ವನವಾಟುವಿನಲ್ಲಿ ಪ್ರಬಲ ಸರಣಿ ಭೂಕಂಪ - ಸುನಾಮಿ ಎಚ್ಚರಿಕೆ

•   Sun, Oct 25 2026 10:49:26 AM



• ವನವಾಟು, ಅ.25 (DaijiworldNews/TA): ದಕ್ಷಿಣ ಪೆಸಿಫಿಕ್ ಮಹಾಸಾಗರದಲ್ಲಿರುವ ದ್ವೀಪ ರಾಷ್ಟ್ರ ವನವಾಟು ಶನಿವಾರ ಮುಂಜಾನೆ ಸಂಭವಿಸಿದ ಮೂರು ಪ್ರಬಲ ಭೂಕಂಪಗಳಿಂದ ನಡುಗಿದೆ. ರಿಕ್ಟರ್ ಮಾಪಕದಲ್ಲಿ 7.2, 6.9 ಮತ್ತು 6.3 ತೀವ್ರತೆಯ ಕಂಪನಗಳು ಕೆಲವೇ ನಿಮಿಷಗಳ ಅಂತರದಲ್ಲಿ ಸಂಭವಿಸಿದ್ದು, ಸ್ಥಳೀಯರಲ್ಲಿ ಆತಂಕ ಮೂಡಿಸಿವೆ. ಪ್ರಬಲ ಭೂಕಂಪಗಳ ಬೆನ್ನಲ್ಲೇ ಕರಾವಳಿ ಪ್ರದೇಶಗಳಿಗೆ ಮುನ್ನೆಚ್ಚರಿಕಾ ಕ್ರಮವಾಗಿ ಸುನಾಮಿ ಎಚ್ಚರಿಕೆ ನೀಡಲಾಗಿದೆ ಎಂದು ವರದಿಯಾಗಿದೆ.

  

  ಯುನೈಟೆಡ್ ಸ್ಟೇಟ್ಸ್ ಭೂವೈಜ್ಞಾನಿಕ ಸಮೀಕ್ಷೆ ನೀಡಿದ ಮಾಹಿತಿಯ ಪ್ರಕಾರ, ಮೊದಲ ಹಾಗೂ ಅತ್ಯಂತ ಪ್ರಬಲವಾದ 7.2 ತೀವ್ರತೆಯ ಭೂಕಂಪವು ಭಾರತೀಯ ಕಾಲಮಾನ ಬೆಳಗ್ಗೆ ಸುಮಾರು 8.12ಕ್ಕೆ ಸಂಭವಿಸಿದೆ. ಇದರ ಕೇಂದ್ರಬಿಂದು ವನವಾಟುವಿನ ಟೋರ್ಬಾ ಪ್ರಾಂತ್ಯದ ಸೋಲಾ ಪಟ್ಟಣದ ಪಶ್ಚಿಮಕ್ಕೆ ಸುಮಾರು 200 ಕಿ.ಮೀ ದೂರದಲ್ಲಿ ಸಮುದ್ರದಾಳದಲ್ಲಿ ಪತ್ತೆಯಾಗಿದೆ ಎಂದು ವರದಿಯಲ್ಲಿ ಉಲ್ಲೇಖಿಸಲಾಗಿದೆ. ಇದರ ಬೆನ್ನಲ್ಲೇ 6.9 ಮತ್ತು 6.3 ತೀವ್ರತೆಯ ಮತ್ತೆರಡು ಕಂಪನಗಳು ಸಂಭವಿಸಿವೆ. ಕಡಿಮೆ ಅವಧಿಯಲ್ಲಿ ಸರಣಿ ಕಂಪನಗಳು ಸಂಭವಿಸಿರುವುದು ಸ್ಥಳೀಯರಲ್ಲಿ ಆತಂಕಕ್ಕೆ ಕಾರಣವಾಗಿದೆ.

  ವನವಾಟು ಪೆಸಿಫಿಕ್ ಮಹಾಸಾಗರದ ಸುತ್ತಲಿನ ಅತ್ಯಂತ ಸಕ್ರಿಯ ಭೂಕಂಪ ವಲಯಗಳಲ್ಲಿ ಒಂದಾದ 'ಪೆಸಿಫಿಕ್ ರಿಂಗ್ ಆಫ್ ಫೈರ್' ಪ್ರದೇಶದಲ್ಲಿದೆ. ಇಲ್ಲಿ ಭೂಮಿಯ ಟೆಕ್ಟೋನಿಕ್ ಫಲಕಗಳ ಚಲನೆ ಮತ್ತು ಪರಸ್ಪರ ಘರ್ಷಣೆಯಿಂದಾಗಿ ಆಗಾಗ ಭೂಕಂಪಗಳು ಸಂಭವಿಸುತ್ತವೆ. ನ್ಯೂ ಹೆಬ್ರೈಡ್ಸ್ ಕಂದಕದ ಸುತ್ತಮುತ್ತಲಿನ ಪ್ರದೇಶದಲ್ಲಿ ಆಸ್ಟ್ರೇಲಿಯನ್ ಮತ್ತು ಪೆಸಿಫಿಕ್ ಭೂಫಲಕಗಳ ಚಲನೆಯಿಂದ ಭೂಕಂಪನ ಚಟುವಟಿಕೆ ಹೆಚ್ಚಾಗಿದೆ. ಒಂದು ಭೂಫಲಕ ಮತ್ತೊಂದು ಫಲಕದ ಕೆಳಗೆ ಜಾರುವ ಪ್ರಕ್ರಿಯೆಯನ್ನು 'ಸಬ್‌ಡಕ್ಷನ್' ಎಂದು ಕರೆಯಲಾಗುತ್ತದೆ. ಇಂತಹ ಭೌಗೋಳಿಕ ಪ್ರಕ್ರಿಯೆಗಳು ವನವಾಟು ಪ್ರದೇಶದಲ್ಲಿ ಪ್ರಬಲ ಭೂಕಂಪಗಳಿಗೆ ಕಾರಣವಾಗುತ್ತವೆ.

  ಭೂಕಂಪಗಳ ಮೇಲ್ವಿಚಾರಣೆ ನಡೆಸುವ ಜಿಯೋಶೇಕ್ ಸಂಸ್ಥೆಯ ವರದಿಯ ಪ್ರಕಾರ, ಕಳೆದ 30 ದಿನಗಳಲ್ಲಿ ವನವಾಟು ಪ್ರದೇಶದಲ್ಲಿ 70ಕ್ಕೂ ಹೆಚ್ಚು ಸಣ್ಣ ಮತ್ತು ದೊಡ್ಡ ಭೂಕಂಪಗಳು ದಾಖಲಾಗಿವೆ ಎಂದು ವರದಿಯಾಗಿದೆ. ಶನಿವಾರ ಸಂಭವಿಸಿದ 7.2 ತೀವ್ರತೆಯ ಕಂಪನವು ಈ ಅವಧಿಯಲ್ಲಿನ ಅತ್ಯಂತ ಪ್ರಬಲ ಕಂಪನವೆಂದು ಉಲ್ಲೇಖಿಸಲಾಗಿದೆ. ಇದಕ್ಕೂ ಮೊದಲು ಅಕ್ಟೋಬರ್ 20ರಂದು ಪೋರ್ಟ್ ಓಲ್ರಿ ಸಮೀಪ 6.3 ತೀವ್ರತೆಯ ಭೂಕಂಪ ಸಂಭವಿಸಿತ್ತು ಎಂದು ವರದಿಯಾಗಿದೆ.

  ಸರಣಿ ಭೂಕಂಪಗಳ ಹಿನ್ನೆಲೆಯಲ್ಲಿ ಕರಾವಳಿ ಪ್ರದೇಶಗಳ ಸುರಕ್ಷತೆ ಹಾಗೂ ಸುನಾಮಿ ಅಪಾಯದ ಕುರಿತು ಅಧಿಕಾರಿಗಳ ಸೂಚನೆಗಳನ್ನು ಪಾಲಿಸುವುದು ಅತ್ಯಂತ ಮುಖ್ಯವಾಗಿದೆ. ಭೂಕಂಪದಿಂದ ಉಂಟಾದ ಹಾನಿ ಅಥವಾ ಸಂಭವನೀಯ ಜೀವಹಾನಿಯ ಕುರಿತು ದೃಢೀಕೃತ ಮಾಹಿತಿ ಲಭ್ಯವಾದಂತೆ ಹೆಚ್ಚಿನ ವಿವರಗಳು ತಿಳಿದುಬರಬೇಕಿದೆ.

  A 6.9-7.2 magnitude shallow earthquake struck the Vanuatu Islands region at 13:31 local time. Officials issued a localized tsunami warning, advising that hazardous waves could impact coasts located within 300 km of the epicenter. #séisme - Sismo - Terremoto - Temblor https://t.co/zk2DkTgew3

  — GeoTechWar (@geotechwar) October 24, 2026