ಹಿಂದುಜಾ ಗ್ರೂಪ್‌ನ ಅಧ್ಯಕ್ಷ ಗೋಪಿಚಂದ್ ಹಿಂದುಜಾ ವಿಧಿವಶ

•   Tue, Nov 04 2025 07:24:47 PM



• ನವದೆಹಲಿ, ನ. 04 (DaijiworldNews/AA): ಕೆಲ ವಾರಗಳಿಂದ ಅನಾರೋಗ್ಯದಿಂದ ಬಳಲುತ್ತಿದ್ದ ಹಲವಾರು ಕಂಪನಿಗಳ ಸಮೂಹವಾದ ಹಿಂದುಜಾ ಗ್ರೂಪ್‌ನ ಛೇರ್ಮನ್ ಆಗಿದ್ದ ಗೋಪಿಚಂದ್ ಹಿಂದುಜಾ(85) ಅವರು ಲಂಡನ್ ಆಸ್ಪತ್ರೆಯಲ್ಲಿ ಕೊನೆಯುಸಿರೆಳೆದಿದ್ದಾರೆ.

  ಗೋಪಿಚಂದ್ ಹಿಂದುಜಾ ಅವರು ನಾಲ್ವರು ಹಿಂದುಜಾ ಸಹೋದರರಲ್ಲಿ ಎರಡನೆಯವರು. ಹಿರಿಯರಾದ ಶ್ರೀಚಂದ್ ಹಿಂದುಜಾ 2023 ರಲ್ಲಿ ಮೃತಪಟ್ಟಿದ್ದರು. ಇದೀಗ ಗೋಪಿಚಂದ್ ಹಿಂದುಜಾ ಅವರು ಪತ್ನಿ ಸುನೀತಾ, ಮೂವರು ಮಕ್ಕಳು ಹಾಗೂ ಇನ್ನಿಬ್ಬರು ಸಹೋದರರಾದ ಪ್ರಕಾಶ್ ಹಿಂದುಜಾ ಮತ್ತು ಅಶೋಕ್ ಹಿಂದುಜಾ ಅವರನ್ನು ಅಗಲಿದ್ದಾರೆ.

  ಹಿಂದುಜಾ ಗ್ರೂಪ್‌ನ ಮೂಲ ಸಂಸ್ಥಾಪಕರಾಗಿದ್ದ ಪರಮಾನಂದ್ ದೀಪ್‌ಚಂದ್ ಹಿಂದುಜಾ ಅವರ ಎರಡನೇ ಮಗನಾದ ಗೋಪಿಚಂದ್ ಹಿಂದುಜಾ ಅವರು 1950 ರಲ್ಲಿ ಕುಟುಂಬ ವ್ಯವಹಾರಕ್ಕೆ ಸೇರಿದರು. ಇಂಡೋ-ಮಧ್ಯಪ್ರಾಚ್ಯ ವ್ಯಾಪಾರ ಕಾರ್ಯಾಚರಣೆಯಿಂದ ಕಂಪನಿಯನ್ನು ಅಂತರರಾಷ್ಟ್ರೀಯ ಸಂಸ್ಥೆಯಾಗಿ ಪರಿವರ್ತಿಸಿ ಅವರು ವ್ಯಾಪಾರ ವಲಯದಲ್ಲಿ 'ಜಿಪಿ' ಎಂದು ಖ್ಯಾತಿ ಪಡೆದರು.

  ಬಾಂಬೆ ಜೈ ಹಿಂದ್ ಕಾಲೇಜಿನಿಂದ ಪದವಿ ಪಡೆದ ಗೋಪಿಚಂದ್, ವೆಸ್ಟ್ಮಿನಿಸ್ಟರ್ ವಿಶ್ವವಿದ್ಯಾಲಯ ಮತ್ತು ರಿಚ್ಮಂಡ್ ಕಾಲೇಜಿನಿಂದ ಗೌರವ ಡಾಕ್ಟರೇಟ್ ಪದವಿಗಳನ್ನು ಪಡೆದಿದ್ದಾರೆ. ಹಿಂದುಜಾ ಗ್ರೂಪ್ ಆಟೋಮೋಟಿವ್, ಬ್ಯಾಂಕಿಂಗ್ ಮತ್ತು ಹಣಕಾಸು, ಐಟಿ, ಆರೋಗ್ಯ ರಕ್ಷಣೆ, ರಿಯಲ್ ಎಸ್ಟೇಟ್, ವಿದ್ಯುತ್, ಮಾಧ್ಯಮ ಮತ್ತು ಮನರಂಜನೆ ಸೇರಿದಂತೆ ಹನ್ನೊಂದು ವಲಯಗಳಲ್ಲಿ ವ್ಯವಹಾರಗಳನ್ನು ಹೊಂದಿದೆ. ಅದರ ಕೆಲವು ಪ್ರಸಿದ್ಧ ಬ್ರ‍್ಯಾಂಡ್‌ಗಳಲ್ಲಿ ಅಶೋಕ್ ಲೇಲ್ಯಾಂಡ್, ಇಂಡಸ್ಇಂಡ್ ಬ್ಯಾಂಕ್ ಮತ್ತು NXTDIGITAL ಲಿಮಿಟೆಡ್ ಸೇರಿವೆ.