ಬ್ರಹ್ಮಾವರ: PMEGP ಸಾಲದ ನೆಪದಲ್ಲಿ 1.45 ಕೋಟಿಗೂ ಅಧಿಕ ವಂಚನೆ; ಮಹಿಳೆಯ ಬಂಧನ

•   Mon, Oct 27 2025 09:56:03 AM



• ಬ್ರಹ್ಮಾವರ, ಅ. 27 (DaijiworldNews/AA): ಪ್ರಧಾನಮಂತ್ರಿಗಳ ಉದ್ಯೋಗ ಸೃಷ್ಟಿ ಕಾರ್ಯಕ್ರಮ ಯೋಜನೆಯಡಿ ಸರ್ಕಾರಿ ಸಬ್ಸಿಡಿ ಸಾಲ ಕೊಡಿಸುವುದಾಗಿ ನಂಬಿಸಿ ಇಬ್ಬರಿಗೆ 1.45 ಕೋಟಿ ರೂ.ಗೂ ಅಧಿಕ ಹಣ ವಂಚಿಸಿದ ಆರೋಪದ ಮೇಲೆ ಓರ್ವ ಮಹಿಳೆಯನ್ನು ಪೊಲೀಸರು ಬಂಧಿಸಿದ್ದಾರೆ.

  

  ಬ್ರಹ್ಮಾವರ ತಾಲೂಕಿನ ಯಡ್ತಾಡಿ ಗ್ರಾಮದ, ಬಾರಕೂರು, ಹೇರಾಡಿ ನಿವಾಸಿ ಸರಿತಾ ಲೂಯಿಸ್ (39) ಅವರು ನೀಡಿರುವ ದೂರಿನ ಆಧಾರದ ಮೇರೆಗೆ, ಆರೋಪಿ ಕೌಸಲ್ಯಾ ನವೆಂಬರ್ 2023 ರಲ್ಲಿ ಅಂಜಲಿನ್ ಡಿಸಿಲ್ವಾ ಅವರ ಮೂಲಕ ಅವರಿಗೆ ಪರಿಚಿತಳಾಗಿದ್ದಳು. ಸರಿತಾ ಅವರಿಗೆ ತಾನು PMEGP ಸಬ್ಸಿಡಿ ಸಾಲ ಕೊಡಿಸಬಲ್ಲೆ ಎಂದು ಕೌಸಲ್ಯಾ ನಂಬಿಸಿದ್ದಳು.

  ಸಾಲ ಪ್ರಕ್ರಿಯೆಗೆ ಸಂಬಂಧಿಸಿದಂತೆ ಕೌಸಲ್ಯಾ ಕಾಲಕ್ರಮೇಣ ವಿವಿಧ ಕಾರಣಗಳನ್ನು ನೀಡಿ ಹಣಕ್ಕೆ ಬೇಡಿಕೆ ಇಟ್ಟಿದ್ದಳು ಎನ್ನಲಾಗಿದೆ. ಅವಳ ಭರವಸೆಗಳನ್ನು ನಂಬಿದ ಸರಿತಾ ಅವರು, ಕೌಸಲ್ಯಾಳ ಖಾತೆಗೆ ಮತ್ತು ನಗದು ರೂಪದಲ್ಲಿ - ಸಂದೇಶ್ (ಅವಳ ಗಂಡ), ಪ್ರಕಾಶ್, ಆಶೀಶ್ ಶೆಟ್ಟಿ, ರಾಜೇಂದ್ರ ಬೈಂದೂರು, ಗೀತಾ, ಹರಿಣಿ, ನವ್ಯಾ, ಕುಮಾರ್, ಮಾಲತಿ, ಪ್ರವೀಣ್, ಹರಿಪ್ರಸಾದ್, ನಾಗರಾಜ್ ಮತ್ತು ಭಾರತಿ ಸಿಂಗ್ ಎಂದು ಗುರುತಿಸಲಾದ ವ್ಯಕ್ತಿಗಳಿಗೆ - ಹಲವಾರು ಕಂತುಗಳಲ್ಲಿ ಹಣ ವರ್ಗಾಯಿಸಿದ್ದಾರೆ. ದೂರುದಾರರು ಒಟ್ಟು 80,72,000 ರೂ. ಹಣವನ್ನು ವರ್ಗಾಯಿಸಿದ್ದಾರೆ ಎಂದು ವರದಿಯಾಗಿದೆ.

  ಇದೇ ರೀತಿ, ಕೌಶಲ್ಯಾ ಅವರು ಸರಿತಾ ಅವರ ಸಂಬಂಧಿ ಅಂಜಲಿನ್ ಡಿಸಿಲ್ವಾ ಅವರಿಗೂ PMEGP ಸಬ್ಸಿಡಿ ಸಾಲ ಕೊಡಿಸುವ ಭರವಸೆ ನೀಡಿ, ಇದೇ ಗುಂಪಿನ ಜನರ ಮೂಲಕ 65,00,000 ರೂ. ವಂಚಿಸಿದ್ದಾಳೆ.

  ಒಟ್ಟಾರೆಯಾಗಿ, ಕೌಸಲ್ಯಾ ಅವರು 4 ಕೋಟಿ ರೂಪಾಯಿಗಳ PMEGP ಸಬ್ಸಿಡಿ ಸಾಲ ಕೊಡಿಸುವುದಾಗಿ ಭರವಸೆ ನೀಡಿ, ದೂರುದಾರರು ಮತ್ತು ಅವರ ಸಂಬಂಧಿಕರಿಗೆ ಒಟ್ಟು 1,45,72,000 ರೂಪಾಯಿಗಳನ್ನು ವಂಚಿಸಿದ್ದಾಳೆ. ಸಾಲ ನೀಡುವ ವಿಶ್ವಾಸ ಗಳಿಸಲು, ಆಕೆ ಫೋನ್‌ನಲ್ಲಿ ಬ್ಯಾಂಕ್ ಅಧಿಕಾರಿಯ ಸೋಗು ಹಾಕಿ ಮಾತನಾಡಿದ್ದಳು ಎನ್ನಲಾಗಿದೆ.

  ದೂರು ಸ್ವೀಕರಿಸಿದ ಬೆನ್ನಲ್ಲೇ ಬ್ರಹ್ಮಾವರ ಪೊಲೀಸ್ ಠಾಣೆಯಲ್ಲಿ ಪ್ರಕರಣ ದಾಖಲಾಗಿದೆ.

  ಬ್ರಹ್ಮಾವರ ಪೊಲೀಸರು ಆರೋಪಿ ಕೌಸಲ್ಯಾಳನ್ನು ವಶಕ್ಕೆ ಪಡೆದುಕೊಂಡಿದ್ದು, ಮುಂದಿನ ತನಿಖೆ ನಡೆಯುತ್ತಿದೆ.