ಮಂಗಳೂರು : ಕಟೀಲು ದೇವಸ್ಥಾನದಲ್ಲಿ ಡ್ರೋನ್ ಮ್ಯಾಜಿಕ್ - ಗೋಪುರ ಸ್ವಚ್ಛತೆಗೆ ಹೊಸ ತಂತ್ರಜ್ಞಾನ!

•   Wed, Aug 05 2026 03:43:50 PM



• ಮಂಗಳೂರು, ಆ. 05 (DaijiworldNews/TA): ದೇವಸ್ಥಾನದ ಗೋಪುರವನ್ನು ಸ್ವಚ್ಛಗೊಳಿಸುವುದೆಂದರೆ ಎತ್ತರದ ಸ್ಕ್ಯಾಫೋಲ್ಡಿಂಗ್‌, ಹಗ್ಗಗಳು ಮತ್ತು ಹಲವು ದಿನಗಳ ಮಾನವ ಶ್ರಮ ನೆನಪಾಗುವುದು ಸಹಜ. ಆದರೆ ದಕ್ಷಿಣ ಕನ್ನಡ ಜಿಲ್ಲೆಯ ಪ್ರಸಿದ್ಧ ಕಟೀಲು ಶ್ರೀ ದುರ್ಗಾಪರಮೇಶ್ವರಿ ದೇವಸ್ಥಾನ ಇದೀಗ ಈ ಸಾಂಪ್ರದಾಯಿಕ ವಿಧಾನಕ್ಕೆ ತಂತ್ರಜ್ಞಾನದ ಹೊಸ ಸ್ಪರ್ಶ ನೀಡಿದೆ.

  

  ಮೊದಲ ಬಾರಿಗೆ ವಿಶೇಷ ಡ್ರೋನ್‌ ಬಳಸಿ ದೇವಸ್ಥಾನದ ಗೋಪುರವನ್ನು ಸ್ವಚ್ಛಗೊಳಿಸುವ ಕಾರ್ಯ ಯಶಸ್ವಿಯಾಗಿ ನಡೆಸಲಾಗಿದ್ದು, ಈ ಪ್ರಯೋಗ ಭಕ್ತರು ಹಾಗೂ ಸಾರ್ವಜನಿಕರ ಮೆಚ್ಚುಗೆಗೆ ಪಾತ್ರವಾಗಿದೆ. ಹಬ್ಬದ ಸೀಸನ್‌ಗೆ ಮುನ್ನ ಕೈಗೊಂಡ ಈ ಕಾರ್ಯದ ವೀಡಿಯೊಗಳು ಸಾಮಾಜಿಕ ಜಾಲತಾಣಗಳಲ್ಲಿ ವೈರಲ್ ಆಗಿವೆ.

  ಜುಲೈ ತಿಂಗಳ ಕೊನೆಯ ವಾರದಲ್ಲಿ ನಡೆದ ಈ ಕಾರ್ಯಾಚರಣೆಯಲ್ಲಿ ಗೋಪುರದ ಮೇಲ್ಭಾಗದಲ್ಲಿ ಸಂಗ್ರಹವಾಗಿದ್ದ ಪಾಚಿ, ಧೂಳು ಹಾಗೂ ಕಲೆಗಳನ್ನು ಡ್ರೋನ್ ಮೂಲಕ ಸುರಕ್ಷಿತವಾಗಿ ತೆರವುಗೊಳಿಸಲಾಯಿತು. ವಾರ್ಷಿಕ ನಿರ್ವಹಣೆಯ ಭಾಗವಾಗಿ ಗೋಪುರವನ್ನು ಸ್ವಚ್ಛಗೊಳಿಸಿದ ಬಳಿಕ ಬಣ್ಣ ಬಳಿಯುವ ಕಾರ್ಯಕ್ಕೂ ಇದು ಸಹಕಾರಿಯಾಗಿದೆ.

  ಮಂಗಳೂರಿನ ದುರ್ಗಾ ಫೆಸಿಲಿಟಿ ಸಂಸ್ಥೆಯ ಮಾಲೀಕ ಸಜ್ಜಿದಾನಂದ ಶೆಟ್ಟಿ ಅವರು ಕಟ್ಟಡಗಳು, ಗ್ಲಾಸ್ ಫೆಸೇಡ್‌ಗಳು ಮತ್ತು ಎತ್ತರದ ರಚನೆಗಳ ಸ್ವಚ್ಛತೆಗಾಗಿ ಸುಮಾರು ರೂ. 12 ಲಕ್ಷ ಮೌಲ್ಯದ ವಿಶೇಷ ಡ್ರೋನ್ ಖರೀದಿಸಿದ್ದರು. ಗೋಪುರವನ್ನು ಮಾನವ ಶ್ರಮದಿಂದ ಸ್ವಚ್ಛಗೊಳಿಸುವುದು ಅಪಾಯಕಾರಿಯಾಗಿರುವ ಹಿನ್ನೆಲೆಯಲ್ಲಿ ದೇವಸ್ಥಾನದ ಆಡಳಿತ ಮಂಡಳಿ ಈ ತಂತ್ರಜ್ಞಾನವನ್ನು ಪ್ರಾಯೋಗಿಕವಾಗಿ ಬಳಸಲು ಮುಂದಾಯಿತು. ಮೊದಲ ಪ್ರಯೋಗ ಯಶಸ್ವಿಯಾಗಿರುವುದರಿಂದ ಭವಿಷ್ಯದಲ್ಲೂ ಇದೇ ವಿಧಾನವನ್ನು ಅಳವಡಿಸಿಕೊಳ್ಳುವ ಕುರಿತು ದೇವಸ್ಥಾನ ಚಿಂತನೆ ನಡೆಸುತ್ತಿದೆ.

  ಈ ಡ್ರೋನ್ ಸುಮಾರು 300 ಮೀಟರ್ ಎತ್ತರದ ಕಟ್ಟಡಗಳನ್ನು ಸ್ವಚ್ಛಗೊಳಿಸುವ ಸಾಮರ್ಥ್ಯ ಹೊಂದಿದೆ. ಇದರಲ್ಲಿ 10 ಲೀಟರ್ ಸಾಮರ್ಥ್ಯದ ನೀರಿನ ಟ್ಯಾಂಕ್ ಅಳವಡಿಸಲಾಗಿದ್ದು, ಮೊದಲು ಸಾಬೂನು ಮಿಶ್ರಿತ ನೀರನ್ನು ಸಿಂಪಡಿಸಿ ಬಳಿಕ ಹೈ-ಪ್ರೆಶರ್ ವಾಟರ್ ಜೆಟ್ ಮೂಲಕ ತೊಳೆಯುವ ವ್ಯವಸ್ಥೆ ಇದೆ. ಗೋಪುರಗಳಷ್ಟೇ ಅಲ್ಲದೆ ಗ್ಲಾಸ್ ಕಟ್ಟಡಗಳು, ಹೈರೈಸ್ ಅಪಾರ್ಟ್‌ಮೆಂಟ್‌ಗಳು, ಸೋಲಾರ್ ಪ್ಯಾನೆಲ್‌ಗಳು ಹಾಗೂ ಇತರೆ ಎತ್ತರದ ರಚನೆಗಳ ನಿರ್ವಹಣೆಯಲ್ಲೂ ಈ ಡ್ರೋನ್ ಉಪಯುಕ್ತವಾಗಿದೆ.

  ಇಲ್ಲಿಯವರೆಗೆ ಗೋಪುರ ಸ್ವಚ್ಛತೆಗೆ ಕಾರ್ಮಿಕರು ಸ್ಕ್ಯಾಫೋಲ್ಡಿಂಗ್‌, ಹಗ್ಗ ಹಾಗೂ ಇತರೆ ಎತ್ತರದ ಉಪಕರಣಗಳ ನೆರವು ಪಡೆಯಬೇಕಾಗುತ್ತಿತ್ತು. ಈ ಪ್ರಕ್ರಿಯೆ ಹೆಚ್ಚು ಸಮಯ ತೆಗೆದುಕೊಳ್ಳುವುದರ ಜೊತೆಗೆ ಅಪಾಯಕಾರಿಯೂ ಆಗಿತ್ತು. ಡ್ರೋನ್ ಬಳಕೆಯಿಂದ ಎತ್ತರಕ್ಕೆ ಮಾನವರು ಏರಬೇಕಾದ ಅಗತ್ಯವೇ ಇಲ್ಲದಿರುವುದರಿಂದ ಸುರಕ್ಷತೆ ಹೆಚ್ಚಿದ್ದು, ಕೆಲಸವನ್ನು ಕಡಿಮೆ ಸಮಯದಲ್ಲಿ ಪೂರ್ಣಗೊಳಿಸಲು ಸಾಧ್ಯವಾಗಿದೆ. ನಿರ್ವಹಣಾ ವೆಚ್ಚವೂ ಗಮನಾರ್ಹವಾಗಿ ಕಡಿಮೆಯಾಗುವ ನಿರೀಕ್ಷೆ ಇದೆ. ದೇವಸ್ಥಾನದ ವಂಶಪಾರಂಪರ್ಯ ಪುರೋಹಿತರ ಮಾಹಿತಿ ಪ್ರಕಾರ, ಗೋಪುರದಲ್ಲಿನ ಪಾಚಿ ಮತ್ತು ಧೂಳನ್ನು ಪರಿಣಾಮಕಾರಿಯಾಗಿ ತೆರವುಗೊಳಿಸಲು ಈ ಹೊಸ ತಂತ್ರಜ್ಞಾನ ನೆರವಾಗಿದೆ. ಸ್ವಚ್ಛತಾ ಕಾರ್ಯ ಪೂರ್ಣಗೊಂಡ ಬಳಿಕ ಗೋಪುರಕ್ಕೆ ಬಣ್ಣ ಬಳಿಯಲಾಗುತ್ತದೆ.

  ಮುಂದಿನ ದಿನಗಳಲ್ಲಿ ಪ್ರತಿ ಪ್ರಮುಖ ಹಬ್ಬದ ಮುನ್ನ ಡ್ರೋನ್ ಮೂಲಕ ಗೋಪುರ ಸ್ವಚ್ಛಗೊಳಿಸುವ ಪದ್ಧತಿಯನ್ನು ಅಳವಡಿಸಿಕೊಳ್ಳುವ ಯೋಜನೆಯೂ ಇದೆ. ಈಗಾಗಲೇ ಶೂನ್ಯ ತ್ಯಾಜ್ಯ ನಿರ್ವಹಣೆ, ಪರಿಸರ ಸ್ನೇಹಿ ಕ್ರಮಗಳು, ಆಧುನಿಕ ಭೋಜನಶಾಲೆ ಹಾಗೂ ಏಕಬಳಕೆ ಪ್ಲಾಸ್ಟಿಕ್ ನಿಷೇಧದಂತಹ ಹಲವು ಉಪಕ್ರಮಗಳಿಂದ ಗಮನ ಸೆಳೆದಿರುವ ಕಟೀಲು ದೇವಸ್ಥಾನ, ಇದೀಗ ಡ್ರೋನ್ ತಂತ್ರಜ್ಞಾನದ ಬಳಕೆಯ ಮೂಲಕ ಮತ್ತೊಮ್ಮೆ ಹೊಸ ಮಾದರಿಯನ್ನೇ ನಿರ್ಮಿಸಿದೆ.