ವಿಶ್ವದ ಅತಿ ಎತ್ತರದ ಪ್ರತಿಮೆ ಪ್ರಧಾನಿ ಮೋದಿಯಿಂದ ಅನಾವರಣ - ಗೋವಾ ಇನ್ನು ರಾಮಮಯ!

•   Thu, Nov 27 2025 02:41:43 PM



• ಗೋವಾ, ನ. 27 (DaijiworldNews/TA): ಅಯೋಧ್ಯೆ ಶ್ರೀರಾಮ ಮಂದಿರದ ಸ್ವರ್ಣ ಶಿಖರದ ಮೇಲೆ ಮೊನ್ನೆಯಷ್ಟೇ ಪ್ರಧಾನಿ ನರೇಂದ್ರ ಮೋದಿ ಧ್ವಜಾರೋಹಣ ನೆರವೇರಿಸಿ ರಾಮಭಕ್ತರನ್ನು ಪುಳಕಿತಗೊಳಿಸಿದ ನಡುವೆ, ಗೋವಾ ಕೂಡ ರಾಮಭಕ್ತಿಯ ವೈಭವಕ್ಕೆ ಸಜ್ಜಾಗಿದೆ. ನಾಳೆ, ನವೆಂಬರ್ 28ರಂದು, ಗೋವಾದಲ್ಲಿ ವಿಶ್ವದ ಅತ್ಯಂತ ಎತ್ತರದ ಶ್ರೀರಾಮಚಂದ್ರನ ಪ್ರತಿಮೆ ಅನಾವರಣಗೊಳ್ಳಲಿದೆ.

  

  ಈ ಪ್ರತಿಮೆ ಗೋವಾದ ಶ್ರೀ ಸಂಸ್ಥಾನ ಗೋಕರ್ಣ ಪಾರ್ಥಗಲಿ ಜೀವೋತ್ತಮ ಮಠದಲ್ಲಿ ಸ್ಥಾಪಿಸಲಾಗಿದ್ದು, ಮಠದ 550ನೇ ಸಂಸ್ಥಾಪನಾ ವಾರ್ಷಿಕೋತ್ಸವದ 11 ದಿನಗಳ ಆಚರಣೆಯ ಭಾಗವಾಗಿ ಪ್ರಧಾನಿ ಉದ್ಘಾಟಿಸಲಿದ್ದಾರೆ. ಮಠದ 550 ವರ್ಷಗಳ ಸಂಪ್ರದಾಯವನ್ನು ಗುರುತಿಸಲು ನವೆಂಬರ್ 27 ರಿಂದ ಡಿಸೆಂಬರ್ 7 ರವರೆಗೆ ವಿವಿಧ ಧಾರ್ಮಿಕ ಹಾಗೂ ಸಾಂಸ್ಕೃತಿಕ ಕಾರ್ಯಕ್ರಮಗಳು ನಡೆಯುತ್ತಿವೆ. ಮಠವು 370 ವರ್ಷಗಳ ಹಿಂದೆ ದಕ್ಷಿಣ ಗೋವಾ ಜಿಲ್ಲೆ ಕೆನಕೋನಾದ ಪಾರ್ಟಗಲ್ ಗ್ರಾಮದಲ್ಲಿ ಸ್ಥಾಪಿತವಾಗಿದೆ.

  ಶ್ರೀರಾಮಚಂದ್ರನ ಪ್ರತಿಮೆ ಕಂಚಿನ ಲೋಹದಿಂದ ವಿನ್ಯಾಸಗೊಂಡಿದ್ದು, ಗುಜರಾತ್‌ನ ಶಿಲ್ಪಿ ರಾಮ್ ಸುತಾರ್ ಈ ಪ್ರತಿಮೆಯನ್ನು ನಿರ್ಮಿಸಿದ್ದಾರೆ. ಗೋವಾದ ಈ ಪ್ರತಿಮೆಯು ‘ಕಬೋ ಡಿ ರಾಮ’ ಕೋಟೆ ಮತ್ತು ಭಗವಾನ್ ರಾಮ ಮತ್ತು ಸೀತೆಯ ವನವಾಸ ನಂಬಿಕೆಗಳಿಂದ ವಿಶೇಷ ಸಂಬಂಧ ಹೊಂದಿದೆ. ಈ ಕೋಟೆಯನ್ನು ದಕ್ಷಿಣ ಗೋವಾದ ಕರಾವಳಿ ತೀರದಲ್ಲಿ ನಿರ್ಮಿಸಲಾಯಿತು.

  ಇದೇ ರೀತಿ, ಋಷಿ ವಿಶ್ವಾಮಿತ್ರರ ವಂಶಸ್ಥರು ಗೋವಾದ ಇತಿಹಾಸದಲ್ಲಿ ಪ್ರಮುಖ ಪಾತ್ರ ವಹಿಸಿದ್ದು, ಕೌಶಿಕ ಗೋತ್ರಕ್ಕೆ ಸೇರಿದ ಕುಶಸ್ಥಲಿ ಮತ್ತು ಕೆಲೋಶಿ ಗ್ರಾಮಗಳಲ್ಲಿ ನೆಲೆಸಿದ್ದರು. ಛತ್ರಪತಿ ಶಿವಾಜಿ ಮಹಾರಾಜರ ಕೊಂಕಣ ಮರಾಠರ ಗುರುತಿನೊಂದಿಗೆ ಇವರ ವೈಭವವು ಗೋವಾದ ಧಾರ್ಮಿಕ, ಸಾಂಸ್ಕೃತಿಕ ಮತ್ತು ಆಧ್ಯಾತ್ಮಿಕ ಪರಂಪರೆಯನ್ನು ಸಂಪೂರ್ಣವಾಗಿ ಪ್ರತಿಬಿಂಬಿಸುತ್ತದೆ.