ಫ್ರಾನ್ಸ್‌ನಲ್ಲಿ 1300ಕ್ಕೂ ಹೆಚ್ಚು ಪ್ರತಿಭಟನಾಕಾರರು ಅರೆಸ್ಟ್- ವಿದ್ಯಾರ್ಥಿ ನಾಯಕರೊಂದಿಗೆ ಇಂದು ಪ್ರಧಾನಿ ಸಭೆ!

•   Mon, Oct 26 2026 07:55:02 PM



• ಪ್ಯಾರಿಸ್, ಅ.26 (DaijiworldNews/AA): ಫ್ರಾನ್ಸ್‌ನಲ್ಲಿ ಹೆಚ್ಚುತ್ತಿರುವ ಹಣದುಬ್ಬರ, ಗಗನಕ್ಕೇರುತ್ತಿರುವ ವಸತಿ ಮತ್ತು ಬಾಡಿಗೆ ದರಗಳು ಹಾಗೂ ಸರ್ಕಾರದ ನೀತಿಗಳ ವಿರುದ್ಧ ನಡೆದ ಪ್ರತಿಭಟನೆಯಲ್ಲಿ 1300ಕ್ಕೂ ಅಧಿಕ ಜನರನ್ನು ಬಂಧಿಸಲಾಗಿದೆ.

  ಫ್ರಾನ್ಸ್ ದೇಶಾದ್ಯಂತ 5.5ಲಕ್ಷಕ್ಕೂ ಹೆಚ್ಚು ಜನರು ಬೀದಿಗಿಳಿದು ಅ. 17ರಂದು ಪ್ರತಿಭಟನೆ ನಡೆಸಿದ್ದು, ಈ ಪ್ರತಿಭಟನೆ ಹಿಂಸಾಚಾರಕ್ಕೆ ತಿರುಗಿತ್ತು. ಹಲವು ನಗರಗಳಲ್ಲಿ ಲೂಟಿ, ಬೆಂಕಿ ಹಚ್ಚುವಿಕೆ ಮತ್ತು ಸಾರ್ವಜನಿಕ ಆಸ್ತಿಪಾಸ್ತಿಗಳ ಧ್ವಂಸ ಮಾಡಲಾಗಿದೆ. ಲಿಮೋಜಸ್ ನಗರದ ಐತಿಹಾಸಿಕ ಪುರಭವನಕ್ಕೂ ಬೆಂಕಿ ಬಿದ್ದಿತ್ತು. ಈ ವೇಳೆ 53 ಮಂದಿ ಅಧಿಕಾರಿಗಳು ಗಾಯಗೊಂಡಿದ್ದಾರೆ. ಸದ್ಯ ಪೊಲೀಸರು 1314 ಜನರನ್ನು ಬಂಧಿಸಿದ್ದಾರೆ.

  ಗಾಯಗೊಂಡ ಪ್ರತಿಭಟನಾಕಾರರ ಒಟ್ಟು ಸಂಖ್ಯೆ ತಿಳಿದುಬಂದಿಲ್ಲ. "ಇಬ್ಬರು ಪ್ರತಿಭಟನಾಕಾರರು ಗಂಭೀರವಾಗಿ ಗಾಯಗೊಂಡಿದ್ದಾರೆ. ಒಬ್ಬರು ಟೌಲುಸ್‌ನಲ್ಲಿ ಮತ್ತು ಮತ್ತೊಬ್ಬರು ಕ್ಲೆರ್ಮಾಂಟ್-ಫೆರಾಂಡ್‌ನಲ್ಲಿ" ಎಂದು ಒಳನಾಡಿನ ಸಚಿವ ಲಾರೆಂಟ್ ನುನೆಜ್ ಅವರು ತಿಳಿಸಿದ್ದಾರೆ.

  ಇನ್ನು ಪ್ರಧಾನಿ ಸೆಬಾಸ್ಟಿಯನ್ ಲೆಕೋರ್ನು ಅ.26 ರಂದು ಶಿಕ್ಷಣ ಸಚಿವ ವಾರ್ಡ್ ಗೆಫ್ರೇ ಮತ್ತು ಉನ್ನತ ಶಿಕ್ಷಣ ಸಚಿವ ಫಿಲಿಪ್ ಬ್ಯಾಪ್ಟಿಸ್ಟ್ ಅವರೊಂದಿಗೆ ವಿದ್ಯಾರ್ಥಿ ಪ್ರತಿನಿಧಿಗಳನ್ನು ಭೇಟಿ ಮಾಡುವ ಸಾಧ್ಯತೆಯಿದೆ. ಪ್ಯಾರಿಸ್‌ನ ಮ್ಯಾಟಿಗ್ನಾನ್‌ನಲ್ಲಿರುವ ಪ್ರಧಾನಿ ಕಚೇರಿಯಲ್ಲಿ ಈ ಸಭೆಯ ನಡೆಯಲಿದೆ. ಈ ಸಭೆಯ ನಂತರ ಗೆಫ್ರೇ ಮತ್ತು ಬ್ಯಾಪ್ಟಿಸ್ಟ್ ಅವರು ಮಾಧ್ಯಮದವರನ್ನು ಉದ್ದೇಶಿಸಿ ಸುದ್ದಿಗೋಷ್ಠಿ ನಡೆಸಲಿದ್ದಾರೆ.