ಮಂಗಳೂರು : ಫಾದರ್ ಕ್ಲೆಮೆಂಟ್ ಮಸ್ಕರೇನ್ಹಸ್‌ಗೆ 22ನೇ ಕಲಾಕಾರ್ ಪುರಸ್ಕಾರ ಘೋಷಣೆ

•   Wed, Oct 21 2026 12:00:06 PM



• ಮಂಗಳೂರು, ಅ.21 (DaijiworldNews/TA): ಕೊಂಕಣಿ ಭಕ್ತಿ ಸಂಗೀತ ಕ್ಷೇತ್ರಕ್ಕೆ ಅಪಾರ ಕೊಡುಗೆ ನೀಡಿರುವ ಕಾರ್ಕಳ ಟೌನ್ ಚರ್ಚ್‌ನ ಧರ್ಮಗುರು, ಸಂಗೀತಗಾರ ಹಾಗೂ ಸಂಗೀತ ಸಂಯೋಜಕ ಫಾದರ್ ಕ್ಲೆಮೆಂಟ್ ಮಸ್ಕರೇನ್ಹಸ್ ಅವರು 22ನೇ ಕಲಾಕಾರ್ ಪುರಸ್ಕಾರಕ್ಕೆ ಆಯ್ಕೆಯಾಗಿದ್ದಾರೆ. ಪ್ರದರ್ಶನ ಕಲೆಗಳಲ್ಲಿನ ಸಾಧನೆಯನ್ನು ಗುರುತಿಸಿ ಕಾರ್ವಾಲ್ಹೊ ಕುಟುಂಬ ಮತ್ತು ಮಾಂಡ್ ಸೊಭಾಣ್ ಜಂಟಿಯಾಗಿ ನೀಡುವ ಈ ಪ್ರಶಸ್ತಿಗೆ, ಭಕ್ತಿ ಸಂಗೀತ ಕ್ಷೇತ್ರದಲ್ಲಿನ ಅವರ ಗಮನಾರ್ಹ ಸೇವೆ ಹಾಗೂ ಯುವ ಸಂಗೀತ ಪ್ರತಿಭೆಗಳಿಗೆ ನೀಡುತ್ತಿರುವ ಪ್ರೋತ್ಸಾಹವನ್ನು ಪರಿಗಣಿಸಲಾಗಿದೆ.

  

  ಪ್ರಶಸ್ತಿ ಪ್ರದಾನ ಸಮಾರಂಭವು ನವೆಂಬರ್ 1ರ ಭಾನುವಾರ ಸಂಜೆ 6 ಗಂಟೆಗೆ ಮಂಗಳೂರಿನ ಶಕ್ತಿನಗರದ ಕಲಾಂಗಣ್‌ನಲ್ಲಿ ನಡೆಯಲಿದೆ. ಅಬುಧಾಬಿಯ ಅನಿವಾಸಿ ಉದ್ಯಮಿ ಹಾಗೂ ಸಮಾಜಸೇವಕ ರೊನಾಲ್ಡ್ ಪಿಂಟೊ ಮುಖ್ಯ ಅತಿಥಿಯಾಗಿ ಭಾಗವಹಿಸಲಿದ್ದು, ಗೋವಾದ ಖ್ಯಾತ ಭಾಷಾಶಾಸ್ತ್ರಜ್ಞ ಡಾ. ಪ್ರತಾಪ್ ನಾಯಕ್ ಗೌರವ ಅತಿಥಿಯಾಗಿ ಪಾಲ್ಗೊಳ್ಳಲಿದ್ದಾರೆ. ಲೂಯಿಸ್ ಜೆ. ಪಿಂಟೊ ಸಮಾರಂಭದ ಅಧ್ಯಕ್ಷತೆ ವಹಿಸಲಿದ್ದಾರೆ. ಪ್ರಶಸ್ತಿಯು ಶಾಲು, ಹಣ್ಣು-ಹೂವು, ಸ್ಮರಣಿಕೆ, ಪ್ರಶಸ್ತಿ ಪತ್ರ ಹಾಗೂ ರೂ.50,000 ನಗದು ಬಹುಮಾನವನ್ನು ಒಳಗೊಂಡಿದೆ.

  1954ರಲ್ಲಿ ಕೆಲಂಬೆಟ್-ಬೋಳದಲ್ಲಿ ಜನಿಸಿದ ಫಾದರ್ ಕ್ಲೆಮೆಂಟ್, 1981ರಲ್ಲಿ ಪೌರೋಹಿತ್ಯ ದೀಕ್ಷೆ ಪಡೆದರು. ಬಳಿಕ ವಿವಿಧ ಚರ್ಚ್‌ಗಳು ಹಾಗೂ ಶಿಕ್ಷಣ ಸಂಸ್ಥೆಗಳಲ್ಲಿ ಸೇವೆ ಸಲ್ಲಿಸಿದ ಅವರು, ಧಾರ್ಮಿಕ ಸೇವೆಯ ಜತೆಗೆ ಶಿಕ್ಷಣ ಮತ್ತು ಸಂಗೀತ ಕ್ಷೇತ್ರಗಳಲ್ಲಿಯೂ ತಮ್ಮದೇ ಆದ ಛಾಪು ಮೂಡಿಸಿದ್ದಾರೆ. ಶಿಕ್ಷಣ ಕ್ಷೇತ್ರದಲ್ಲಿನ ಅವರ ಸೇವೆಯನ್ನು ಗುರುತಿಸಿ ದಕ್ಷಿಣ ಕನ್ನಡ ಜಿಲ್ಲಾಡಳಿತವು 2005ರಲ್ಲಿ ಅತ್ಯುತ್ತಮ ಶಿಕ್ಷಕ ಪ್ರಶಸ್ತಿ ನೀಡಿ ಗೌರವಿಸಿತ್ತು. ಅಲ್ಲದೆ, ಉಡುಪಿ ಧರ್ಮಪ್ರಾಂತ್ಯದ ಕ್ಯಾಥೊಲಿಕ್ ಶಿಕ್ಷಣ ಮಂಡಳಿಯ ಮೊದಲ ಕಾರ್ಯದರ್ಶಿಯಾಗಿಯೂ ಅವರು ಸೇವೆ ಸಲ್ಲಿಸಿದ್ದರು.

  1994ರಲ್ಲಿ ದಿವಂಗತ ಫಾದರ್ ವಲೇರಿಯನ್ ಮೆಂಡೋನ್ಸಾ ಅವರೊಂದಿಗೆ ಕೈಜೋಡಿಸುವ ಮೂಲಕ ಫಾದರ್ ಕ್ಲೆಮೆಂಟ್ ಸಂಗೀತ ಕ್ಷೇತ್ರದಲ್ಲಿ ತಮ್ಮ ಪಯಣ ಆರಂಭಿಸಿದರು. ಇವರಿಬ್ಬರ ಜೋಡಿ ಕೊಂಕಣಿ ಸಂಗೀತ ಲೋಕದಲ್ಲಿ ‘ಲಕ್ಷ್ಮೀಕಾಂತ್–ಪ್ಯಾರೇಲಾಲ್’ ಎಂದೇ ಜನಪ್ರಿಯವಾಗಿತ್ತು. ಈ ಜೋಡಿ ಒಟ್ಟು 49 ಭಕ್ತಿ ಸಂಗೀತ ಆಲ್ಬಂಗಳನ್ನು ಬಿಡುಗಡೆ ಮಾಡಿತ್ತು. ಫಾದರ್ ವಲೇರಿಯನ್ ಅವರ ನಿಧನದ ಬಳಿಕವೂ ಸಂಗೀತ ಪಯಣವನ್ನು ಮುಂದುವರಿಸಿರುವ ಫಾದರ್ ಕ್ಲೆಮೆಂಟ್, ಇದುವರೆಗೆ 51 ಆಲ್ಬಂಗಳಿಗಾಗಿ 500ಕ್ಕೂ ಹೆಚ್ಚು ಹಾಡುಗಳಿಗೆ ಸಾಹಿತ್ಯ ರಚಿಸಿ ಸಂಗೀತ ಸಂಯೋಜನೆ ಮಾಡಿದ್ದಾರೆ.

  ತಾವು ಸೇವೆ ಸಲ್ಲಿಸಿದ ವಿವಿಧ ಚರ್ಚ್‌ಗಳ ವ್ಯಾಪ್ತಿಯಲ್ಲಿ ಗಾಯನ ಪ್ರತಿಭೆಗಳನ್ನು ಗುರುತಿಸಿ, ಅವರಿಗೆ ತಮ್ಮ ಪ್ರತಿಭೆ ಪ್ರದರ್ಶಿಸಲು ಅವಕಾಶ ಕಲ್ಪಿಸುವ ಮೂಲಕ ಫಾದರ್ ಕ್ಲೆಮೆಂಟ್ ಅನೇಕ ಯುವ ಕಲಾವಿದರನ್ನು ಪ್ರೋತ್ಸಾಹಿಸಿದ್ದಾರೆ. ಚರ್ಚ್‌ನ ಪ್ರಾರ್ಥನಾ ವಿಧಿವಿಧಾನಗಳಿಗಾಗಿ ಹಲವು ಸ್ತುತಿಗೀತೆಗಳನ್ನು ರಚಿಸಿರುವ ಅವರು, ಸಾಮಾಜಿಕ ವಿಷಯಗಳ ಕುರಿತಾದ ಹಾಡುಗಳನ್ನೂ ಸಂಯೋಜಿಸಿದ್ದಾರೆ. ಅವರ ಕೆಲವು ಹಾಡುಗಳು ಹಿಂದಿ ಭಾಷೆಗೂ ಅನುವಾದಗೊಂಡಿವೆ. ಯೂಟ್ಯೂಬ್ ಮತ್ತು ಸಾಮಾಜಿಕ ಜಾಲತಾಣಗಳಲ್ಲಿ ಅವರ ಸಂಗೀತ ಸಂಯೋಜನೆಗಳು ಲಭ್ಯವಿದ್ದು, ಪ್ರಾರ್ಥನಾ ಗೀತೆಗಳು ಹಾಗೂ ನೃತ್ಯಗೀತೆಗಳು ಶಾಲಾ ಕಾರ್ಯಕ್ರಮಗಳು ಮತ್ತು ಸಾಂಸ್ಕೃತಿಕ ಸಮಾರಂಭಗಳಲ್ಲಿ ಜನಪ್ರಿಯವಾಗಿವೆ.

  ಪ್ರಶಸ್ತಿ ಪ್ರದಾನ ಸಮಾರಂಭದ ಬಳಿಕ ಮಾಸಿಕ ರಂಗಭೂಮಿ ಸರಣಿ ‘ಮ್ಹೋಯ್ನ್ಯಾಲಿ ಮಾಂಚಿ’ಯ 299ನೇ ಕಾರ್ಯಕ್ರಮ ನಡೆಯಲಿದೆ. ಈ ಸಂದರ್ಭದಲ್ಲಿ ನೆಲ್ಲು ಪೆರ್ಮನ್ನೂರು ರಚಿಸಿರುವ ‘ಮೆಳ್ಯಾಂಚೆ ಉಪದರ್’ ಎಂಬ ಹೊಸ ಕೊಂಕಣಿ ನಾಟಕವನ್ನು ಕಾಮಿಡಿ ಕಂಪನಿ ತಂಡ ಪ್ರಥಮ ಬಾರಿಗೆ ಪ್ರದರ್ಶಿಸಲಿದೆ. ಕಾರ್ಯಕ್ರಮಕ್ಕೆ ಸಾರ್ವಜನಿಕರಿಗೆ ಉಚಿತ ಪ್ರವೇಶವಿದೆ ಎಂದು ಆಯೋಜಕರು ತಿಳಿಸಿದ್ದಾರೆ.