ಕುಂದಾಪುರ , ನ.21 (DaijiworldNews/TA): ಹಕ್ಕುಪತ್ರ ಪಡೆಯಲು ವಿಧಿಸಲಾಗುತ್ತಿರುವ ಶುಲ್ಕದ ದಿಢೀರ್ ಏರಿಕೆ ಹಾಗೂ CRZ ನಿಯಮ ಉಲ್ಲಂಘಿಸಿ ನಿರ್ಮಿಸಲಾಗಿರುವ ಅನಧಿಕೃತ ಕಟ್ಟಡದಲ್ಲಿ ಹೋಂ ಸ್ಟೇ ನಡೆಸುತ್ತಿರುವುದನ್ನು ಖಂಡಿಸಿ ಬ್ರಹ್ಮಾವರದ ಕೋಡಿ ಗ್ರಾಮ ಪಂಚಾಯಿತಿ ಎದುರು ಗ್ರಾಮಸ್ಥರು ಶಾಂತಿಯುತ ಪ್ರತಿಭಟನೆ ನಡೆಸಿದರು.


ಸರ್ಕಾರದ ಆದೇಶದಂತೆ ಈ ಹಿಂದೆ ಹಕ್ಕುಪತ್ರ ಪಡೆಯಲು 5,000 ರೂ. ಶುಲ್ಕ ನಿಗದಿಯಾಗಿತ್ತು. ಆದರೆ ಈಗ ಅದನ್ನು ಏಕಾಏಕಿ 9,500 ರೂ.ಗಳಿಗೆ ಏರಿಸಲಾಗಿದೆ. ಪ್ರಜಾ ಸೇವಾ ಕಾರ್ಯಕ್ರಮದಲ್ಲಿ ಈ ಬಗ್ಗೆ ಪ್ರಶ್ನಿಸಿದಾಗ ಅಧಿಕಾರಿಗಳು ಜಾಗದ ಮೌಲ್ಯಮಾಪನ ಹೆಚ್ಚಾಗಿದೆ ಎಂದು ಉತ್ತರ ನೀಡಿದ್ದಾರೆ. ಆದರೆ, ಇದೇ ಜಿಲ್ಲೆಯ ಕೊಡೂರು ಗ್ರಾಮದಲ್ಲಿ ಇಂದಿಗೂ 500 ರೂ. ಶುಲ್ಕವಿದೆ. ಬಡವರು ಮತ್ತು ಮೀನುಗಾರರು ದುಬಾರಿ ಶುಲ್ಕ ಭರಿಸುವುದು ಹೇಗೆ? ಎಂದು ಪ್ರತಿಭಟನಾಕಾರರು ಆಕ್ರೋಶ ವ್ಯಕ್ತಪಡಿಸಿದರು.
ಹಕ್ಕುಪತ್ರ ನೀಡಲಾದ ಜಾಗದಲ್ಲಿ ಕೊಕೊ ಬೇ ಎಂಬ ಹೋಂ ಸ್ಟೇಯನ್ನು ನಿಯಮಬಾಹಿರವಾಗಿ ನಡೆಸಲಾಗುತ್ತಿದೆ ಎಂದು ಗ್ರಾಮಸ್ಥರು ಗಂಭೀರ ಆರೋಪ ಮಾಡಿದ್ದಾರೆ. ಕಟ್ಟಡ ಪರವಾನಗಿ ಮತ್ತು ಸಿಆರ್ಝಡ್ ಅನುಮತಿ ಇಲ್ಲದಿದ್ದರೂ, ಕೇವಲ ಪಂಚಾಯಿತಿಯ ನಿರಾಕ್ಷೇಪಣಾ ಪತ್ರ ಪಡೆದು ಪ್ರವಾಸೋದ್ಯಮ ಇಲಾಖೆಯಿಂದ ನೋಂದಣಿ ಮಾಡಿಕೊಳ್ಳಲಾಗಿದೆ. ಕಟ್ಟಡ ಪರವಾನಗಿ ಇಲ್ಲದ ಕಾರಣ ಪಂಚಾಯಿತಿಯಿಂದ ನೋಟಿಸ್ ನೀಡಿದ್ದರೂ, ಅದನ್ನು ಲೆಕ್ಕಿಸದೆ ರಾಜಾರೋಷವಾಗಿ ಹೋಂ ಸ್ಟೇ ನಡೆಸಲಾಗುತ್ತಿದೆ. ಈ ಅನಧಿಕೃತ ಕಟ್ಟಡಕ್ಕೆ ಸಂಬಂಧಿಸಿದಂತೆ 2025ರ ಮೇ ತಿಂಗಳಲ್ಲಿ ಸುಪ್ರೀಂ ಕೋರ್ಟ್ ಆದೇಶವಿದ್ದರೂ ಸಂಬಂಧಪಟ್ಟ ಇಲಾಖೆಗಳು ಮೌನ ವಹಿಸಿವೆ ಎಂದು ಪ್ರತಿಭಟನಾಕಾರರು ದೂರಿದರು.
ಅಲ್ಲದೆ, ಇಂತಹ ವಾಣಿಜ್ಯ ಚಟುವಟಿಕೆಗಳಿಂದಾಗಿ ಈ ಭಾಗದ ಭೂಮಿಯ ಮೌಲ್ಯ ಕೃತಕವಾಗಿ ಹೆಚ್ಚಾಗಿ ಬಡವರ ಹಕ್ಕುಪತ್ರದ ಶುಲ್ಕ ಏರಿಕೆಯಾಗುತ್ತಿದೆ ಎಂದು ಆರೋಪಿಸಿದರು. ತಮ್ಮ ಬೇಡಿಕೆಗಳಿಗೆ ಸೂಕ್ತ ಉತ್ತರ ಸಿಗುವವರೆಗೂ ಹಾಗೂ ಅನಧಿಕೃತ ಹೋಂ ಸ್ಟೇ ಸ್ಥಗಿತಗೊಳಿಸುವವರೆಗೂ ಹೋರಾಟ ಮುಂದುವರಿಸುವುದಾಗಿ ಗ್ರಾಮಸ್ಥರು ಎಚ್ಚರಿಕೆ ನೀಡಿದ್ದಾರೆ.