ಮಂಗಳೂರು : ಮೊಬೈಲ್‌ನಲ್ಲಿ ತುಳು ಲಿಪಿ ಓದಲು ಇನ್ನು ಸುಲಭ - ‘ಸಾದಿ ಬ್ರೌಸರ್’ ಅಂತಿಮ ಹಂತಕ್ಕೆ

•   Sat, Oct 24 2026 05:55:55 PM



• ಮಂಗಳೂರು, ಅ.24 (DaijiworldNews/TA): ಮೊಬೈಲ್ ಫೋನ್‌ಗಳಲ್ಲಿ ತುಳು ಲಿಪಿಯ ಅಕ್ಷರಗಳು ಬಾಕ್ಸ್‌ಗಳ ರೂಪದಲ್ಲಿ ಕಾಣಿಸುವ ಸಮಸ್ಯೆಗೆ ಪರಿಹಾರ ಕಂಡುಕೊಳ್ಳುವ ನಿಟ್ಟಿನಲ್ಲಿ ಮಂಗಳೂರು ಹೊರವಲಯದ ಎಡಪದವಿನ ಸಚಿನ್ ಅವರು ಅಭಿವೃದ್ಧಿಪಡಿಸುತ್ತಿರುವ ‘ಸಾದಿ ಬ್ರೌಸರ್’ ಇದೀಗ ಅಂತಿಮ ಹಂತ ತಲುಪಿದೆ. ಈ ಬ್ರೌಸರ್ ಬಳಕೆಗೆ ಲಭ್ಯವಾದರೆ ವಿವಿಧ ಮೊಬೈಲ್‌ಗಳಲ್ಲಿ ತುಳು ಲಿಪಿಯನ್ನು ಸುಲಭವಾಗಿ ಓದಲು ಅನುಕೂಲವಾಗುವ ನಿರೀಕ್ಷೆಯಿದೆ.

  

  ಪ್ರಸ್ತುತ ಕೆಲವು ಮೊಬೈಲ್ ಫೋನ್‌ಗಳಲ್ಲಿ ತುಳು ಲಿಪಿಯ ಅಕ್ಷರಗಳನ್ನು ಪ್ರದರ್ಶಿಸಲು ಅಗತ್ಯವಿರುವ ಫಾಂಟ್ ಬೆಂಬಲ ಇಲ್ಲದ ಕಾರಣ, ಅಕ್ಷರಗಳ ಬದಲಿಗೆ ಚೌಕಾಕಾರದ ಬಾಕ್ಸ್‌ಗಳು ಕಾಣಿಸಿಕೊಳ್ಳುತ್ತವೆ. ಇದರಿಂದ ತುಳು ಲಿಪಿಯಲ್ಲಿ ಪ್ರಕಟಿಸಿರುವ ಬರಹಗಳು, ಸಂದೇಶಗಳು ಹಾಗೂ ಇತರ ಮಾಹಿತಿಯನ್ನು ಓದಲು ಸಾಧ್ಯವಾಗುತ್ತಿಲ್ಲ. ಈ ತಾಂತ್ರಿಕ ಸಮಸ್ಯೆ ಡಿಜಿಟಲ್ ಮಾಧ್ಯಮಗಳಲ್ಲಿ ತುಳು ಭಾಷೆಯ ಬಳಕೆಗೆ ಅಡ್ಡಿಯಾಗುತ್ತಿದೆ. ಈ ಸಮಸ್ಯೆಗೆ ತಾಂತ್ರಿಕ ಪರಿಹಾರ ಒದಗಿಸುವ ಉದ್ದೇಶದಿಂದ ಸಚಿನ್ ಅವರು ‘ಸಾದಿ ಬ್ರೌಸರ್’ ಅಭಿವೃದ್ಧಿಪಡಿಸುತ್ತಿದ್ದಾರೆ. ವೃತ್ತಿಯಲ್ಲಿ ಎಲೆಕ್ಟ್ರಿಷಿಯನ್ ಆಗಿರುವ ಅವರು, ತುಳು ಭಾಷೆಯ ಮೇಲಿನ ಆಸಕ್ತಿ ಹಾಗೂ ತಂತ್ರಜ್ಞಾನ ಕಲಿಯುವ ಉತ್ಸಾಹದಿಂದ ಈ ಪ್ರಯತ್ನಕ್ಕೆ ಕೈಹಾಕಿದ್ದಾರೆ.

  ಮೊಬೈಲ್‌ಗಳಲ್ಲಿ ತುಳು ಲಿಪಿಯನ್ನು ಓದುವಾಗ ಎದುರಾಗುವ ಸಮಸ್ಯೆಯನ್ನು ಗಮನಿಸಿದ ಸಚಿನ್, ವಿವಿಧ ಸಾಧನಗಳಲ್ಲಿ ತುಳು ಅಕ್ಷರಗಳು ಸರಿಯಾಗಿ ಗೋಚರಿಸುವಂತೆ ಮಾಡುವ ನಿಟ್ಟಿನಲ್ಲಿ ಬ್ರೌಸರ್ ರೂಪಿಸುವ ಕಾರ್ಯದಲ್ಲಿ ತೊಡಗಿಸಿಕೊಂಡಿದ್ದಾರೆ. ಪ್ರಸ್ತುತ ಅಭಿವೃದ್ಧಿ ಕಾರ್ಯ ಅಂತಿಮ ಹಂತದಲ್ಲಿದ್ದು, ಬಳಕೆಗೆ ಸಿದ್ಧಪಡಿಸುವ ಪ್ರಕ್ರಿಯೆ ಮುಂದುವರಿದಿದೆ.

  ‘ತುಳುವರ್ಸೆ’ ಆ್ಯಪ್ ಈಗಾಗಲೇ ಸಿದ್ಧ : ಸಚಿನ್ ಅವರು ತುಳು ಭಾಷೆಯ ಡಿಜಿಟಲ್ ಬಳಕೆಯನ್ನು ಉತ್ತೇಜಿಸುವ ಉದ್ದೇಶದಿಂದ ಈಗಾಗಲೇ ‘ತುಳುವರ್ಸೆ’ ಎಂಬ ಆ್ಯಪ್ ಸಿದ್ಧಪಡಿಸಿದ್ದಾರೆ. ಈ ಆ್ಯಪ್‌ನಲ್ಲಿ ಇಂಗ್ಲಿಷ್‌ನಿಂದ ತುಳು ಭಾಷೆಗೆ ಅನುವಾದಿಸುವ ಸೌಲಭ್ಯವಿದೆ. ತುಳು ಭಾಷೆಯನ್ನು ಕಲಿಯಲು, ಬಳಸಲು ಹಾಗೂ ಇತರ ಭಾಷೆಗಳಲ್ಲಿರುವ ಮಾಹಿತಿಯನ್ನು ತುಳುವಿನಲ್ಲಿ ತಿಳಿದುಕೊಳ್ಳಲು ಇದು ನೆರವಾಗುವ ಉದ್ದೇಶ ಹೊಂದಿದೆ.

  ಇಂಗ್ಲಿಷ್ ಮತ್ತು ತುಳು ಭಾಷೆಗಳ ನಡುವಿನ ಸಂಪರ್ಕವನ್ನು ಸುಲಭಗೊಳಿಸುವುದರ ಜತೆಗೆ, ಇತರ ಒಂಬತ್ತು ಭಾಷೆಗಳಿಗೆ ಅನುವಾದಿಸುವ ಸಾಮರ್ಥ್ಯವನ್ನೂ ಈ ಆ್ಯಪ್ ಹೊಂದಿದೆ ಎಂದು ತಿಳಿದುಬಂದಿದೆ. ಒಂದೆಡೆ ತುಳು ಭಾಷೆಯ ಅನುವಾದಕ್ಕೆ ನೆರವಾಗುವ ಆ್ಯಪ್ ರೂಪಿಸಿರುವ ಸಚಿನ್, ಮತ್ತೊಂದೆಡೆ ಮೊಬೈಲ್‌ಗಳಲ್ಲಿ ತುಳು ಲಿಪಿಯನ್ನು ಓದಲು ಎದುರಾಗುವ ತಾಂತ್ರಿಕ ಸಮಸ್ಯೆಗೆ ಪರಿಹಾರ ಕಂಡುಕೊಳ್ಳಲು ಪ್ರಯತ್ನಿಸುತ್ತಿದ್ದಾರೆ. ತುಳು ಭಾಷೆಯನ್ನು ಡಿಜಿಟಲ್ ಜಗತ್ತಿನಲ್ಲಿ ಇನ್ನಷ್ಟು ಸುಲಭವಾಗಿ ಬಳಸುವಂತೆ ಮಾಡುವ ಈ ಪ್ರಯತ್ನಗಳು ಭಾಷೆಯ ಬಳಕೆ ಹಾಗೂ ತಂತ್ರಜ್ಞಾನದ ನಡುವಿನ ಅಂತರವನ್ನು ಕಡಿಮೆ ಮಾಡುವ ನಿರೀಕ್ಷೆ ಮೂಡಿಸಿವೆ.