ಹಾರ್ಮುಜ್ ಉದ್ವಿಗ್ನತೆಯಲ್ಲೂ ಮಾನವೀಯ ನೆರವು - ಇರಾನ್‌ಗೆ ಮೆಡಿಕಲ್ ಕಿಟ್ ಕಳುಹಿಸಿದ ಭಾರತ

•   Wed, Mar 18 2026 04:40:40 PM



• ನವದೆಹಲಿ, ಮಾ. 18 (DaijiworldNews/T A): ಯುದ್ಧದಿಂದ ಸಂಕಷ್ಟಕ್ಕೆ ಒಳಗಾದ ಇರಾನ್‌ಗೆ ಭಾರತ ವೈದ್ಯಕೀಯ ನೆರವು ಕಳುಹಿಸಿದೆ. ಅಗತ್ಯ ಔಷಧಿ ಮತ್ತು ವೈದ್ಯಕೀಯ ಸಾಮಗ್ರಿಗಳನ್ನು ಒಳಗೊಂಡ ಮೆಡಿಕಲ್ ಕಿಟ್‌ಗಳನ್ನು ರೆಡ್ ಕ್ರೆಸೆಂಟ್ ಸೊಸೈಟಿಗೆ ರವಾನಿಸಲಾಗಿದೆ.

  

  ಈ ನೆರವು ಪ್ರಾದೇಶಿಕ ಉದ್ವಿಗ್ನತೆಯ ನಡುವೆಯೂ ಭಾರತದ ಮಾನವೀಯ ನಿಲುವನ್ನು ತೋರಿಸುತ್ತಿದೆ. ಭಾರತ ಸರ್ಕಾರದ ಈ ಕ್ರಮಕ್ಕೆ ಇರಾನ್ ಕೃತಜ್ಞತೆ ವ್ಯಕ್ತಪಡಿಸಿದೆ. ಭಾರತದಲ್ಲಿನ ಇರಾನ್ ರಾಯಭಾರ ಕಚೇರಿ, ಈ ಸಹಾಯವನ್ನು ಸ್ವಾಗತಿಸಿ ಭಾರತೀಯ ಜನತೆಗೆ ಧನ್ಯವಾದ ತಿಳಿಸಿದೆ. ಜೊತೆಗೆ, ಮೆಡಿಕಲ್ ಕಿಟ್‌ಗಳ ವಿತರಣೆ ಕುರಿತು ವೀಡಿಯೊವನ್ನೂ ಹಂಚಿಕೊಂಡಿದೆ.

  ಇರಾನ್‌ ಮತ್ತು ಇಸ್ರೇಲ್ ನಡುವೆ ನಡೆಯುತ್ತಿರುವ ಯುದ್ಧ ಇನ್ನೂ ತೀವ್ರಗೊಂಡಿದ್ದು, ಯುನೈಟೆಡ್ ಸ್ಟೇಟ್ಸ್ ಕೂಡ ಪರಿಸ್ಥಿತಿಯಲ್ಲಿ ಸಕ್ರಿಯ ಪಾತ್ರವಹಿಸುತ್ತಿದೆ. ಪರಸ್ಪರ ದಾಳಿಗಳು ಮುಂದುವರಿದಿರುವ ಈ ಸಂಘರ್ಷದಲ್ಲಿ, ಗಲ್ಫ್ ಪ್ರದೇಶದಲ್ಲಿ ಉದ್ವಿಗ್ನತೆ ಗರಿಗೆದರಿದೆ.

  ಅಮೆರಿಕ ಅಧ್ಯಕ್ಷ ಡೊನಾಲ್ಡ್ ಟ್ರಂಪ್ ಇರಾನ್ ವಿರುದ್ಧ ಕಠಿಣ ನಿಲುವು ತಾಳಿದ್ದು, ಹಾರ್ಮುಜ್ ಜಲಸಂಧಿ ವಿಚಾರವಾಗಿ ಇತರ ದೇಶಗಳೂ ಒಟ್ಟಾಗಿ ಕ್ರಮ ಕೈಗೊಳ್ಳಬೇಕು ಎಂದು ಎಚ್ಚರಿಕೆ ನೀಡಿದ್ದಾರೆ. ಇದೇ ವೇಳೆ, ಭಾರತ ಸೇರಿದಂತೆ ಹಲವು ರಾಷ್ಟ್ರಗಳನ್ನು ಸಂಪರ್ಕಿಸಿ ಯುದ್ಧನೌಕೆಗಳನ್ನು ಕಳುಹಿಸಲು ಮನವಿ ಮಾಡಲಾಗಿದೆ ಎನ್ನಲಾಗಿದೆ. ಆದರೆ ಭಾರತ ಈ ಮನವಿಗೆ ಸ್ಪಷ್ಟ ಬೆಂಬಲ ನೀಡಿಲ್ಲ.

  ಇನ್ನೊಂದೆಡೆ, ಪ್ರಧಾನಮಂತ್ರಿ ನರೇಂದ್ರ ಮೋದಿ ಶಾಂತಿಯ ಪರ ನಿಲುವು ತಾಳಿದ್ದು, ಬೆಂಜಮಿನ್ ನೆತನ್ಯಾಹು ಜೊತೆ ಹಲವು ಬಾರಿ ಮಾತುಕತೆ ನಡೆಸಿ ಯುದ್ಧವನ್ನು ನಿಲ್ಲಿಸುವಂತೆ ಮನವಿ ಮಾಡಿದ್ದಾರೆ. ಒಂದೆಡೆ ಶಾಂತಿ ಮಾತುಕತೆಗೆ ಒತ್ತು ನೀಡುತ್ತಾ, ಮತ್ತೊಂದೆಡೆ ಮಾನವೀಯ ನೆರವು ನೀಡುತ್ತಿರುವ ಭಾರತ, ಈ ಸಂಕಷ್ಟದ ಪರಿಸ್ಥಿತಿಯಲ್ಲಿ ಸಮತೋಲನದ ರಾಜತಾಂತ್ರಿಕ ನಿಲುವು ಅನುಸರಿಸುತ್ತಿದೆ. ಇದರಿಂದ, ಯುದ್ಧದ ಮಧ್ಯೆಯೂ ಭಾರತ ತನ್ನ ಜಾಗತಿಕ ಜವಾಬ್ದಾರಿಯನ್ನು ಮಾನವೀಯ ದೃಷ್ಟಿಕೋನದಿಂದ ನಿರ್ವಹಿಸುತ್ತಿರುವುದು ಸ್ಪಷ್ಟವಾಗಿದೆ.

  Embassy of the Islamic Republic of Iran in India says, "The first shipment of medical aid from the esteemed people of India has been delivered to the Iranian Red Crescent Society. We sincerely thank the kind people of India."
  
  (Video source: Embassy of the Islamic Republic of… pic.twitter.com/6LobbWCdmY

  — ANI (@ANI) March 18, 2026