ಉಡುಪಿ: ಪ್ರಧಾನಿ ಮೋದಿ ಭೇಟಿ ಹಿನ್ನೆಲೆ ಆದಿ ಉಡುಪಿ-ಮಲ್ಪೆ ರಸ್ತೆ ಕಾಮಗಾರಿ ಚುರುಕು

•   Sun, Nov 16 2025 12:02:10 PM



• ಉಡುಪಿ, ನ. 16 (DaijiworldNews/AA): ಪ್ರಧಾನಿ ನರೇಂದ್ರ ಮೋದಿ ಅವರು ನವೆಂಬರ್ 28 ರಂದು ಉಡುಪಿಗೆ ಭೇಟಿ ನೀಡಲಿರುವ ಹಿನ್ನೆಲೆಯಲ್ಲಿ, ದೀರ್ಘಕಾಲದಿಂದ ವಿಳಂಬವಾಗಿದ್ದ ಆದಿ ಉಡುಪಿ-ಮಲ್ಪೆ ರಸ್ತೆಯ ನಿರ್ಮಾಣ ಕಾಮಗಾರಿಯು ದಿಢೀರ್ ವೇಗ ಪಡೆದುಕೊಂಡಿದೆ. ಸುಮಾರು ಒಂದು ವರ್ಷದಿಂದ ನಿಧಾನಗತಿಯಲ್ಲಿ ಸಾಗುತ್ತಿದ್ದ ಕಾಮಗಾರಿಯು ಈಗ ಚುರುಕು ಪಡೆದುಕೊಂಡಿದೆ. ಈ ಹಿನ್ನೆಲೆ ಸಾರ್ವಜನಿಕರಿಂದ ಮಿಶ್ರ ಪ್ರತಿಕ್ರಿಯೆ ವ್ಯಕ್ತವಾಗಿದೆ.

  ಕಳೆದ ಸುಮಾರು ಒಂದು ವರ್ಷದಿಂದ ಕಾಂಕ್ರೀಟ್ ರಸ್ತೆ ಯೋಜನೆಯು ನಿಧಾನವಾಗಿ ಸಾಗುತ್ತಿತ್ತು. ಭೂಸ್ವಾಧೀನ ಮತ್ತು ಇತರ ಆಡಳಿತಾತ್ಮಕ ಅಡೆತಡೆಗಳು ಕಾಮಗಾರಿ ವಿಳಂಬಕ್ಕೆ ಕಾರಣ ಎಂದು ಅಧಿಕಾರಿಗಳು ಆಗಾಗ್ಗೆ ಉಲ್ಲೇಖಿಸುತ್ತಿದ್ದರು. ಆದರೆ, ಪ್ರಧಾನಿಯವರ ಭೇಟಿಯ ಘೋಷಣೆಯಾದ ಕೂಡಲೇ ಕಾಮಗಾರಿ ವೇಗ ಪಡೆದುಕೊಂಡಿದ್ದು, ಕಾಮಗಾರಿಯ ತುರ್ತು ಮತ್ತು ಸಮಯದ ಬಗ್ಗೆ ಹಲವು ಪ್ರಶ್ನೆಗಳನ್ನು ಹುಟ್ಟುಹಾಕಿದೆ.

  ಆದರೆ, ಕಾಮಗಾರಿ ನಡೆಸುತ್ತಿರುವ ರೀತಿ ಬಗ್ಗೆ ಸ್ಥಳೀಯ ನಿವಾಸಿಗಳು ಆಕ್ಷೇಪ ವ್ಯಕ್ತಪಡಿಸಿದ್ದಾರೆ. ವಾಹನ ಸಂಚಾರಕ್ಕೆ ತೊಂದರೆಯಾಗದಂತೆ ಸುಸಂಘಟಿತ ಹಂತಗಳಲ್ಲಿ ನಿರ್ಮಾಣ ಕಾರ್ಯವನ್ನು ಮಾಡಬಹುದಿತ್ತು ಎಂಬ ಆರೋಪ ಕೇಳಿ ಬರುತ್ತಿದೆ. ಆದರೆ, ಅಧಿಕಾರಿಗಳು ಈಗ ಕಾಂಕ್ರೀಟ್ ಕೆಲಸ ಮುಗಿಯುವವರೆಗೆ ರಸ್ತೆಯನ್ನು ಸಂಪೂರ್ಣವಾಗಿ ಮುಚ್ಚಲು ನಿರ್ಧರಿಸಿದ್ದು, ಪ್ರಯಾಣಿಕರ ದೈನಂದಿನ ಜೀವನಕ್ಕೆ ತೀವ್ರ ಅಡ್ಡಿಯುಂಟುಮಾಡಿದೆ.

  ಉಡುಪಿ-ಮಲ್ಪೆ ರಸ್ತೆಯು ಜಿಲ್ಲೆಯ ಅತ್ಯಂತ ಪ್ರಮುಖ ಸಂಪರ್ಕ ಕೊಂಡಿಯಾಗಿದ್ದು, ನಗರವನ್ನು ಜನಪ್ರಿಯ ಮಲ್ಪೆ ಬೀಚ್, ಮಲ್ಪೆ ಬಂದರು ಮತ್ತು ಸುತ್ತಮುತ್ತಲಿನ ಹಲವು ಪ್ರದೇಶಗಳಿಗೆ ಸಂಪರ್ಕಿಸುತ್ತದೆ. ಈ ಮಾರ್ಗವು ದಿನವಿಡೀ, ವಿಶೇಷವಾಗಿ ಪ್ರವಾಸಿಗರು, ಮೀನುಗಾರರು, ವಿದ್ಯಾರ್ಥಿಗಳು ಮತ್ತು ಬಂದರು ಪ್ರದೇಶಕ್ಕೆ ಪ್ರಯಾಣಿಸುವ ಕಾರ್ಮಿಕರಿಂದ ತುಂಬಿರುತ್ತದೆ. ದಿಢೀರ್ ರಸ್ತೆ ಮುಚ್ಚುವಿಕೆಯಿಂದಾಗಿ, ಸಾವಿರಾರು ಪ್ರಯಾಣಿಕರು ದೀರ್ಘ ಮಾರ್ಗಗಳನ್ನು ಬಳಸುವ ಅನಿವಾರ್ಯತೆ ಒದಗಿದ್ದು, ಇದರಿಂದ ವಿಳಂಬ ಮತ್ತು ವ್ಯಾಪಕ ಅಸಮಾಧಾನ ಉಂಟಾಗಿದೆ.

  ಅಧಿಕಾರಿಗಳ ನಿರ್ಲಕ್ಷ್ಯ ಮತ್ತು ಕಳಪೆ ಯೋಜನೆ ಎಂದು ಸಾರ್ವಜನಿಕರು ಆಕ್ರೋಶ ವ್ಯಕ್ತಪಡಿಸಿದ್ದಾರೆ. ಪ್ರಧಾನಿಯವರು ಪ್ರತಿ ವರ್ಷ ಉಡುಪಿಗೆ ಭೇಟಿ ನೀಡಿದರೆ, ಹೆಚ್ಚಿನ ಮೂಲಸೌಕರ್ಯ ಯೋಜನೆಗಳು ಸಕಾಲದಲ್ಲಿ ಪೂರ್ಣಗೊಳ್ಳುತ್ತವೆ ಎಂದು ಹಲವರು ವ್ಯಂಗ್ಯವಾಡಿದ್ದಾರೆ. ಉನ್ನತ ಮಟ್ಟದ ಭೇಟಿ ನಿಗದಿಯಾದಾಗ ಮಾತ್ರ ಅಧಿಕಾರಿಗಳು ಕಾರ್ಯಪ್ರವೃತ್ತರಾಗುತ್ತಾರೆ. ಇದು ಜಿಲ್ಲೆಯ ಅಭಿವೃದ್ಧಿಯ ದೂರದೃಷ್ಟಿಯ ಕೊರತೆಯನ್ನು ತೋರಿಸುತ್ತದೆ ಎಂದು ಕೆಲವರು ಟೀಕಿಸಿದ್ದಾರೆ.

  ಭೂಮಿ ಸಂಬಂಧಿತ ಸಮಸ್ಯೆಗಳಿಂದ ವಿಳಂಬವಾಗಿದ್ದ ಕಾಂಕ್ರೀಟ್ ಕೆಲಸವನ್ನು ದಿಢೀರನೆ ಆರಂಭಿಸಿರುವುದರಿಂದ ಮತ್ತಷ್ಟು ಅಸಮಾಧಾನ ಹೆಚ್ಚಿಸಿದೆ. ಸ್ಥಳೀಯ ಆಡಳಿತವು ಅಗತ್ಯವಿದ್ದಾಗ ಯೋಜನೆಗೆ ಆದ್ಯತೆ ನೀಡಲು ವಿಫಲವಾಗಿದೆ ಮತ್ತು ಪ್ರಧಾನಿಯವರ ಭೇಟಿಯ ಸಮಯದಲ್ಲಿ ರಸ್ತೆ ಸುಸ್ಥಿತಿಯಲ್ಲಿ ಕಾಣುವಂತೆ ಮಾಡಲು ಮಾತ್ರ ಈಗ ತರಾತುರಿಯಿಂದ ಕೆಲಸ ಮಾಡುತ್ತಿದೆ. ಅಭಿವೃದ್ಧಿ ಕಾರ್ಯಗಳು ನಡೆಯಲು ಪ್ರತಿ ಬಾರಿಯೂ ಹಿರಿಯ ನಾಯಕರೇ ಬರಬೇಕೆಂದರೆ, ಅದು ಸ್ಥಳೀಯ ಚುನಾಯಿತ ಪ್ರತಿನಿಧಿಗಳ ಅಸಮರ್ಥತೆಯನ್ನು ಸ್ಪಷ್ಟವಾಗಿ ತೋರಿಸುತ್ತದೆ.

  ಉಡುಪಿಗೆ ಆಗಮಿಸುವ ಪ್ರವಾಸಿಗರು ತೀವ್ರ ತೊಂದರೆಗೊಳಗಾಗಿದ್ದಾರೆ. ಮಲ್ಪೆ ಬೀಚ್‌ಗೆ ಭೇಟಿ ನೀಡುವ ಅನೇಕರು ರಸ್ತೆ ಮುಚ್ಚಿರುವ ಅರಿವಿಲ್ಲದೆ ನೇರವಾಗಿ ಕರಾವಳಿ ಬೈಪಾಸ್‌ಗೆ ಬರುತ್ತಾರೆ, ಕೊನೆಯ ಕ್ಷಣದಲ್ಲಿ ಅವರನ್ನು ಬೇರೆಡೆಗೆ ತಿರುಗಿಸಿ ಮಲ್ಪೆ ಬೀಚ್ ತಲುಪಲು ಗಣನೀಯವಾಗಿ ದೀರ್ಘವಾದ ಮಾರ್ಗವನ್ನು ತೆಗೆದುಕೊಳ್ಳುವಂತೆ ಸೂಚಿಸಲಾಗುತ್ತಿದೆ.

  ಕಾಂಕ್ರೀಟ್ ಕೆಲಸವು ನವೆಂಬರ್ 30 ರವರೆಗೆ ಮುಂದುವರಿಯುವ ನಿರೀಕ್ಷೆಯಿರುವುದರಿಂದ, ಪ್ರಯಾಣಿಕರು ಮತ್ತು ಪ್ರವಾಸಿಗರು ಒದಗಿಸಲಾದ ಪರ್ಯಾಯ ಮಾರ್ಗಗಳನ್ನು ಬಳಸುವಂತೆ ವಿನಂತಿಸಲಾಗಿದೆ.
  * ಮಲ್ಪೆಯಿಂದ ಮಂಗಳೂರು ಮತ್ತು ಕುಂದಾಪುರದ ಕಡೆಗೆ ಹೋಗುವ ಭಾರೀ ವಾಹನಗಳು, ಮಲ್ಪೆ-ಬಲರಾಮ ಸರ್ಕಲ್-ತೊಟ್ಟಂ-ಗುಜ್ಜರಬೆಟ್ಟು-ಹೂಡೆ-ನೆಜಾರು-ಕಲ್ಯಾಣಪುರ ಮಾರ್ಗವಾಗಿ ಸಂತಕಟ್ಟೆ ತಲುಪಿ ರಾಷ್ಟ್ರೀಯ ಹೆದ್ದಾರಿಯಲ್ಲಿ ಮುಂದುವರಿಯಬೇಕು.
  * ಮಲ್ಪೆಯ ಕಡೆಗೆ ಬರುವ ಭಾರೀ ವಾಹನಗಳು, ಆಶೀರ್ವಾದ ವೃತ್ತ-ಲಕ್ಷ್ಮಿ ನಗರ-ಕೊಡವೂರು ಮಾರ್ಗವನ್ನು ತೆಗೆದುಕೊಳ್ಳಲು ಸೂಚಿಸಲಾಗಿದೆ.
  * ಮಲ್ಪೆಯಿಂದ ಹೊರಡುವ ಮತ್ತು ಮಲ್ಪೆಗೆ ಬರುವ ಲಘು ವಾಹನಗಳು, ಕಲ್ಮಾಡಿ ಸರ್ಕಲ್-ಅಂಬಲಪಾಡಿ ಮಾರ್ಗವನ್ನು ಬಳಸಿ ರಾಷ್ಟ್ರೀಯ ಹೆದ್ದಾರಿ ತಲುಪಬಹುದು. ಅಥವಾ ಕಲ್ಮಾಡಿ-ಕಿದಿಯೂರು-ಕಡೇಕಾರ್-ಕಣ್ಣರಪಾಡಿ ಮಾರ್ಗವಾಗಿ ರಾಷ್ಟ್ರೀಯ ಹೆದ್ದಾರಿಯಲ್ಲಿ ಮುಂದುವರಿಯಬಹುದು.
  * ಮಲ್ಪೆಯಿಂದ ಮಂಗಳೂರಿಗೆ ಹೋಗುವ ಲಘು ವಾಹನಗಳು, ಪಡುಕೆರೆ-ತೊಟ್ಟಂ-ಬಾಲಾಯಪಾದೆ ಮಾರ್ಗವನ್ನೂ ತೆಗೆದುಕೊಳ್ಳಬಹುದು.