ಮಂಗಳೂರು : ಆರೋಗ್ಯದ ಜೊತೆಗಿದೆ ಆಟಿ ಅಮಾವಾಸ್ಯೆ ನಂಟು?! - ಏನಿದು ವಿಶೇಷ ಆಚರಣೆ?

•   Wed, Aug 12 2026 11:10:23 AM



• ಮಂಗಳೂರು, ಆ. 12 (DaijiworldNews/TA): ತುಳುನಾಡಿನ ಮಣ್ಣಿನ ಸೊಗಡು, ಸಂಪ್ರದಾಯದ ಕಂಪು, ಆರೋಗ್ಯದ ನಂಬಿಕೆಇವೆಲ್ಲವನ್ನೂ ತನ್ನೊಳಗೆ ಕಟ್ಟಿಕೊಂಡಿರುವ ವಿಶಿಷ್ಟ ದಿನವೇ ಆಟಿ ಅಮಾವಾಸ್ಯೆ. ಪರಂಪರೆಯಿಂದ ನಡೆದುಕೊಂಡು ಬಂದಿರುವ ಆಚರಣೆಗಳು, ಹಿರಿಯರ ನಂಬಿಕೆಗಳು ಹಾಗೂ ಔಷಧೀಯ ಮಹತ್ವ ಹೊಂದಿರುವ ಪಾಲೆ ಮರದ ಕಷಾಯ, ಇವೆಲ್ಲಾ ಕೂಡಿರುವ ಆಟಿ ಅಮಾವಾಸ್ಯೆ ತುಳುನಾಡಿನ ಬದುಕಿನೊಂದಿಗೆ ಬೆಸೆದುಕೊಂಡಿರುವ ಒಂದು ವಿಶಿಷ್ಟ ಸಂಸ್ಕೃತಿ.

  

  ಆಟಿ ತಿಂಗಳು ಎಂದರೆ ಕಷ್ಟ-ಕಷ್ಟಗಳ ಕಾಲ, ಆದರೆ ಇದೇ ಆಟಿ ಅಮಾವಾಸ್ಯೆ ಮಾತ್ರ ತುಳುನಾಡಿನ ಜನರ ಪಾಲಿಗೆ ವಿಶೇಷ ನಂಬಿಕೆಯ ದಿನ. ಮುಂಜಾನೆ ಸ್ನಾನ, ಉಪವಾಸ, ವಿಶೇಷ ಪೂಜೆ ಎಲ್ಲಕ್ಕಿಂತ ಮುಖ್ಯವಾಗಿ ಪಾಲೆ ಮರದ ಕಷಾಯ ಸೇವನೆ. ತಲೆತಲಾಂತರಗಳಿಂದ ನಡೆದುಕೊಂಡು ಬಂದಿರುವ ಈ ಆಚರಣೆಯ ಹಿಂದೆ ಆರೋಗ್ಯದ ಕಾಳಜಿಯೂ ಇದೆ, ನಂಬಿಕೆಯೂ ಇದೆ.

  ತುಳುನಾಡಿನ ಸಂಸ್ಕೃತಿಯಲ್ಲಿ ಕೆಲ ಆಚರಣೆಗಳು ಕೇವಲ ಸಂಪ್ರದಾಯಗಳಲ್ಲ, ಅವು ನಮ್ಮ ಹಿರಿಯರು ಬಿಟ್ಟುಹೋದ ಜೀವನ ಪಾಠಗಳು. ಅಂತಹ ವಿಶಿಷ್ಟ ಆಚರಣೆಗಳಲ್ಲೊಂದು ಆಟಿ ಅಮಾವಾಸ್ಯೆ. ಆಷಾಢದ ಕತ್ತಲ ಅಮಾವಾಸ್ಯೆಯಂದು ನಡೆಯುವ ಈ ಆಚರಣೆ, ನಂಬಿಕೆ, ಆರೋಗ್ಯ ಮತ್ತು ತುಳುನಾಡಿನ ಸಾಂಸ್ಕೃತಿಕ ಪರಂಪರೆಯ ಅಪೂರ್ವ ಸಂಗಮವಾಗಿದೆ. ಹಾಗಾದರೆ ಕರಾವಳಿಯ ಆರೋಗ್ಯ ಪರಂಪರೆ ಜೊತೆಗಿನ ಪಾಲೆದ ಕಷಾಯ ಸೇವನೆಯ ವಿಶೇಷತೆ ಏನು?

  ಮಳೆಗಾಲದ ತೇವ, ಹಸಿರು ಪ್ರಕೃತಿಯ ಹಸುರು ಹೊದಿಕೆ, ಸಾಂಪ್ರದಾಯಿಕ ಆಚರಣೆಗಳು. ತುಳುನಾಡಿನ ಜೀವನಶೈಲಿಯಲ್ಲಿ ‘ಆಟಿ’ ತಿಂಗಳಿಗೆ ತನ್ನದೇ ಆದ ವಿಶಿಷ್ಟ ಸ್ಥಾನವಿದೆ. ಅದರಲ್ಲೂ ಆಟಿ ಅಮಾವಾಸ್ಯೆ ಎಂದರೆ ಕರಾವಳಿಗರ ಪಾಲಿಗೆ ಕೇವಲ ಒಂದು ಹಬ್ಬವಲ್ಲ, ಪ್ರಕೃತಿ, ಆರೋಗ್ಯ ಮತ್ತು ಪಾರಂಪರಿಕ ಜ್ಞಾನವನ್ನು ಬೆಸೆಯುವ ವಿಶೇಷ ದಿನ. ಕಹಿಯಾಗಿದ್ದರೂ ಆರೋಗ್ಯದ ಸಂಕೇತವೆಂದು ನಂಬಲಾಗುವ ‘ಪಾಲೆದ ಕಷಾಯ’ ಈ ದಿನದ ಪ್ರಮುಖ ಆಚರಣೆಗಳಲ್ಲಿ ಒಂದಾಗಿದೆ.

  ದಕ್ಷಿಣ ಕನ್ನಡ, ಉಡುಪಿ ಹಾಗೂ ಕಾಸರಗೋಡು ಸೇರಿದಂತೆ ತುಳುನಾಡಿನ ವಿವಿಧ ಭಾಗಗಳಲ್ಲಿ ಇಂದು (ಆಗಸ್ಟ್ 12, ಬುಧವಾರ) ಆಟಿ ಅಮಾವಾಸ್ಯೆಯನ್ನು ಸಾಂಪ್ರದಾಯಿಕವಾಗಿ ಆಚರಿಸಲಾಗುತ್ತಿದೆ. ಮನೆಮನೆಗಳಲ್ಲಿ ಹಿರಿಯರ ಮಾರ್ಗದರ್ಶನದಲ್ಲಿ ಹಲವು ವರ್ಷಗಳಿಂದ ನಡೆದುಕೊಂಡು ಬಂದಿರುವ ಆಚರಣೆಗಳಿಗೆ ಇಂದಿಗೂ ಮಹತ್ವ ನೀಡಲಾಗುತ್ತಿದೆ. ಆಷಾಢ ಮಾಸದ ಅಮಾವಾಸ್ಯೆಯನ್ನು ತುಳುನಾಡಿನಲ್ಲಿ ‘ಆಟಿ ಅಮಾವಾಸ್ಯೆ’ ಎಂದು ಕರೆಯಲಾಗುತ್ತದೆ. ಕರ್ನಾಟಕದ ಹಲವು ಭಾಗಗಳಲ್ಲಿ ಇದೇ ದಿನವನ್ನು ‘ಆಷಾಢ ಅಮಾವಾಸ್ಯೆ’ ಅಥವಾ ‘ಭೀಮನ ಅಮಾವಾಸ್ಯೆ’ ಎಂದೂ ಆಚರಿಸಲಾಗುತ್ತದೆ.

  ತುಳುನಾಡಿನ ಸಂಸ್ಕೃತಿಯಲ್ಲಿ ಆಟಿ ತಿಂಗಳು ಪ್ರಕೃತಿ ಮತ್ತು ಆರೋಗ್ಯದ ದೃಷ್ಟಿಯಿಂದ ವಿಶೇಷವೆಂದು ಪರಿಗಣಿಸಲಾಗಿದೆ. ಮಳೆಗಾಲದಲ್ಲಿ ದೇಹದ ಆರೋಗ್ಯ ಕಾಪಾಡಿಕೊಳ್ಳಲು ಹಿಂದಿನ ತಲೆಮಾರು ಅನುಸರಿಸಿಕೊಂಡು ಬಂದಿದ್ದ ಹಲವು ಆಹಾರ ಪದ್ಧತಿಗಳು ಹಾಗೂ ಮನೆಮದ್ದುಗಳ ಆಚರಣೆಗಳು ಈ ಅವಧಿಯಲ್ಲಿ ಕಂಡುಬರುತ್ತವೆ. ಕಹಿಯಾದರೂ ವಿಶೇಷ ‘ಪಾಲೆದ ಕಷಾಯ’ : ಆಟಿ ಅಮಾವಾಸ್ಯೆಯ ಪ್ರಮುಖ ಆಚರಣೆ ಎಂದರೆ ಪಾಲೆದ ಕಷಾಯ ಸೇವನೆ. ಮುಂಜಾನೆ ಖಾಲಿ ಹೊಟ್ಟೆಯಲ್ಲಿ ಪಾಳೆ ಮರದ ತೊಗಟೆಯಿಂದ ತಯಾರಿಸಿದ ಕಷಾಯವನ್ನು ಸೇವಿಸುವುದು ಕರಾವಳಿ ಭಾಗದ ಅನೇಕ ಕುಟುಂಬಗಳಲ್ಲಿ ಇಂದಿಗೂ ನಡೆದುಕೊಂಡು ಬರುತ್ತಿರುವ ಸಂಪ್ರದಾಯ. ತುಳುನಾಡಿನ ಸಾಂಪ್ರದಾಯಿಕ ನಂಬಿಕೆಯ ಪ್ರಕಾರ, ಆಟಿ ಅಮಾವಾಸ್ಯೆಯಂದು ಪಾಳೆ ಮರದಲ್ಲಿ 108 ಗಿಡಮೂಲಿಕೆಗಳ ಔಷಧೀಯ ಗುಣಗಳು ಸೇರಿರುತ್ತವೆ ಎನ್ನಲಾಗುತ್ತದೆ. ಈ ನಂಬಿಕೆಯ ಹಿನ್ನೆಲೆಯಲ್ಲಿ ಪಾಳೆದ ಕಷಾಯಕ್ಕೆ ವಿಶೇಷ ಮಹತ್ವ ನೀಡಲಾಗಿದೆ.

  ಸಾಂಪ್ರದಾಯಿಕವಾಗಿ ಬ್ರಾಹ್ಮಿ ಮುಹೂರ್ತದಲ್ಲಿ ಪಾಳೆ ಮರದ ತೊಗಟೆಯನ್ನು ಸಂಗ್ರಹಿಸಲಾಗುತ್ತದೆ. ತೊಗಟೆಯನ್ನು ಚೆನ್ನಾಗಿ ತೊಳೆದು ಹೊರಗಿನ ಭಾಗವನ್ನು ತೆಗೆದು, ಕಲ್ಲಿನಲ್ಲಿ ಜಜ್ಜಿ ರಸವನ್ನು ಹೊರತೆಗೆಯಲಾಗುತ್ತದೆ. ನಂತರ ಈ ರಸಕ್ಕೆ ಕರಿಮೆಣಸು, ಬೆಳ್ಳುಳ್ಳಿ ಹಾಗೂ ಓಮ್ ಕಾಳು ಸೇರಿಸಿ ಕುದಿಸಲಾಗುತ್ತದೆ. ಸಿದ್ಧವಾದ ಕಷಾಯವನ್ನು ಬೆಳಗಿನ ಜಾವ ಖಾಲಿ ಹೊಟ್ಟೆಯಲ್ಲಿ ಸೇವಿಸುವುದು ಪದ್ಧತಿ. ಕಹಿ ರುಚಿಯ ಈ ಕಷಾಯ ಸೇವನೆಯ ಬಳಿಕ ದೇಹಕ್ಕೆ ತಂಪು ನೀಡುತ್ತದೆ ಎಂಬ ನಂಬಿಕೆಯೊಂದಿಗೆ ಮೆಂತ್ಯ ಗಂಜಿ ಸೇವಿಸುವ ಸಂಪ್ರದಾಯವೂ ತುಳುನಾಡಿನ ಹಲವು ಮನೆಗಳಲ್ಲಿ ಕಂಡುಬರುತ್ತದೆ.

  ಹಿರಿಯರ ಪ್ರಕಾರ, ಮಳೆಗಾಲದಲ್ಲಿ ಎದುರಾಗುವ ಹಲವು ಆರೋಗ್ಯ ಸಮಸ್ಯೆಗಳಿಂದ ದೇಹವನ್ನು ಕಾಪಾಡಿಕೊಳ್ಳಲು ಪಾರಂಪರಿಕವಾಗಿ ಈ ಕಷಾಯವನ್ನು ಬಳಸಲಾಗುತ್ತಿತ್ತು. ದೇಹದ ರೋಗನಿರೋಧಕ ಶಕ್ತಿಯನ್ನು ಹೆಚ್ಚಿಸುತ್ತದೆ ಎಂಬ ನಂಬಿಕೆಯೂ ಇದೆ. ಆದರೆ, ಪಾರಂಪರಿಕ ಆಚರಣೆಯಾದರೂ ಯಾವುದೇ ಔಷಧೀಯ ಸಸ್ಯ ಅಥವಾ ಕಷಾಯವನ್ನು ಸೇವಿಸುವಾಗ ಸಸ್ಯದ ಸರಿಯಾದ ಗುರುತು, ತಯಾರಿಸುವ ವಿಧಾನ ಮತ್ತು ಪ್ರಮಾಣದ ಬಗ್ಗೆ ತಿಳುವಳಿಕೆ ಅಗತ್ಯ. ಆರೋಗ್ಯ ಸಮಸ್ಯೆ ಇರುವವರು ತಜ್ಞರ ಸಲಹೆ ಪಡೆದು ಮಾತ್ರ ಸೇವಿಸುವುದು ಸೂಕ್ತ. ಕಹಿಯ ರುಚಿಯಲ್ಲೂ ಆರೋಗ್ಯದ ನಂಬಿಕೆ. ಪ್ರಕೃತಿಯೊಂದಿಗೆ ಬದುಕುವ ತುಳುನಾಡಿನ ಪಾರಂಪರಿಕ ಜ್ಞಾನಕ್ಕೆ ಸಾಕ್ಷಿಯಾಗಿರುವ ಆಟಿ ಅಮಾವಾಸ್ಯೆ ಇಂದಿಗೂ ಕರಾವಳಿಯ ಮನೆಮನೆಗಳಲ್ಲಿ ತನ್ನದೇ ಆದ ಸಂಭ್ರಮ ಮತ್ತು ಶ್ರದ್ಧೆಯೊಂದಿಗೆ ಜೀವಂತವಾಗಿದೆ.