ಕಾರ್ಕಳ: 'ಕುಂದೇಶ್ವರ ಸಮ್ಮಾನ್' ಪ್ರಶಸ್ತಿಗೆ ಕಾವ್ಯಶ್ರೀ ಅಜೇರು, 'ಕಲಾಭೂಷಣ' ಪ್ರಶಸ್ತಿಗೆ ಉಮೇಶ್ ಮಿಜಾರ್ ಆಯ್ಕೆ

•   Wed, Jan 21 2026 05:01:16 PM



• ಕಾರ್ಕಳ, ಜ. 21 (DaijiworldNews/AA): ಖ್ಯಾತ ಯಕ್ಷಗಾನ ಭಾಗವತಿಕೆ ಕಲಾವಿದೆ ಕಾವ್ಯಶ್ರೀ ಅಜೇರು ಅವರಿಗೆ ಈ ವರ್ಷದ ಪ್ರತಿಷ್ಠಿತ 'ಕುಂದೇಶ್ವರ ಸನ್ಮಾನ' ಪ್ರಶಸ್ತಿ ಲಭಿಸಿದೆ. ಜೊತೆಗೆ, ರಂಗಭೂಮಿ ಮತ್ತು ಚಲನಚಿತ್ರ ನಟ ಉಮೇಶ್ ಮಿಜಾರ್ ಅವರಿಗೆ 'ಕುಂದೇಶ್ವರ ಕಲಾಭೂಷಣ' ಪ್ರಶಸ್ತಿಯನ್ನು ಘೋಷಿಸಲಾಗಿದೆ.

  ಕಾರ್ಕಳ ಹಿರಿಯಂಗಡಿಯ ಶ್ರೀ ಕುಂದೇಶ್ವರ ದೇವಸ್ಥಾನದ ಧರ್ಮದರ್ಶಿಯಾಗಿದ್ದ, ದಿವಂಗತ ರಾಘವೇಂದ್ರ ಭಟ್ ಅವರ ಸ್ಮರಣಾರ್ಥ ಈ ಪ್ರಶಸ್ತಿಗಳನ್ನು ನೀಡಲಾಗುತ್ತದೆ. ಜನವರಿ 23 ರಂದು ನಡೆಯುವ ಸಮಾರಂಭದಲ್ಲಿ ಈ ಪ್ರಶಸ್ತಿಗಳನ್ನು ಪ್ರದಾನ ಮಾಡಲಾಗುವುದು ಎಂದು ಪ್ರಶಸ್ತಿ ಆಯ್ಕೆ ಸಮಿತಿಯ ಸಂಚಾಲಕ ಜಿತೇಂದ್ರ ಕುಂದೇಶ್ವರ ಸುದ್ದಿಗೋಷ್ಠಿಯಲ್ಲಿ ತಿಳಿಸಿದ್ದಾರೆ.

  ವಾರ್ಷಿಕ ಜಾತ್ರೆ ಮತ್ತು ಸಾಂಸ್ಕೃತಿಕ ಕಾರ್ಯಕ್ರಮಗಳು
  ಶ್ರೀ ಕುಂದೇಶ್ವರ ದೇವಸ್ಥಾನದ ವಾರ್ಷಿಕ ಜಾತ್ರೋತ್ಸವವು ಜನವರಿ 21 ರಿಂದ 23 ರವರೆಗೆ ನಡೆಯಲಿದೆ. ಜನವರಿ 23 ರಂದು ಸಮಾರೋಪ ಸಮಾರಂಭ ನಡೆಯಲಿದ್ದು, ಅಂದು ಸಂಜೆ 7 ಗಂಟೆಗೆ ಈ ಕೆಳಗಿನ ಕಾರ್ಯಕ್ರಮಗಳು ಜರುಗಲಿವೆ.
  * ಮಹಿಳಾ ಯಕ್ಷಗಾನ: ರಾಮಚಂದ್ರ ಭಟ್ ಎಲ್ಲೂರು ನಿರ್ದೇಶನದ ಕದ್ರಿ ಮಹಿಳಾ ಯಕ್ಷಕೂಟದಿಂದ ಪ್ರದರ್ಶನ.
  * ತುಳು ನಾಟಕ: 'ನಮ್ಮ ಬೆದ್ರ' ತಂಡದಿಂದ ನಾಟಕ ಪ್ರದರ್ಶನ.
  * ಪ್ರಶಸ್ತಿ ಪ್ರಧಾನ: ಕುಂದೇಶ್ವರ ಸನ್ಮಾನ ಮತ್ತು ಕಲಾಭೂಷಣ ಪ್ರಶಸ್ತಿ ವಿತರಣೆ.

  ಪುರಸ್ಕೃತರ ಪರಿಚಯ
  ಕಾವ್ಯಶ್ರೀ ಅಜೇರು
  ಯಕ್ಷಗಾನ ಕ್ಷೇತ್ರದಲ್ಲಿ ತನ್ನದೇ ಆದ ಛಾಪು ಮೂಡಿಸಿರುವ ಕಾವ್ಯಶ್ರೀ ಅವರು ಒಂಬತ್ತನೇ ವಯಸ್ಸಿನಲ್ಲೇ ಮಾಂಬಾಡಿ ಸುಬ್ರಹ್ಮಣ್ಯ ಭಟ್ ಅವರ ಮಾರ್ಗದರ್ಶನದಲ್ಲಿ ಯಕ್ಷಗಾನ ಕ್ಷೇತ್ರಕ್ಕೆ ಪಾದಾರ್ಪಣೆ ಮಾಡಿದರು. ತೆಂಕುತಿಟ್ಟು ಶೈಲಿಯ ಪ್ರಮುಖ ಮಹಿಳಾ ಭಾಗವತರಾಗಿ ಗುರುತಿಸಿಕೊಂಡಿರುವ ಕಾವ್ಯಶ್ರೀ ಅವರು ಮಂಗಳೂರು ಆಕಾಶವಾಣಿಯ 'ಬಿ' ಗ್ರೇಡ್ ಕಲಾವಿದೆಯಾಗಿದ್ದಾರೆ. ತೆಂಕು ಮತ್ತು ಬಡಗುತಿಟ್ಟು ಎರಡರಲ್ಲೂ ಪ್ರಾವೀಣ್ಯತೆ ಹೊಂದಿರುವ ಅವರು, ಸಾವಿರಾರು ಪ್ರದರ್ಶನಗಳನ್ನು ನೀಡಿದ್ದಾರೆ. ಪುತ್ತೂರಿನ ಅಜೇರು ನಿವಾಸಿಯಾಗಿರುವ ಅವರು ಕೆಮಿಸ್ಟ್ರಿಯಲ್ಲಿ ಎಂ.ಎಸ್‌ಸಿ ಮತ್ತು ಬಿ.ಎಡ್ ಪದವೀಧರರಾಗಿದ್ದಾರೆ.

  ಉಮೇಶ್ ಮಿಜಾರ್
  ಮಿಜಾರಿನ ಯಕ್ಷಗಾನ ಕಲಾವಿದ ದಂಪತಿಗಳ ಪುತ್ರರಾದ ಉಮೇಶ್ ಮಿಜಾರ್ ಅವರು ಕಡು ಬಡತನದ ನಡುವೆಯೂ ಕಲಾ ಕ್ಷೇತ್ರದಲ್ಲಿ ಸಾಧನೆ ಮಾಡಿದವರು. 1996 ರಲ್ಲಿ 'ನಮ್ಮ ಕಲಾವಿದೆರ್ ಬೆದ್ರ' ಎಂಬ ತಂಡವನ್ನು ಕಟ್ಟಿ ಹಲವಾರು ತುಳು ನಾಟಕಗಳನ್ನು ನಿರ್ದೇಶಿಸಿದ್ದಾರೆ. ಕಳೆದ 35 ವರ್ಷಗಳ ವೃತ್ತಿಜೀವನದಲ್ಲಿ 80ಕ್ಕೂ ಹೆಚ್ಚು ತುಳು ಚಲನಚಿತ್ರಗಳು, 6 ಕನ್ನಡ ಚಿತ್ರಗಳು ಮತ್ತು ಹಲವು ಧಾರಾವಾಹಿಗಳಲ್ಲಿ ಉಮೇಶ್ ಮಿಜಾರ್ ಅವರು ನಟಿಸಿದ್ದಾರೆ.

  ಈ ಪ್ರಶಸ್ತಿ ಪ್ರದಾನ ಸಮಾರಂಭದ ನಂತರ 'ನಮ್ಮ ಬೆದ್ರ' ಕಲಾವಿದರಿಂದ 'ವೈರಲ್ ವೈಶಾಲಿ' ಎಂಬ ತುಳು ನಾಟಕ ಪ್ರದರ್ಶನಗೊಳ್ಳಲಿದೆ.