4ನೇ ಪ್ರಯತ್ನದಲ್ಲಿ ಯುಪಿಎಸ್‌ಸಿ ಬರೆದು 13ನೇ ರ‍್ಯಾಂಕ್ ಪಡೆದ ಬಿಹಾರದ ಹೇಮಂತ್ ಮಿಶ್ರಾ

•   Fri, Jun 06 2025 08:35:01 AM



• ನವದೆಹಲಿ, ಜೂ. 06 (DaijiworldNews/AK): ಸೋಲಿನಿಂದ ಹತಾಶರಾಗದೆ, ದೃಢವಾಗಿ ಪ್ರಯತ್ನಿಸಿದರೆ ಯಾವುದೇ ಗುರಿ ಸಾಧಿಸಬಹುದು ಎಂಬುದಕ್ಕೆ ಬಿಹಾರದ ಎಸ್‌ಡಿಎಂ ಹೇಮಂತ್ ಮಿಶ್ರಾ ಅವರ ಯಶಸ್ಸಿನ ಕತೆ ಒಂದು ಉದಾಹರಣೆಯಾಗಿದೆ. ಹೇಮಂತ್ ಮಿಶ್ರಾ ಐಎಎಸ್ ಅಧಿಕಾರಿಯಾಗಲಿದ್ದಾರೆ, 13 ನೇ ರ‍್ಯಾಂಕ್ ಪಡೆಯುವ ಮೂಲಕ ಈ ಯಶಸ್ಸನ್ನು ಸಾಧಿಸಿದ್ದಾರೆ. ಅವರ ಸ್ಪೂರ್ತಿದಾಯಕ ಕಥೆ ಇಲ್ಲಿದೆ.

  ಬಿಹಾರದ ಹೇಮಂತ್ ಮಿಶ್ರಾ ಈ ಪರೀಕ್ಷೆಯಲ್ಲಿ 13 ನೇ ರ್‍ಯಾಂಕ್‌ ಗಳಿಸಿದ್ದಾರೆ. ಹೇಮಂತ್ ಅವರನ್ನು ಈಗಾಗಲೇ SDM ಹುದ್ದೆಗೆ ನೇಮಿಸಲಾಗಿದೆ. ರಾಜ್‌ಪುರದ ಕುಸುರ್ಪಾ ಗ್ರಾಮದ ನಿವಾಸಿ ಹೇಮಂತ್ ಮಿಶ್ರಾ ಪ್ರಸ್ತುತ ಮಿರ್ಜಾಪುರ SDS ಆಗಿ ಕಾರ್ಯನಿರ್ವಹಿಸುತ್ತಿದ್ದಾರೆ. 

  ಹೇಮಂತ್ ಅವರ ತಂದೆ ಓಂಪ್ರಕಾಶ್ ಮಿಶ್ರಾ ಕೈಮೂರ್‌ನಲ್ಲಿ ಶಿಕ್ಷಣ ಇಲಾಖೆಯಲ್ಲಿ ಎಪಿಒ ಆಗಿದ್ದಾರೆ. ತಾಯಿ ನಮ್ರತಾ ಮಿಶ್ರಾ ಖಾಸಗಿ ಶಾಲೆಯ ಶಿಕ್ಷಕಿ. ಹೇಮಂತ್ 2022 ರಲ್ಲಿ ತಮ್ಮ ಮೊದಲ ಪ್ರಯತ್ನದಲ್ಲೇ ಯುಪಿ ಪಿಸಿಎಸ್ ಪರೀಕ್ಷೆಯಲ್ಲಿ 8 ನೇ ರ್‍ಯಾಂಕ್‌ ಜೊತೆಗೆ ಉತ್ತೀರ್ಣರಾದರು. ಆದರೆ ಇದರ ನಂತರವೂ ಅವರು ಯುಪಿಎಸ್‌ಸಿಗೆ ಅಧ್ಯಯನ ಮಾಡುವುದನ್ನು ಮುಂದುವರೆಸಿದರು ಮತ್ತು ಕೆಲಸದ ಜೊತೆಗೆ ಪರೀಕ್ಷೆಗೆ ತಯಾರಿ ನಡೆಸುತ್ತಿದ್ದರು.

  ಆದರೆ, 2021, 2022, ಮತ್ತು 2023ರಲ್ಲಿ ಸತತ ಮೂರು ಪ್ರಯತ್ನಗಳಲ್ಲಿ ವಿಫಲರಾದರು. 2022 ಮತ್ತು 2023ರಲ್ಲಿ ಪ್ರಾಥಮಿಕ ಪರೀಕ್ಷೆಯಲ್ಲೇ ಉತ್ತೀರ್ಣರಾಗಲಿಲ್ಲ. ಆದರೆ, 2024ರ ನಾಲ್ಕನೇ ಪ್ರಯತ್ನದಲ್ಲಿ 13ನೇ AIR ಗಳಿಸಿ ಐಎಎಸ್‌ ಅಧಿಕಾರಿಯಾಗುವ ಹಾದಿಯಲ್ಲಿದ್ದಾರೆ.

  ಹೇಮಂತ್ ತಮ್ಮ ಆರಂಭಿಕ ಶಿಕ್ಷಣವನ್ನು ಬಕ್ಸಾರ್‌ನ ಖಾಸಗಿ ಶಾಲೆಯಲ್ಲಿ ಪಡೆದರು. ಅವರು ಡಿಎವಿ ಪಾಟ್ನಾದಲ್ಲಿ ಮಧ್ಯಂತರ ಶಿಕ್ಷಣ ಪಡೆದರು. ಜಾಮಿಯಾ ಮಿಲಿಯಾ ಇಸ್ಲಾಮಿಯಾ ವಿಶ್ವವಿದ್ಯಾಲಯದಿಂದ ಪದವಿ ಪಡೆದ ನಂತರ, ಅವರು ಜೆಎನ್‌ಯುನಲ್ಲಿ ಸ್ನಾತಕೋತ್ತರ ಪದವಿ ಪಡೆದರು.