ಕಣ್ಮರೆಯಾಗುವ ಸಮುದ್ರ - ಇದು ಕಡಲಿನ ಕಣ್ಣಾಮುಚ್ಚಾಲೆಯ ಕಥೆ!

•   Mon, Dec 15 2025 04:42:41 PM



• ಒಡಿಶಾ, ಡಿ. 15 (DaijiworldNews/TA): ಜಗತ್ತಿನಲ್ಲಿ ಪ್ರಕೃತಿಯೇ ಸೃಷ್ಟಿಸಿರುವ ಅನೇಕ ವಿಚಿತ್ರ ಹಾಗೂ ಆಶ್ಚರ್ಯಕರ ಘಟನೆಗಳಿವೆ. ಅಂಥದ್ದೇ ಒಂದು ಅಪರೂಪದ ಅದ್ಭುತ ದೃಶ್ಯ ಒಡಿಶಾದ ಚಂಡಿಪುರ ಬೀಚ್‌ನಲ್ಲಿ ಕಂಡುಬರುತ್ತದೆ. ಇಲ್ಲಿ ಸಮುದ್ರದ ನೀರು ಕ್ಷಣಾರ್ಧದಲ್ಲಿ ಕಣ್ಮರೆಯಾಗುವಂತೆ ಕಾಣುವುದು ಈ ಕಡಲತೀರದ ವಿಶೇಷತೆ. ಒಡಿಶಾದ ಬಾಲಸೋರ್ ಜಿಲ್ಲೆಯ ಬಳಿ ಇರುವ ಚಂಡಿಪುರ ಬೀಚ್‌ನಲ್ಲಿ ಸಮುದ್ರದ ನೀರು ಮುಂದೆ ಹರಿದು ಬರುತ್ತದೆ, ಮತ್ತೆ ನೋಡು ನೋಡುತ್ತಿದ್ದಂತೆ ಹಿಂದೆ ಸರಿಯುತ್ತದೆ. ನೀರು ಕಡಿಮೆಯಾದ ಸಮಯದಲ್ಲಿ ವಿಶಾಲವಾದ ಮರಳುಗದ್ದೆ ಕಾಣಿಸಿಕೊಳ್ಳುತ್ತಿದ್ದು, ಕಡಲತೀರವು ನಿಗೂಢ ಮತ್ತು ವಿಶಿಷ್ಟ ರೂಪವನ್ನು ಪಡೆದುಕೊಳ್ಳುತ್ತದೆ.

  

  ಸಮುದ್ರದ ಅಲೆಗಳು ಏರುಪೇರಾಗುವ ವೇಳೆ ಚಂಡಿಪುರ ಬೀಚ್ ಸಂಪೂರ್ಣವಾಗಿ ಬೇರೆ ಸ್ವರೂಪ ಪಡೆಯುತ್ತದೆ. ನೀರು ಹಿಂದೆ ಸರಿದಾಗ ಸಮುದ್ರ ಹಲವಾರು ಮೀಟರ್‌ಗಳಷ್ಟು ದೂರಕ್ಕೆ ಹಿಂತಿರುಗುತ್ತದೆ. ಈ ಅಪರೂಪದ ಪ್ರಕೃತಿ ವೈಚಿತ್ರ್ಯವನ್ನು ನೋಡಲು ದೇಶದ ವಿವಿಧ ಭಾಗಗಳಿಂದಷ್ಟೇ ಅಲ್ಲದೆ ವಿದೇಶಗಳಿಂದಲೂ ಪ್ರವಾಸಿಗರು ಆಗಮಿಸುತ್ತಾರೆ. ಇದೇ ಕಾರಣಕ್ಕೆ ಈ ಬೀಚ್ ವಿಶ್ವಾದ್ಯಂತ ಪ್ರಸಿದ್ಧಿಯಾಗಿದ್ದು, ಇದನ್ನು ‘ಹೈಡ್ ಅಂಡ್ ಸೀಕ್ ಬೀಚ್’ ಎಂದು ಕೂಡ ಕರೆಯಲಾಗುತ್ತದೆ.

  ಚಂಡಿಪುರ ಬೀಚ್‌ನ ಈ ವಿಶೇಷತೆಗೆ ಪ್ರಮುಖ ಕಾರಣ ಸಮುದ್ರದ ಅಲೆಗಳ ಏರಿಳಿತ. ಇಲ್ಲಿ ಹಗಲಿನ ವೇಳೆಯಲ್ಲಿ ಅಲೆಗಳು ನಿಧಾನವಾಗಿ ಇಳಿಯುತ್ತವೆ. ಆದರೆ ನೀರು ಯಾವ ಸಮಯದಲ್ಲಿ ಹಿಂದಕ್ಕೆ ಸರಿಯುತ್ತದೆ ಎಂಬುದಕ್ಕೆ ನಿಖರವಾದ ಸಮಯ ನಿಗದಿಯಾಗಿಲ್ಲ. ಚಂದ್ರನ ಆಕರ್ಷಣಾ ಶಕ್ತಿ ಸೇರಿದಂತೆ ಪ್ರಕೃತಿಯ ಹಲವು ಅಂಶಗಳು ಸಮುದ್ರದ ನೀರಿನ ಮಟ್ಟದ ಮೇಲೆ ಪರಿಣಾಮ ಬೀರುತ್ತವೆ. ಈ ಬದಲಾವಣೆಗಳನ್ನು ಸ್ಥಳೀಯರು ವರ್ಷಗಳಿಂದ ಗಮನಿಸುತ್ತಾ ಬಂದಿದ್ದು, ಅವರಿಗೆ ಈ ಕಡಲತೀರದ ನಿಗೂಢ ಸ್ವಭಾವ ಚೆನ್ನಾಗಿ ಪರಿಚಿತವಾಗಿದೆ.

  ಈ ಕಡಲತೀರ ದೊಡ್ಡ ಕ್ಯಾಸುವಾರಿನಾ ಮರಗಳು, ಶುದ್ಧ ವಾತಾವರಣ ಮತ್ತು ಕರಾವಳಿ ಸಸ್ಯ ಸಂಪತ್ತಿನಿಂದ ಆವೃತವಾಗಿದೆ. ಪ್ರತಿದಿನವೂ ಇಲ್ಲಿ ಸಮುದ್ರದ ನೀರು ಎರಡು ಬಾರಿ ಹಿಂದಕ್ಕೆ ಸಾಗಿ ಮತ್ತೆ ಮುನ್ನುಗ್ಗುತ್ತದೆ. ಅಲೆಗಳು ಕಡಿಮೆಯಾದಾಗ ನೀರು ಹಿಂದೆ ಸರಿಯುತ್ತದೆ, ಅಲೆಗಳು ಹೆಚ್ಚಾದಾಗ ಮತ್ತೆ ಸಮುದ್ರ ತೀರವನ್ನು ಆವರಿಸುತ್ತದೆ. ಈ ನಿತ್ಯ ನಡೆಯುವ ಅಪರೂಪದ ದೃಶ್ಯವೇ ಚಂಡಿಪುರ ಬೀಚ್‌ಗೆ ವಿಭಿನ್ನ ಗುರುತನ್ನು ನೀಡಿದೆ.

  ಚಂಡಿಪುರ ಬೀಚ್ ಒಡಿಶಾದ ಬಾಲಸೋರ್ ಜಿಲ್ಲೆಯಲ್ಲಿದ್ದು, ಬಂಗಾಳಕೊಲ್ಲಿಯ ತೀರದ ಸಮೀಪದಲ್ಲಿದೆ. ಇಲ್ಲಿನ ರೈಲು ನಿಲ್ದಾಣ ಕಡಲತೀರದಿಂದ ಸುಮಾರು 16 ಕಿಲೋಮೀಟರ್ ದೂರದಲ್ಲಿದೆ. ಪ್ರಕೃತಿಯ ಅದ್ಭುತ ವೈಚಿತ್ರ್ಯವನ್ನು ಕಣ್ಣಾರೆ ನೋಡಬೇಕೆನ್ನುವವರಿಗೆ ಚಂಡಿಪುರ ಬೀಚ್ ಖಂಡಿತವಾಗಿಯೂ ಭೇಟಿ ನೀಡಬೇಕಾದ ಸ್ಥಳವಾಗಿದೆ.