ಕುಂದಾಪ್ರ ಕನ್ನಡ ಹಬ್ಬ: 'ಕುಂದಾಪುರವನ್ನು ಪ್ರವಾಸಿ ಕೇಂದ್ರವಾಗಿಸಲು ಆದ್ಯತೆ'- ಡಿಸಿಎಂ ಡಿಕೆ ಶಿವಕುಮಾರ್

•   Mon, Jul 28 2025 10:13:26 AM



• ಬೆಂಗಳೂರು, ಜು. 28 (DaijiworldNews/AA): "ಕುಂದಾಪುರವನ್ನು ಪ್ರಮುಖ ಪ್ರವಾಸಿ ತಾಣವಾಗಿ ಅಭಿವೃದ್ಧಿಪಡಿಸಲು ಸರ್ಕಾರವು ಮೊದಲು ಆದ್ಯತೆ ನೀಡಲಿದೆ. ನಂತರವಷ್ಟೇ ಈ ಪ್ರದೇಶದಲ್ಲಿ ವಿಮಾನ ನಿಲ್ದಾಣದ ಪ್ರಸ್ತಾವನೆಯನ್ನು ಪರಿಗಣಿಸಲಾಗುವುದು ಎಂದು ಡಿಸಿಎಂ ಡಿ.ಕೆ. ಶಿವಕುಮಾರ್ ತಿಳಿಸಿದ್ದಾರೆ.

  

  ಬೆಂಗಳೂರಿನಲ್ಲಿ ನಡೆದ ಕುಂದಾಪ್ರ ಕನ್ನಡ ಹಬ್ಬ- 2025ರ ಸಮಾರೋಪ ಸಮಾರಂಭದಲ್ಲಿ "ಸುಸಜ್ಜಿತ ಕುಂದಾಪುರ ಭವನ (ಸಾಂಸ್ಕೃತಿಕ ಕೇಂದ್ರ), ಕುಂದಾಪುರದಲ್ಲಿ ವೈದ್ಯಕೀಯ ಕಾಲೇಜು ಮತ್ತು ಸಮೀಪದ ಬೈಂದೂರಿನಲ್ಲಿ ವಿಮಾನ ನಿಲ್ದಾಣ ಸ್ಥಾಪಿಸುವಂತೆ ಸರ್ಕಾರಕ್ಕೆ ಮನವಿ ಸಲ್ಲಿಸಿದ್ದ ಕುಂದಾಪುರ ಕನ್ನಡ ಪ್ರತಿಷ್ಠಾನದ ಜ್ಞಾಪಕ ಪತ್ರಕ್ಕೆ ಪ್ರತಿಕ್ರಿಯಿಸಿದ ಅವರು, "340 ಕಿ.ಮೀ. ಉದ್ದದ ಕರಾವಳಿ ತೀರಕ್ಕೆ ಮೀಸಲಾದ ಪ್ರವಾಸೋದ್ಯಮ ನೀತಿಯನ್ನು ರೂಪಿಸಲು ಸರ್ಕಾರ ಚಿಂತನೆ ನಡೆಸುತ್ತಿದೆ. ಮೊದಲು ಅದನ್ನು ಜಾರಿಗೆ ತರೋಣ, ಆಮೇಲೆ ವಿಮಾನ ನಿಲ್ದಾಣದ ಬಗ್ಗೆ ಯೋಚಿಸೋಣ. ಎಲ್ಲಕ್ಕಿಂತ ಮೊದಲು ಕುಂದಾಪುರವನ್ನು ಪ್ರಮುಖ ಪ್ರವಾಸಿ ಕೇಂದ್ರವಾಗಿ ಅಭಿವೃದ್ಧಿಪಡಿಸಲಾಗುವುದು" ಎಂದರು.

  "ಇಷ್ಟು ದೊಡ್ಡ ಜನಸಮೂಹವನ್ನು ಒಟ್ಟುಗೂಡಿಸಿ, ಈ ಪ್ರದೇಶವು ಕರ್ನಾಟಕದ ಹೃದಯದಲ್ಲಿದೆ ಎಂದು ನೀವು ತೋರಿಸಿದ್ದೀರಿ. ಇದು ದಕ್ಷಿಣ ಕನ್ನಡ, ಉಡುಪಿ ಮತ್ತು ಸುತ್ತಮುತ್ತಲಿನ ಜನರಿಗೆ ನಿಜಕ್ಕೂ ಕೇಂದ್ರಬಿಂದುವಾಗಿದೆ. ಹೊರಗಿನವರು ಪರಕೀಯರಂತೆ ಭಾವಿಸುವ ಅಗತ್ಯವಿಲ್ಲ. ನಾನು ಉಡುಪಿ ಮತ್ತು ಕುಂದಾಪುರದ ಜನರೊಂದಿಗೆ ನನ್ನ ಒಗ್ಗಟ್ಟನ್ನು ವ್ಯಕ್ತಪಡಿಸಲು ಬಂದಿದ್ದೇನೆ" ಎಂದು ಶ್ಲಾಘಿಸಿದರು.

  ಈ ಸಂದರ್ಭದಲ್ಲಿ ಖ್ಯಾತ ಚಲನಚಿತ್ರ ನಿರ್ದೇಶಕ ಯೋಗರಾಜ್ ಭಟ್ ಅವರಿಗೆ ಉಪಮುಖ್ಯಮಂತ್ರಿಗಳ ಸಮ್ಮುಖದಲ್ಲಿ ಪ್ರತಿಷ್ಠಿತ "ಊರ ಗೌರವ" ಪ್ರಶಸ್ತಿ ನೀಡಿ ಗೌರವಿಸಲಾಯಿತು. ಪ್ರಶಸ್ತಿ ಸ್ವೀಕರಿಸಿ ಮಾತನಾಡಿದ ಯೋಗರಾಜ್ ಭಟ್ ಅವರು, "ನಾನು ಧಾರವಾಡದಲ್ಲಿ ಬೆಳೆದಿದ್ದರೂ, ಕುಂದಾಪುರದ ತಂತ್ರಾಡಿಯಲ್ಲಿ ಜನಿಸಿದ್ದೇನೆ. ನಮ್ಮ ಮನೆಯಲ್ಲಿ ಕುಂದಾಪುರ ಸಂಸ್ಕೃತಿಯ ಸಾರವಿತ್ತು. ಭಾಷೆಯು ನಮ್ಮ ಅಸ್ಮಿತೆಯನ್ನು ರೂಪಿಸಿತು, ನಮ್ಮ ಜೀವನೋಪಾಯವನ್ನೂ ಪೋಷಿಸಿತು. ನಮ್ಮ ಭಾಷೆಯ ಬಗ್ಗೆ ನನಗೆ ಅಪಾರ ಪ್ರೀತಿ ಇದೆ. ಎಷ್ಟೇ ಬಾರಿ ಬಂದರೂ, ನಮ್ಮ ಭಾಷೆಯನ್ನು ಹೃದಯದಿಂದ ಮಾತನಾಡುತ್ತಾ ಮತ್ತು ಪೋಷಿಸುತ್ತಾ ಇರಿ" ಎಂದು ಭಾವುಕರಾದರು.

  ಎರಡು ದಿನಗಳ ಈ ಸಾಂಸ್ಕೃತಿಕ ಉತ್ಸವದಲ್ಲಿ ಅಟ್ಟಣಿಗೆ ಯಕ್ಷಗಾನ, ಆಳ್ವಾಸ್ ಕಲಾ ವೈಭವ, ನಂದಗೋಕುಲ ತಂಡದಿಂದ ಬಾರ್ಕೂರು ಹಡಗು ನೃತ್ಯರೂಪಕ, "ಬಿಡಿ ಪಟಾಕಿ"ಯಲ್ಲಿ ಪ್ರದರ್ಶಿಸಲಾದ ಬಾಲ್ಯದ ಆಟಗಳು, ಪ್ಯಾಷನ್ ಶೋ, ಹಂದಾಡಿ ಕ್ವಿಜ್, ಆಹಾರ ಮತ್ತು ಪುಸ್ತಕ ಮೇಳಗಳು, ಹಾಗೂ ಕರಾವಳಿ ಸಂಸ್ಕೃತಿಯನ್ನು ಆಚರಿಸುವ ಹಲವು ರೋಮಾಂಚಕ ಚಟುವಟಿಕೆಗಳು ಸೇರಿದಂತೆ ವೈವಿಧ್ಯಮಯ ಕಾರ್ಯಕ್ರಮಗಳು ನಡೆದವು.

  ನಟಿ ರಕ್ಷಿತಾ ಪ್ರೇಮ್, ಉದ್ಯಮಿ ಕೆ. ಪ್ರಕಾಶ್ ಶೆಟ್ಟಿ, ಬರಹಗಾರ-ಪತ್ರಕರ್ತ ಜೋಗಿ, ಯುನಿವರ್ಸಲ್ ಗ್ರೂಪ್ ಆಫ್ ಇನ್‌ಸ್ಟಿಟ್ಯೂಟ್ಸ್‌ನ ಉಪೇಂದ್ರ ಶೆಟ್ಟಿ, ನಟರಾದ ಶೈನ್ ಶೆಟ್ಟಿ ಮತ್ತು ಪ್ರವೀಣ್ ಶೆಟ್ಟಿ, ಲೈಫ್‌ಲೈನ್ ಟೆಂಡರ್ ಚಿಕನ್ ಎಂ.ಡಿ ಕಿಶೋರ್ ಹೆಗ್ಡೆ, ವಿಎಲ್ ಗ್ರೂಪ್ ಎಂ.ಡಿ ಅಂಜಲಿ ವಿಜಯ್, ಎಎಸ್ ಗ್ರೂಪ್ಸ್ ಎಂ.ಡಿ ಸತೀಶ್ ಶೆಟ್ಟಿ, ಮತ್ತು ಕುಂದಾಪುರ ಕನ್ನಡ ಪ್ರತಿಷ್ಠಾನದ ಗೌರವಾಧ್ಯಕ್ಷ ಉದಯ ಹೆಗ್ಡೆ, ಅಧ್ಯಕ್ಷ ಡಾ. ದೀಪಕ್ ಶೆಟ್ಟಿ ಬಾರ್ಕೂರು, ಉಪಾಧ್ಯಕ್ಷ ನರಸಿಂಹ ಬೀಜಾಡಿ, ಕಾರ್ಯದರ್ಶಿ ರಾಘವೇಂದ್ರ ಕಾಂಚನ್, ಜಂಟಿ ಕಾರ್ಯದರ್ಶಿ ಅಜಿತ್ ಶೆಟ್ಟಿ ಉಳ್ತೂರು, ಮತ್ತು ಖಜಾಂಚಿ ವಿಜಯ್ ಶೆಟ್ಟಿ ಹಲಾಡಿ ಸೇರಿದಂತೆ ಪ್ರಮುಖ ಸದಸ್ಯರು ಉಪಸ್ಥಿತರಿದ್ದರು.