ವೈದ್ಯರಿಗೆ ಬಿಳಿ ಕೋಟ್, ವಕೀಲರಿಗೆ ಕಪ್ಪು ಕೋಟ್ - ಬಣ್ಣಗಳ ಹಿಂದಿದೆ ಆಸಕ್ತಿದಾಯಕ ಕಾರಣ!

•   Fri, Jan 30 2026 10:33:55 AM



• ನವದೆಹಲಿ, ಜ.30 (DaijiworldNews/TA): ಶಾಲೆ – ಕಾಲೇಜುಗಳಲ್ಲಿ ಯುನಿಫಾರ್ಮ್ ಅಥವಾ ಡ್ರೆಸ್ ಕೋಡ್ ಇರುವಂತೆ, ಕೆಲವು ವೃತ್ತಿಗಳಿಗೂ ನಿರ್ದಿಷ್ಟ ಉಡುಪಿನ ಸಂಪ್ರದಾಯವಿದೆ. ನೀವು ಆಸ್ಪತ್ರೆಗೆ ಹೋದಾಗ ವೈದ್ಯರು ಬಿಳಿ ಬಣ್ಣದ ಕೋಟ್ ಧರಿಸಿರುವುದನ್ನು, ನ್ಯಾಯಾಲಯಕ್ಕೆ ಹೋದಾಗ ವಕೀಲರು ಕಪ್ಪು ಬಣ್ಣದ ಕೋಟ್ ಹಾಕಿರುವುದನ್ನು ಗಮನಿಸಿದ್ದೀರಲ್ಲವಾ? ಆದರೆ ಈ ನಿರ್ದಿಷ್ಟ ಬಣ್ಣಗಳ ಆಯ್ಕೆಯ ಹಿಂದೆ ಇರುವ ಕಾರಣಗಳ ಬಗ್ಗೆ ಯೋಚನೆ ಮಾಡಿದ್ದೀರಾ? ಅದರ ಹಿಂದೆ ಇತಿಹಾಸ, ವಿಜ್ಞಾನ ಮತ್ತು ಮನೋವಿಜ್ಞಾನ ಅಡಗಿದೆ.

  

  ವೈದ್ಯರು ಬಿಳಿ ಬಣ್ಣದ ಕೋಟ್ ಏಕೆ ಧರಿಸುತ್ತಾರೆ?: ವೈದ್ಯರು ಹಾಗೂ ನರ್ಸ್‌ಗಳು ಆಸ್ಪತ್ರೆಯಲ್ಲಿ ಸಾಮಾನ್ಯವಾಗಿ ಬಿಳಿ ಬಣ್ಣದ ಕೋಟ್ ಧರಿಸುತ್ತಾರೆ. ಬಿಳಿ ಬಣ್ಣವು ಶುದ್ಧತೆ, ಶುಚಿತ್ವ ಮತ್ತು ನಂಬಿಕೆಯ ಸಂಕೇತವಾಗಿದೆ.

  19ನೇ ಶತಮಾನದ ಮೊದಲು ವೈದ್ಯರು ಸಾಮಾನ್ಯ ಬಟ್ಟೆಗಳಲ್ಲಿ ರೋಗಿಗಳಿಗೆ ಚಿಕಿತ್ಸೆ ನೀಡುತ್ತಿದ್ದರು. ಆದರೆ ವೈದ್ಯಕೀಯ ವಿಜ್ಞಾನ ಅಭಿವೃದ್ಧಿಯಾದಂತೆ ಬ್ಯಾಕ್ಟೀರಿಯಾ, ಸೋಂಕುಗಳು ಹಾಗೂ ನೈರ್ಮಲ್ಯದ ಮಹತ್ವ ಅರಿವಿಗೆ ಬಂದಿತು. ಇದರ ಪರಿಣಾಮವಾಗಿ ಆಸ್ಪತ್ರೆಗಳಲ್ಲಿ ಶುಚಿತ್ವಕ್ಕೆ ಹೆಚ್ಚಿನ ಒತ್ತು ನೀಡಲಾಯಿತು ಮತ್ತು ಬಿಳಿ ಕೋಟ್ ವೃತ್ತಿಪರ ಗುರುತಾಗಿ ರೂಪುಗೊಂಡಿತು.

  ಬಿಳಿ ಕೋಟ್ ಧರಿಸಿದ ವೈದ್ಯರನ್ನು ನೋಡಿದಾಗ ರೋಗಿಗಳಿಗೆ ಭದ್ರತೆ ಮತ್ತು ವಿಶ್ವಾಸದ ಭಾವನೆ ಮೂಡುತ್ತದೆ. “ನನ್ನನ್ನು ಸುರಕ್ಷಿತವಾಗಿ ಚಿಕಿತ್ಸೆ ನೀಡಲಾಗುತ್ತಿದೆ” ಎಂಬ ಮನೋಭಾವ ರೋಗಿಗಳಲ್ಲಿ ಬೆಳೆಸುತ್ತದೆ. ಜೊತೆಗೆ, ಬಿಳಿ ಬಣ್ಣದ ಮೇಲೆ ಕಲೆಗಳು ಸುಲಭವಾಗಿ ಗೋಚರಿಸುವುದರಿಂದ ವೈದ್ಯರು ಸದಾ ಸ್ವಚ್ಛತೆ ಕಾಪಾಡಿಕೊಳ್ಳಬೇಕೆಂಬ ಎಚ್ಚರಿಕೆಯಾಗಿ ಕಾರ್ಯನಿರ್ವಹಿಸುತ್ತದೆ. ಈ ಕಾರಣಗಳಿಂದಲೇ ಬಿಳಿ ಕೋಟ್ ವೈದ್ಯರ ವೃತ್ತಿಪರತೆಯ ಪ್ರತೀಕವಾಗಿದೆ.

  ವಕೀಲರು ಕಪ್ಪು ಬಣ್ಣದ ಕೋಟ್ ಏಕೆ ಧರಿಸುತ್ತಾರೆ? : ನ್ಯಾಯಾಲಯಗಳಲ್ಲಿ ವಕೀಲರು ಕಪ್ಪು ಬಣ್ಣದ ಕೋಟ್ ಧರಿಸುವುದು ಶತಮಾನಗಳಿಂದ ನಡೆದುಕೊಂಡು ಬಂದ ಸಂಪ್ರದಾಯ. ಇದರ ಇತಿಹಾಸ 17ನೇ ಶತಮಾನಕ್ಕೆ ಸೇರಿದೆ. ಬ್ರಿಟಿಷ್ ರಾಜ ಚಾರ್ಲ್ಸ್ II ಅವರ ನಿಧನದ ನಂತರ, ಅವರ ಸಾವಿಗೆ ಗೌರವ ಸೂಚಕವಾಗಿ ವಕೀಲರು ಹಾಗೂ ನ್ಯಾಯಾಧೀಶರು ಕಪ್ಪು ಬಟ್ಟೆಗಳನ್ನು ಧರಿಸಿದ್ದರು. ನಂತರ ಇದೇ ಪದ್ಧತಿ ಕಾನೂನು ವೃತ್ತಿಯಲ್ಲಿ ಶಾಶ್ವತ ಸಂಪ್ರದಾಯವಾಗಿ ಉಳಿದುಕೊಂಡಿತು.

  ಕಪ್ಪು ಬಣ್ಣವು ನ್ಯಾಯ, ಅಧಿಕಾರ, ಗಂಭೀರತೆ ಮತ್ತು ನಿಷ್ಪಕ್ಷಪಾತತೆಯ ಸಂಕೇತವಾಗಿದೆ. ವಕೀಲರು ಕಪ್ಪು ಕೋಟ್ ಧರಿಸಿದಾಗ, ಅವರ ವ್ಯಕ್ತಿತ್ವದಲ್ಲಿ ಕೆಲಸದ ತೀವ್ರತೆ ಮತ್ತು ವೃತ್ತಿಪರತೆ ಸ್ಪಷ್ಟವಾಗಿ ಕಾಣುತ್ತದೆ. ಕಪ್ಪು ಬಣ್ಣದಲ್ಲಿ ಕಲೆಗಳು ಸುಲಭವಾಗಿ ಗೋಚರಿಸದ ಕಾರಣ, ಇದು ದೈನಂದಿನ ನ್ಯಾಯಾಲಯದ ಕಾರ್ಯಗಳಿಗೆ ಸಹ ಅನುಕೂಲಕರವಾಗಿದೆ.

  ಒಟ್ಟಾರೆ, ವೈದ್ಯರ ಬಿಳಿ ಕೋಟ್ ಮತ್ತು ವಕೀಲರ ಕಪ್ಪು ಕೋಟ್ ಕೇವಲ ಉಡುಪುಗಳಲ್ಲ. ಅವುಗಳು ಅವರ ವೃತ್ತಿಯ ಗೌರವ, ನಂಬಿಕೆ ಮತ್ತು ಹೊಣೆಗಾರಿಕೆಯನ್ನು ಪ್ರತಿಬಿಂಬಿಸುವ ಗುರುತುಗಳಾಗಿವೆ.

  -ತಾರಾ ವರ್ಕಾಡಿ