ಕಾರ್ಮಿಕ ಕಾನೂನಿನಲ್ಲಿ ಕೇಂದ್ರ ಸರ್ಕಾರದ ಮಹತ್ವದ ಬದಲಾವಣೆ!

•   Tue, Nov 25 2025 11:38:58 AM



• ನವದೆಹಲಿ, ನ. 25 (DaijiworldNews/TA): ದೇಶದ ಲಕ್ಷಾಂತರ ಕಾರ್ಮಿಕರು ಮತ್ತು ಉದ್ಯೋಗಿಗಳಿಗೆ ಸಾಮಾಜಿಕ ಭದ್ರತೆಯನ್ನು ಬಲಪಡಿಸುವ ಗುರಿಯೊಂದಿಗೆ ಕೇಂದ್ರ ಸರ್ಕಾರವು ಕಾರ್ಮಿಕ ಕಾನೂನುಗಳಲ್ಲಿ ಪ್ರಮುಖ ಬದಲಾವಣೆಗಳನ್ನು ಜಾರಿಗೆ ತಂದಿದೆ.

  

  ಹೊಸ ಕಾರ್ಮಿಕ ಸಂಹಿತೆಯಡಿ ಈಗ ಸ್ಥಿರ-ಅವಧಿಯ ಉದ್ಯೋಗಿಗಳು ಕೇವಲ ಒಂದು ವರ್ಷ ಸೇವೆ ಮಾಡಿದರೂ ಗ್ರಾಚ್ಯುಟಿಗೆ ಅರ್ಹರಾಗುತ್ತಾರೆ. ಇದುವರೆಗೆ ಸಾಮಾನ್ಯವಾಗಿ ಗ್ರಾಚ್ಯುಟಿ ಸಿಗಲು ಕನಿಷ್ಠ ಐದು ವರ್ಷಗಳ ನಿರಂತರ ಸೇವೆ ಅವಶ್ಯವಾಗಿತ್ತು. ಸರ್ಕಾರದ ಈ ನಿರ್ಧಾರವು ಒಪ್ಪಂದ ಆಧಾರಿತ ಕೆಲಸಗಳಲ್ಲಿ ತೊಡಗಿರುವ ಲಕ್ಷಾಂತರ ಉದ್ಯೋಗಿಗಳಿಗೆ ಬೃಹತ್ ರೀತಿಯಲ್ಲಿ ಸಹಾಯವಾಗಲಿದೆ ಎಂದು ಸಚಿವಾಲಯ ತಿಳಿಸಿದೆ.

  ಕೇಂದ್ರ ಕಾರ್ಮಿಕ ಸಚಿವ ಮನ್ಸುಖ್ ಮಾಂಡವಿಯಾ ಅವರು ಹೊಸ ನಿಯಮಗಳನ್ನು ಪ್ರಕಟಿಸಿದ್ದು, ಇದು ಕಾರ್ಮಿಕರ ಆರ್ಥಿಕ ಭದ್ರತೆಯನ್ನು ಹೆಚ್ಚಿಸುವ ಮಹತ್ವದ ಹೆಜ್ಜೆಯಾಗಲಿದೆ ಎಂದು ಹೇಳಿದರು. ದುಡಿಯುವ ಅವಧಿ ಕೇವಲ ಒಂದು ವರ್ಷವಾಗಿದ್ದರೂ, ಆ ಉದ್ಯೋಗಿಗೆ ಗ್ರಾಚ್ಯುಟಿ ಪಡೆಯುವ ಹಕ್ಕು ಇರುತ್ತದೆ ಎಂಬುದು ಈ ಹೊಸ ನಿಯಮದ ಪ್ರಮುಖ ಅಂಶವಾಗಿದೆ. ಹಳೆಯ ವ್ಯವಸ್ಥೆಯಲ್ಲಿ ಐದು ವರ್ಷದ ಅವಧಿ ಕಡ್ಡಾಯವಾಗಿದ್ದ ಕಾರಣ ಅನೇಕ ಒಪ್ಪಂದದ ಉದ್ಯೋಗಿಗಳು ಈ ಹಕ್ಕಿನಿಂದ ವಂಚಿತರಾಗಿದ್ದರು. ಹೊಸ ಸಂಹಿತೆಯೊಂದಿಗೆ ಆ ಅಂತರವನ್ನು ಸರ್ಕಾರ ನೀಗಿಸಿದೆ.

  ಗ್ರಾಚ್ಯುಟಿ ಎಂದರೆ ಉದ್ಯೋಗಿಯ ಸೇವೆಗೆ ಸಂಸ್ಥೆ ನೀಡುವ ಹಣಕಾಸು ಗೌರವ. 1972ರಲ್ಲಿ ಜಾರಿಯಾದ ಗ್ರಾಚ್ಯುಟಿ ಕಾಯ್ದೆಯಡಿ ನಿವೃತ್ತಿ, ರಾಜೀನಾಮೆ ಅಥವಾ ದೀರ್ಘ ಸೇವೆ ಬಳಿಕ ಆರ್ಥಿಕ ನೆರವಿನ ರೂಪದಲ್ಲಿ ನೀಡಲಾಗುತ್ತಿತ್ತು. ಉದ್ಯೋಗಿಯು ಒಂದು ವರ್ಷದೊಳಗೆ ಮರಣ ಹೊಂದಿದರೆ ಅಥವಾ ಶಾರೀರಿಕ ಅಂಗವೈಕಲ್ಯ ಉಂಟಾದರೆ ಮಾತ್ರ ಕುಟುಂಬಕ್ಕೆ ಗ್ರಾಚ್ಯುಟಿ ಲಭ್ಯವಾಗುವ ವಿನಾಯಿತಿ ಇದ್ದರೂ, ಸಾಮಾನ್ಯ ಸ್ಥಿತಿಯಲ್ಲಿ ಐದು ವರ್ಷದ ಸೇವೆ ನಿಯಮ ಕಡ್ಡಾಯವಾಗಿತ್ತು. ಆದರೆ ಹೊಸ ಕಾರ್ಮಿಕ ಸಂಹಿತೆ ಆ ನಿಯಮವನ್ನು ಬದಲಿಸಿ, ಸಾಮಾನ್ಯ ಉದ್ಯೋಗಿಗಳಿಗೂ ಒಂದೇ ವರ್ಷ ಸೇವೆಗೆ ಗ್ರಾಚ್ಯುಟಿ ಹಕ್ಕು ಕಲ್ಪಿಸಿದೆ.

  ಈ ಬದಲಾವಣೆ ಕಾರ್ಮಿಕ ಸ್ನೇಹಿ ನೀತಿ ಎಂದು ಸರ್ಕಾರ ತಿಳಿಸಿದ್ದು, ಹಲವು ಉದ್ಯೋಗಿಗಳಿಗೆ ದೀರ್ಘಾವಧಿ ಆರ್ಥಿಕ ಭದ್ರತೆಯ ಭರವಸೆಯನ್ನು ನೀಡಲಿದೆಯೆಂದು ಅಭಿಪ್ರಾಯಿಸಲಾಗಿದೆ. ಕಂಪನಿಗಳು ಹೆಚ್ಚುವರಿ ಹಣಕಾಸು ಹೊಣೆ ಹೊರುವ ಅಗತ್ಯ ಬಂದರೂ, ಇದರಿಂದ ಉದ್ಯೋಗಿಗಳ ಮೇಲಿನ ನಂಬಿಕೆ ಮತ್ತು ಉದ್ಯೋಗದ ಭದ್ರತೆ ಹೆಚ್ಚಲು ಸಾಧ್ಯವಿದೆ ಎಂದು ತಜ್ಞರು ಹೇಳಿದ್ದಾರೆ. ಹೊಸ ನಿಯಮಗಳ ಅನುಷ್ಠಾನಕ್ಕೆ ಸಂಬಂಧಿಸಿದ ಮಾರ್ಗಸೂಚಿಗಳನ್ನು ರಾಜ್ಯ ಕಾರ್ಮಿಕ ಇಲಾಖೆಗಳಿಗೆ ಶೀಘ್ರದಲ್ಲೇ ಕಳುಹಿಸುವ ಸಾಧ್ಯತೆ ಇದೆ.