್ರಯತ್ನದಲ್ಲಿ ಐಪಿಎಸ್ ಆದರು.

  ಐಪಿಎಸ್ ಅಪರಾಜಿತಾ ರಾಯ್ ಪಶ್ಚಿಮ ಬಂಗಾಳ ಕೇಡರ್‌ನ ಐಪಿಎಸ್ ಅಧಿಕಾರಿ. ಡ್ಯಾಶಿಂಗ್ ಪೊಲೀಸ್ ಅಧಿಕಾರಿ ಮಾತ್ರವಲ್ಲದೆ ಉತ್ತಮ ಕ್ರೀಡಾ ಪಟು ಕೂಡ. ಅವರು ಅಖಿಲ ಭಾರತ ಪೊಲೀಸ್ ಬ್ಯಾಡ್ಮಿಂಟನ್ ಚಾಂಪಿಯನ್‌ಶಿಪ್‌ನಲ್ಲಿ ರನ್ನರ್ ಅಪ್ ಸ್ಥಾನವನ್ನೂ ಪಡೆದಿದ್ದಾರೆ. ಇದಲ್ಲದೇ ಡ್ರಗ್ಸ್, ಬಂಗಾರದಂತಹ ವಸ್ತುಗಳ ಕಳ್ಳಸಾಗಣೆ ಪ್ರಕರಣಗಳನ್ನು ಭೇದಿಸುವ ಮೂಲಕ ಸುದ್ದಿಯಾಗಿದ್ದಾರೆ. ಒಮ್ಮೆ ಅವರು ಕಾರ್ಪೊರೇಟ್ ಶೈಲಿಯ ಕಳ್ಳಸಾಗಣೆ ಸಿಂಡಿಕೇಟ್ ಅನ್ನು ಭೇದಿಸಿ ಸುದ್ದಿಯಾಗಿದ್ದರು.