ಬಿಜೆಪಿ ಸ್ಥಳೀಯ ನಾಯಕನ ಕಚೇರಿ ಧ್ವಂಸ, ವ್ಯಕ್ತಿ ಮೇಲೆ ಹಲ್ಲೆ - ಪ್ರಕರಣ ದಾಖಲು

•   Sun, Apr 06 2025 06:23:15 PM



• ಥಾಣೆ, ಏ.06(DaijiworldNews/TA): ಜಿಲ್ಲೆಯಲ್ಲಿ ಭಾರತೀಯ ಜನತಾ ಪಕ್ಷದ (ಬಿಜೆಪಿ) ಸ್ಥಳೀಯ ನಾಯಕನ ಕಚೇರಿಯನ್ನು ಜನರ ಗುಂಪೊಂದು ಧ್ವಂಸಗೊಳಿಸಿ ವ್ಯಕ್ತಿಯೊಬ್ಬರ ಮೇಲೆ ಹಲ್ಲೆ ನಡೆಸಿದ ಘಟನೆ ನಡೆದಿದೆ.

  

  ಶನಿವಾರ ರಾತ್ರಿ ಅಂಬರ್ನಾಥ್ (ಪೂರ್ವ) ಪ್ರದೇಶದಲ್ಲಿರುವ ಮಾಜಿ ಬಿಜೆಪಿ ಕಾರ್ಪೊರೇಟರ್ ರಾಜು ಮಹಾದಿಕ್ ಅವರ ಕಚೇರಿಯ ಮೇಲೆ ದಾಳಿ ನಡೆದಿದೆ ಎಂದು ಅಧಿಕಾರಿಯೊಬ್ಬರು ತಿಳಿಸಿದ್ದಾರೆ. ಅಶುತೋಷ್ ಕರಾಲೆ ಅಲಿಯಾಸ್ ಡಾಕ್ಯಾ (23) ಮತ್ತು ಗಾನಿ ರಫೀಕ್ ಶೇಖ್ (25) ನೇತೃತ್ವದಲ್ಲಿ 10 ರಿಂದ 12 ಜನರ ಗುಂಪು ರಾತ್ರಿ 10.40 ರ ಸುಮಾರಿಗೆ ಮಾರಕಾಸ್ತ್ರ ಹಿಡಿದು ಬಲವಂತವಾಗಿ ಕಚೇರಿಗೆ ಪ್ರವೇಶಿಸಿ ದಾಳಿ ನಡೆಸಿದೆ.

  ಕಚೇರಿ ಆವರಣವನ್ನು ಧ್ವಂಸ ಮಾಡಿ ಕಚೇರಿಯಲ್ಲಿ ಕೆಲಸ ಮಾಡುವ ಕೃಷ್ಣ ಗುಪ್ತಾ (22) ಅವರ ಮೇಲೆ ಹಲ್ಲೆ ನಡೆಸಿದ್ದಾರೆ ಎಂದು ಆರೋಪಿಸಲಾಗಿದೆ. ದಾಳಿಯ ದೃಶ್ಯಗಳು ಸಿಸಿಟಿವಿ ಕ್ಯಾಮೆರಾಗಳಲ್ಲಿ ಸೆರೆಯಾಗಿವೆ. ಗುಪ್ತಾ ಅವರ ದೂರಿನ ಆಧಾರದ ಮೇಲೆ, ಭಾರತೀಯ ನ್ಯಾಯ ಸಂಹಿತಾದ ಸಂಬಂಧಿತ ನಿಬಂಧನೆಗಳ ಅಡಿಯಲ್ಲಿ ಪ್ರಕರಣ ದಾಖಲಿಸಲಾಗಿದೆ ಮತ್ತು ದಾಳಿಕೋರರನ್ನು ಗುರುತಿಸಲಾಗಿದೆ ಎಂದು ಶಿವಾಜಿನಗರ ಪೊಲೀಸ್ ಠಾಣೆಯ ಹಿರಿಯ ಇನ್ಸ್‌ಪೆಕ್ಟರ್ ರಮೇಶ್ ಪಾಟೀಲ್ ತಿಳಿಸಿದ್ದಾರೆ.

  "ಈ ದಾಳಿಯ ಹಿಂದಿನ ಉದ್ದೇಶ ಬಿಜೆಪಿ ನಾಯಕ ಮತ್ತು ಆರೋಪಿಗಳ ನಡುವಿನ ದೀರ್ಘಕಾಲದ ವೈಯಕ್ತಿಕ ವಿವಾದದಂತೆ ಕಾಣುತ್ತದೆ" ಎಂದು ಅವರು ಹೇಳಿದರು. ತನಿಖೆ ನಡೆಯುತ್ತಿದೆ ಮತ್ತು ಪರಾರಿಯಾಗಿರುವ ಆರೋಪಿಗಳನ್ನು ಬಂಧಿಸಲು ತಂಡಗಳನ್ನು ರಚಿಸಲಾಗಿದೆ ಎಂದು ಅವರು ಹೇಳಿಕೆ ನೀಡಿದ್ದಾರೆ.