ಜನವರಿ 1ರಂದೇ ಹೊಸ ವರ್ಷ ಯಾಕೆ ? - ಮಹತ್ವದ ವರ್ಷಾಚರಣೆಯ ಐತಿಹ್ಯ!

•   Wed, Dec 31 2025 07:10:49 PM



• ನವದೆಹಲಿ, ಡಿ. 31 (DaijiworldNews/TA): ಹಳೆಯ ವರ್ಷಕ್ಕೆ ವಿದಾಯ ಹೇಳಿ ಹೊಸ ವರ್ಷವನ್ನು ಸ್ವಾಗತಿಸಲು ಈಗಾಗಲೇ ಕ್ಷಣಗಣನೆ ಆರಂಭವಾಗಿದೆ. ಪ್ರತಿವರ್ಷ ಡಿಸೆಂಬರ್ 31ರ ರಾತ್ರಿಯಿಂದಲೇ ಸಂಭ್ರಮಾಚರಣೆ ಶುರುವಾಗುತ್ತದೆ. ಕುಟುಂಬಸ್ಥರು, ಸ್ನೇಹಿತರೊಂದಿಗೆ ಸೇರಿ ಸಂಭ್ರಮಿಸುವ ಮೂಲಕ ಉಜ್ವಲ ಹಾಗೂ ಸಮೃದ್ಧ ಭವಿಷ್ಯದ ಭರವಸೆಯೊಂದಿಗೆ ಜನರು ಹೊಸ ವರ್ಷವನ್ನು ಹರ್ಷದಿಂದ ಬರಮಾಡಿಕೊಳ್ಳುತ್ತಾರೆ. ಪ್ರಪಂಚದಾದ್ಯಂತ ಜನವರಿ 1ರಂದು ಹೊಸ ವರ್ಷವನ್ನು ಆಚರಿಸುವ ಸಂಪ್ರದಾಯ ಶತಮಾನಗಳಿಂದ ನಡೆದುಕೊಂಡು ಬಂದಿದೆ. ಆದರೆ ಜನವರಿ 1ರಂದೇ ಹೊಸ ವರ್ಷವನ್ನು ಆಚರಿಸುವುದೇಕೆ? ಈ ಪದ್ಧತಿ ಯಾವಾಗ ಆರಂಭವಾಯಿತು ಎಂಬುದು ಬಹುತೇಕ ಜನರಿಗೆ ಕುತೂಹಲದ ವಿಷಯವಾಗಿದೆ.

  

  ಹೊಸ ವರ್ಷದ ಆಚರಣೆಯ ಇತಿಹಾಸ: ವಿಶ್ವಾದ್ಯಂತ ಹೊಸ ವರ್ಷದ ಆಚರಣೆ ಸಾಂಪ್ರದಾಯಿಕ ಗ್ರೆಗೋರಿಯನ್ ಕ್ಯಾಲೆಂಡರ್ ಆಧಾರಿತವಾಗಿದೆ. ಜನವರಿ 1ನ್ನು ಹೊಸ ವರ್ಷದ ದಿನವಾಗಿ ಆಚರಿಸುವ ಪದ್ಧತಿ ಅಕ್ಟೋಬರ್ 15, 1582ರಿಂದ ಜಾರಿಗೆ ಬಂದಿದೆ. ಅದಕ್ಕೂ ಮೊದಲು ಕೆಲವು ದೇಶಗಳಲ್ಲಿ ಮಾರ್ಚ್ 25 ಅಥವಾ ಡಿಸೆಂಬರ್ 25ರಂದು ಹೊಸ ವರ್ಷವನ್ನು ಆಚರಿಸಲಾಗುತ್ತಿತ್ತು. ಪ್ರಾಚೀನ ರೋಮ್‌ನಲ್ಲಿ ಮಾರ್ಚ್ ತಿಂಗಳು ಯುದ್ಧದ ದೇವರಾದ ಮಾರ್ಸ್‌ಗೆ ಸಂಬಂಧಿಸಿದ್ದಾಗಿ ಪರಿಗಣಿಸಲಾಗುತ್ತಿತ್ತು.

  ಆರಂಭಿಕ ರೋಮನ್ ಕ್ಯಾಲೆಂಡರ್‌ನಲ್ಲಿ ಕೇವಲ 10 ತಿಂಗಳುಗಳಿದ್ದು, ವರ್ಷದಲ್ಲಿ 310 ದಿನಗಳು ಮತ್ತು ವಾರದಲ್ಲಿ 8 ದಿನಗಳಿದ್ದವು. ಆ ಕಾಲದಲ್ಲಿ ವಸಂತಕಾಲದ ಆರಂಭವನ್ನು ಸೂಚಿಸುವ ‘ಅಕಿಟು’ ಎಂಬ ಹಬ್ಬವನ್ನು ಮಾರ್ಚ್‌ನಲ್ಲಿ ಆಚರಿಸಲಾಗುತ್ತಿತ್ತು.

  ಜನವರಿ 1ರಂದು ಹೊಸ ವರ್ಷವನ್ನು ಆಚರಿಸುವ ಸಂಪ್ರದಾಯವು ಪ್ರಾಚೀನ ರೋಮ್‌ನಲ್ಲಿಯೇ ಆರಂಭವಾಯಿತು. ಕ್ರಿ.ಪೂ. 46ರಲ್ಲಿ ರೋಮನ್ ಚಕ್ರವರ್ತಿ ಜೂಲಿಯಸ್ ಸೀಸರ್ ‘ಜೂಲಿಯನ್ ಕ್ಯಾಲೆಂಡರ್’ ಅನ್ನು ಜಾರಿಗೆ ತಂದರು. ಈ ಕ್ಯಾಲೆಂಡರ್‌ನಲ್ಲಿ ಒಂದು ವರ್ಷಕ್ಕೆ 12 ತಿಂಗಳುಗಳನ್ನು ಸೇರಿಸಲಾಯಿತು. ಖಗೋಳಶಾಸ್ತ್ರಜ್ಞರ ಸಲಹೆ ಪಡೆದು ಭೂಮಿಯು ಸೂರ್ಯನ ಸುತ್ತ ಒಂದು ಸುತ್ತು ತಿರುಗಲು 365 ದಿನಗಳು ಮತ್ತು ಆರು ಗಂಟೆಗಳು ಬೇಕೆಂದು ಗಣನೆ ಮಾಡಲಾಯಿತು. ಹೀಗಾಗಿ ವರ್ಷದ ದಿನಗಳ ಸಂಖ್ಯೆಯನ್ನು 365ಕ್ಕೆ ವಿಸ್ತರಿಸಲಾಯಿತು.

  ನಂತರ ನೇಪಲ್ಸ್‌ನ ವೈದ್ಯ ಹಾಗೂ ಖಗೋಳಶಾಸ್ತ್ರಜ್ಞ ಅಲೋಶಿಯಸ್ ಲಿಲಿಯಸ್ ರೋಮನ್ ಕ್ಯಾಲೆಂಡರ್‌ಗೆ ಸುಧಾರಣೆ ತಂದು ಹೊಸ ಗ್ರೆಗೋರಿಯನ್ ಕ್ಯಾಲೆಂಡರ್ ರೂಪಿಸಿದರು. ಈ ಕ್ಯಾಲೆಂಡರ್‌ನಲ್ಲಿ ವರ್ಷದ ಮೊದಲ ದಿನವನ್ನು ಜನವರಿ 1 ಎಂದು ನಿಗದಿಪಡಿಸಲಾಯಿತು. ಅಂದಿನಿಂದ ಜನವರಿ 1ರಂದು ಹೊಸ ವರ್ಷವನ್ನು ಆಚರಿಸುವ ಪದ್ಧತಿ ಜಗತ್ತಿನಾದ್ಯಂತ ವ್ಯಾಪಕವಾಗಿ ಅಳವಡಿಸಿಕೊಂಡಿತು.

  ಹೊಸ ವರ್ಷದ ಮಹತ್ವ: ಹೊಸ ವರ್ಷ ಎಂದರೆ ಕೇವಲ ಕ್ಯಾಲೆಂಡರ್ ಬದಲಾಗುವ ದಿನವಲ್ಲ. ಅದು ನಮ್ಮ ಜೀವನದಲ್ಲಿ ಹೊಸ ಆರಂಭಕ್ಕೆ ಸಂಕೇತವಾಗಿದೆ. ಹಿಂದಿನ ನೋವು, ಕಹಿ ಅನುಭವಗಳನ್ನು ಮರೆತು ಹೊಸ ಗುರಿಗಳು, ಹೊಸ ಕನಸುಗಳೊಂದಿಗೆ ಜೀವನವನ್ನು ಮುಂದುವರಿಸಲು ಹೊಸ ವರ್ಷ ಒಂದು ಅವಕಾಶವನ್ನು ನೀಡುತ್ತದೆ. ಹೊಸ ವರ್ಷದ ಆರಂಭವು ನಮ್ಮೊಳಗೆ ಹೊಸ ಶಕ್ತಿ, ಸಕಾರಾತ್ಮಕತೆ ಮತ್ತು ಆಶಾವಾದವನ್ನು ತುಂಬುತ್ತದೆ. ಪ್ರತಿದಿನವನ್ನು ಹೇಗೆ ಉತ್ತಮವಾಗಿ ಬದುಕಬೇಕು ಎಂಬುದನ್ನು ಹೊಸ ವರ್ಷ ನಮಗೆ ನೆನಪಿಸುತ್ತದೆ.

  ಭಾರತದಲ್ಲಿ ಹೊಸ ವರ್ಷದ ಆಚರಣೆ : ಭಾರತದಲ್ಲಿ ಹೊಸ ವರ್ಷದ ಆಚರಣೆಗಳು ಪ್ರದೇಶ, ಸಂಸ್ಕೃತಿ ಮತ್ತು ಧರ್ಮದ ಆಧಾರದಲ್ಲಿ ವಿಭಿನ್ನವಾಗಿವೆ. ಪಂಜಾಬ್‌ನಲ್ಲಿ ಏಪ್ರಿಲ್ 13ರಂದು ಬೈಸಾಖಿ ಹಬ್ಬದಂದು ಹೊಸ ವರ್ಷವನ್ನು ಆಚರಿಸಲಾಗುತ್ತದೆ. ನಾನಾಕ್ಷಾಹಿ ಕ್ಯಾಲೆಂಡರ್ ಪ್ರಕಾರ ಸಿಖ್ಖರು ಮಾರ್ಚ್ ತಿಂಗಳಲ್ಲಿ ಹೋಳಿಯ ಎರಡನೇ ದಿನ ಹೊಸ ವರ್ಷವನ್ನು ಆಚರಿಸುತ್ತಾರೆ. ಜೈನ ಸಮುದಾಯದಲ್ಲಿ ದೀಪಾವಳಿಯ ಎರಡನೇ ದಿನ ಹೊಸ ವರ್ಷದ ಆಚರಣೆ ನಡೆಯುತ್ತದೆ. ಹಿಂದೂ ಧರ್ಮದಲ್ಲಿ ಯುಗಾದಿ ಹಬ್ಬವನ್ನು ಹೊಸ ವರ್ಷದ ಆರಂಭವೆಂದು ಆಚರಿಸಲಾಗುತ್ತದೆ.

  ಒಟ್ಟಿನಲ್ಲಿ, ಹೊಸ ವರ್ಷವು ಜಗತ್ತಿನ ವಿವಿಧ ಸಂಸ್ಕೃತಿಗಳಲ್ಲಿ ವಿಭಿನ್ನ ರೀತಿಯಲ್ಲಿ ಆಚರಿಸಲ್ಪಡುತ್ತಿದ್ದರೂ, ಹೊಸ ಆರಂಭ, ಆಶಾಭಾವನೆ ಮತ್ತು ಉತ್ತಮ ಭವಿಷ್ಯದ ಸಂಕೇತವಾಗಿ ಎಲ್ಲರ ಬದುಕಿನಲ್ಲಿ ವಿಶೇಷ ಸ್ಥಾನವನ್ನು ಹೊಂದಿದೆ.