'ಬಿಹಾರ ಚುನಾವಣೆಯಲ್ಲಿ ಎನ್‌ಡಿಎ ಗೆದ್ದಿದೆ, ಪ್ರಜಾಪ್ರಭುತ್ವ ಸೋತಿದೆ' - ತೇಜಸ್ವಿ ಯಾದವ್ ಟೀಕೆ

•   Sun, Dec 07 2025 11:28:17 AM



• ಪಟನಾ, ಡಿ. 07 (DaijiworldNews/TA): ಬಿಹಾರ ವಿಧಾನಸಭಾ ಚುನಾವಣಾ ಫಲಿತಾಂಶ ಪ್ರಕಟಗೊಂಡಿರುವ ಹಿನ್ನೆಲೆಯಲ್ಲಿ ಆರ್‌ಜೆಡಿ ನಾಯಕ ತೇಜಸ್ವಿ ಯಾದವ್ ತಮ್ಮ ಪಕ್ಷದ ಸೋಲಿನ ಬಗ್ಗೆ ಮೊದಲ ಬಾರಿಗೆ ಪ್ರತಿಕ್ರಿಯಿಸಿದ್ದಾರೆ. ಬಿಹಾರದಲ್ಲಿ ಎನ್‌ಡಿಎ ಗೆಲುವು ಸಾಧಿಸಿದರೂ, ಈ ಚುನಾವಣೆಯಲ್ಲಿ “ಜನಪ್ರಜಾಸ್ವಾಮ್ಯ ಸೋತಿದೆ, ಮಷೀನ್‌ಗಳು ಗೆದ್ದಿವೆ” ಎಂದು ಅವರು ವಾಗ್ದಾಳಿ ನಡೆಸಿದ್ದಾರೆ. ಬಿಹಾರದಲ್ಲಿ ದೀರ್ಘಕಾಲದಿಂದ ಡಬಲ್ ಎಂಜಿನ್ ಸರ್ಕಾರವಿದ್ದರೂ, ನಿರುದ್ಯೋಗ ಮತ್ತು ಅಭಿವೃದ್ಧಿ ಪ್ರಶ್ನೆಗಳು ಬಗೆಹರಿದಿಲ್ಲ ಎಂದು ತೇಜಸ್ವಿ ಆರೋಪಿಸಿದರು.

  

  ತೇಜಸ್ವಿಯವರ ಪ್ರಕಾರ, ಬಿಹಾರದಲ್ಲಿ ಒಂದು ಸಕ್ಕರೆ ಕಾರ್ಖಾನೆಯನ್ನೂ ಆರಂಭಿಸದಿರುವುದು ನಿತೀಶ್ ಕುಮಾರ್ ನೇತೃತ್ವದ ಸರ್ಕಾರದ ವಿಫಲತೆಯ ಉದಾಹರಣೆ. ಜನರು ಉದ್ಯೋಗ, ಶಿಕ್ಷಣ, ಆರೋಗ್ಯ, ನೀರಾವರಿ ಮೊದಲಾದ ಮೂಲಭೂತ ಪ್ರಶ್ನೆಗಳಿಗೆ ಉತ್ತರ ನೀಡುವ ಸರ್ಕಾರಕ್ಕಾಗಿ ಕಾಯುತ್ತಿದ್ದರು. ಆದರೆ ಚುನಾವಣಾ ವೇಳಾಪಟ್ಟಿಗೆ ಮುನ್ನವೇ ಸರ್ಕಾರ ತಮ್ಮ ಪ್ರಣಾಳಿಕೆಯಲ್ಲಿ ಉಲ್ಲೇಖಿಸಿದ್ದ ಹಲವಾರು ಯೋಜನೆಗಳನ್ನು ತ್ವರಿತವಾಗಿ ಜಾರಿಗೆ ತಂದಿದ್ದು, ಇದು ಸ್ಪಷ್ಟ ರಾಜಕೀಯ ತಂತ್ರ ಎಂದರು.

  ಪಿಂಚಣಿ ಹೆಚ್ಚಳ ಕುರಿತು ಮಾತನಾಡಿದ ತೇಜಸ್ವಿ ಯಾದವ್, “20 ವರ್ಷಗಳಿಂದ ಸರ್ಕಾರಕ್ಕೆ ಪಿಂಚಣಿ ಹೆಚ್ಚಿಸಬೇಕೆಂಬ ಯೋಚನೆ ಬಂದಿರಲಿಲ್ಲ. ಆದರೆ ಚುನಾವಣೆಯ ಅಂಗಳಕ್ಕಿಳಿದ ಕೂಡಲೇ 400 ರೂ. ಹೆಚ್ಚಳ ಮಾಡಲಾಯಿತು. ನಾವು ಅದನ್ನು ಭರವಸೆ ನೀಡಿದ್ದೇವೆ ಎಂದಾಗ, ಅದನ್ನು ಸರ್ಕಾರವೇ ನಮ್ಮ ಮುಂಚೆ ಜಾರಿಗೊಳಿಸಿದೆ,” ಎಂದು ಕಟುವಾಗಿ ಟೀಕಿಸಿದರು.

  ಕಪಿಲ್ ಸಿಬಲ್ ನಡೆಸಿದ ಸಂದರ್ಶನದಲ್ಲಿ, 2020ರಲ್ಲಿ ಆರ್‌ಜೆಡಿ 75 ಕ್ಷೇತ್ರಗಳನ್ನು ಗೆದ್ದಿದ್ದರೂ, 2025ರಲ್ಲಿ ಕೇವಲ 25ಕ್ಕೆ ಸೀಮಿತವಾದ ಕುರಿತು ಪ್ರಶ್ನಿಸಿದಾಗ, ಈ ಫಲಿತಾಂಶ ಯಾರಿಗೂ ಜೀರ್ಣವಾಗದಿರುವುದಾಗಿ ತೇಜಸ್ವಿ ಹೇಳಿದರು. “ಮತದಾನಕ್ಕೂ 10 ದಿನ ಮುಂಚೆ ವಿವಿಧ ಯೋಜನೆಗಳ ಹೆಸರಿನಲ್ಲಿ ಜನರಿಗೆ 10 ಸಾವಿರ ರೂಪಾಯಿ ವಿತರಿಸಲಾಯಿತು. ಒಟ್ಟು ಸುಮಾರು 40 ಸಾವಿರ ಕೋಟಿ ರೂಪಾಯಿಯನ್ನು ನೇರವಾಗಿ ಜನರಿಗೆ ಹಂಚಿಕೆ ಮಾಡಲಾಗಿತ್ತು. ಇದನ್ನು ನೀವು ಲಂಚ ಎಂದು ಕರೆಯಬಹುದು," ಎಂದು ಅವರು ಆರೋಪಿಸಿದರು.

  ಬಿಹಾರದ ಹಿಂದುಳಿತ ಸ್ಥಿತಿಗೆ ಕಾರಣಗಳನ್ನು ವಿವರಿಸಿದ ತೇಜಸ್ವಿ, ರಾಜ್ಯದಲ್ಲಿ ಉದ್ಯೋಗ ಸೃಷ್ಟಿಕರಣ, ಕೈಗಾರಿಕಾ ಅಭಿವೃದ್ಧಿ, ಶಿಕ್ಷಣದ ಗುಣಮಟ್ಟ ಮತ್ತು ವೈದ್ಯಕೀಯ ಮೂಲಸೌಕರ್ಯಗಳ ಕೊರತೆಗಳನ್ನು ಗಂಭೀರವಾಗಿ ಎತ್ತಿಹಿಡಿದರು. ಹೆಚ್ಚಿನ ಯುವಜನಸಂಖ್ಯೆಯನ್ನು ಹೊಂದಿದ್ದರೂ ಪ್ರಶ್ನೆಪತ್ರಿಕೆ ಸೋರಿಕೆ, ಭ್ರಷ್ಟಾಚಾರ ಮತ್ತು ಆಡಳಿತ ವೈಫಲ್ಯಗಳ ಕಾರಣದಿಂದ ಬಿಹಾರ ಹಿಂದುಳಿದಿದೆ ಎಂದು ಅವರು ಅಭಿಪ್ರಾಯಪಟ್ಟರು.

  ಬಿಜೆಪಿ–ಜೆಡಿಯು ಸರ್ಕಾರದ ವಿರುದ್ಧ ಮತ್ತಷ್ಟು ದಾಳಿ ನಡೆಸಿದ ತೇಜಸ್ವಿ ಯಾದವ್, “20 ವರ್ಷಗಳಿಂದ ನಿತೀಶ್ ಆಡಳಿತದಲ್ಲಿದ್ದಾರೆ. 10–11 ವರ್ಷಗಳಿಂದ ಮೋದಿ ಪ್ರಧಾನ ಮಂತ್ರಿ. ಇವರು ಡಬಲ್ ಎಂಜಿನ್ ಸರ್ಕಾರವೆಂದು ಹೇಳಿಕೊಳ್ಳುತ್ತಾರೆ. ಆದರೆ ಒಂದೇ ಒಂದು ಸಕ್ಕರೆ ಕಾರ್ಖಾನೆಯನ್ನು ಕೂಡ ಆರಂಭಿಸಲು ಸಾಧ್ಯವಾಗಿಲ್ಲ,” ಎಂದು ಕಿಡಿಕಾರಿದರು.

  ತೇಜಸ್ವಿ ಯಾದವ್ ಅವರ ಈ ಹೇಳಿಕೆಗಳು ಬಿಹಾರದ ರಾಜಕೀಯ ವಲಯದಲ್ಲಿ ಮತ್ತೊಂದು ಚರ್ಚೆಗೆ ಕಾರಣವಾಗಿದ್ದು, ಚುನಾವಣಾ ನಂತರದ ಕಳವಳ ಮತ್ತು ರಾಜಕೀಯ ವಾತಾವರಣ ಮತ್ತಷ್ಟು ಗಟ್ಟಿಗೊಳ್ಳುವ ಸೂಚನೆ ನೀಡಿವೆ.