ಸಾವಿನ ದವಡೆಯಿಂದ ಪಾರಾದ ಅನುಭವವನ್ನು ಹಂಚಿಕೊಂಡ ಕ್ಯಾಪ್ಟನ್ ಸ್ಮಿತ್ ಮಚ್ಚರ್

•   Mon, Oct 19 2026 02:21:16 PM



• ಅಬುಧಾಬಿ, , ಅ.19 (DaijiworldNews/AK):ಸೆಪ್ಟೆಂಬರ್ 30 ರಂದು ದುಬೈನಿಂದ ಟೆಲ್ ಅವೀವ್‌ಗೆ ತೆರಳುತ್ತಿದ್ದ ಫ್ಲೈದುಬೈ ಬೋಯಿಂಗ್ 737 ವಿಮಾನದಲ್ಲಿ (FZ1073) ಸಹ-ಪೈಲಟ್‌ನಿಂದ ಹಲ್ಲೆಗೊಳಗಾಗಿ ತೀವ್ರ ಗಾಯಗೊಂಡಿದ್ದ ಭಾರತೀಯ ಮೂಲದ ಕ್ಯಾಪ್ಟನ್ ಸ್ಮಿತ್ ಮಚ್ಚರ್, ತಾವು ಎದುರಿಸಿದ ಕಷ್ಟದ ಕ್ಷಣಗಳನ್ನು ಬಹಿರಂಗಪಡಿಸಿದ್ದಾರೆ.

  ಅಬುಧಾಬಿಯ ಜಾಯೆದ್ ಮಿಲಿಟರಿ ಆಸ್ಪತ್ರೆಯಲ್ಲಿ ಗುಣಮುಖರಾಗುತ್ತಿರುವ ಅವರು ಮಾಧ್ಯಮಗಳಿಗೆ ನೀಡಿದ ಸಂದರ್ಶನದಲ್ಲಿ, ಸಾವಿನಂಚಿನಿಂದ ತಾವೂ ಪಾರಾಗಿ, ವಿಮಾನದಲ್ಲಿದ್ದ 170ಕ್ಕೂ ಹೆಚ್ಚು ಪ್ರಯಾಣಿಕರನ್ನು ರಕ್ಷಿಸಿದ ರೋಚಕ ಕ್ಷಣಗಳನ್ನು ವಿವರಿಸಿದ್ದಾರೆ.

  ವಿಮಾನದಲ್ಲಿದ್ದ ಇನ್ನೊಬ್ಬ ಆಫ್-ಡ್ಯೂಟಿ ಕ್ಯಾಪ್ಟನ್ ಕಾಕ್‌ಪಿಟ್‌ನಿಂದ ಹೊರಹೋದ ನಂತರ, ಸಹ-ಪೈಲಟ್ ಪ್ರಾರ್ಥನೆ ಮಾಡುವುದಾಗಿ ಹೇಳಿ ನನ್ನ ಸೀಟಿನ ಹಿಂಭಾಗದಲ್ಲಿ ಕುಳಿತ. ನಾನು ಲ್ಯಾಂಡಿಂಗ್ ವಿವರಗಳನ್ನು ಕಂಪ್ಯೂಟರ್‌ನಲ್ಲಿ ಪರಿಶೀಲಿಸುತ್ತಿದ್ದಾಗ, ಏಕಾಏಕಿ ತಲೆಯ ಹಿಂಭಾಗಕ್ಕೆ ಕೊಡಲಿಯಂತಹ ಆಯುಧದಿಂದ ಬಲವಾದ ಹೊಡೆತ ಬಿದ್ದಿತು.

  ಮೊದಲಿಗೆ ವಿಮಾನದ ಮೇಲ್ಛಾವಣಿಯೇ ತಲೆಯ ಮೇಲೆ ಕುಸಿಯಿತೇನೋ ಎಂದು ಭಾವಿಸಿದೆ. ಆದರೆ ಹೊಡೆತಗಳು ನಿಲ್ಲದಿದ್ದಾಗ, ನನ್ನ ಸಹೋದ್ಯೋಗಿಯೇ ನನ್ನ ಮೇಲೆ ದಾಳಿ ಮಾಡುತ್ತಿರುವುದು ತಿಳಿಯಿತು ಎಂದಿದ್ದಾರೆ.

  ಹೊಡೆತಗಳಿಂದಾಗಿ ತಲೆಗೆ ತೀವ್ರ ರಕ್ತಸ್ರಾವವಾಗಿ ಕಣ್ಣುಗಳು ಕತ್ತಲೆಯಾದವು. ತಕ್ಷಣವೇ ಸೀಟ್‌ಬೆಲ್ಟ್ ಕಳಚಿ, ಜೀವ ಉಳಿಸಿಕೊಳ್ಳಲು ಪ್ರತಿರೋಧ ತೋರಿದರು. ಪ್ರಜ್ಞೆ ತಪ್ಪುವ ಮುನ್ನವೇ ಹೇಗೋ ಮಾಡಿ ಕಾಕ್‌ಪಿಟ್ ಬಾಗಿಲು ತೆರೆಯುವ ಸ್ವಿಚ್ ಒತ್ತಿ ಹೊರಗಿದ್ದ ಸಿಬ್ಬಂದಿಗೆ ಕೂಗಿ ಕರೆದಿದ್ದರು.

  ದಾಳಿಕೋರ ಸಹ-ಪೈಲಟ್ ವಿಮಾನವನ್ನು ದಿಢೀರನೆ ಕೆಳಮುಖವಾಗಿ ತಿರುಗಿಸಿದ್ದರಿಂದ ಎಂಜಿನ್ ಸದ್ದು ಕಡಿಮೆಯಾಗಿ ವಿಮಾನವು ಕೇವಲ ಒಂದು ನಿಮಿಷದಲ್ಲಿ ಸುಮಾರು 17,000 ಅಡಿ ಪಾತಾಳಕ್ಕೆ ಕುಸಿಯಿತು. ಇನ್ನು ನಾವು ಬದುಕುಳಿಯುವುದಿಲ್ಲ ಎಂದು ಆ ಕ್ಷಣದಲ್ಲಿ ನನಗನ್ನಿಸಿತ್ತು. ಆದರೆ ನನ್ನ ಪುತ್ರ, ಪುತ್ರಿಯನ್ನು ನೆನಪಿಸಿಕೊಂಡು ಕೊನೆಯ ಉಸಿರಿರುವವರೆಗೂ ಹೋರಾಡಲು ನಿರ್ಧರಿಸಿದೆ ಎಂದು ಸ್ಮಿತ್ ನೆನಪಿಸಿಕೊಂಡಿದ್ದಾರೆ.

  ಬಾಗಿಲು ತೆರೆದ ಕೂಡಲೇ ಕಾಕ್‌ಪಿಟ್‌ಗೆ ಧಾವಿಸಿದ ಪ್ರಯಾಣಿಕರು ಮತ್ತು ಕ್ಯಾಬಿನ್ ಸಿಬ್ಬಂದಿ ದಾಳಿಕೋರನನ್ನು ನಿಯಂತ್ರಿಸಿದರು. ವಿಮಾನದಲ್ಲಿದ್ದ ಮತ್ತೊಬ್ಬ ಆಫ್-ಡ್ಯೂಟಿ ಕ್ಯಾಪ್ಟನ್ ವಿಮಾನದ ನಿಯಂತ್ರಣವನ್ನು ತೆಗೆದುಕೊಂಡು ಸೌದಿ ಅರೇಬಿಯಾದ ತಬೂಕ್ ವಿಮಾನ ನಿಲ್ದಾಣದಲ್ಲಿ ಸುರಕ್ಷಿತವಾಗಿ ಲ್ಯಾಂಡಿಂಗ್ ಮಾಡಿದರು.

  ಆಸ್ಪತ್ರೆಯ ಹಾಸಿಗೆಯಿಂದ ನಗುಮುಖದಿಂದಲೇ ಮಾತನಾಡಿದ ಕ್ಯಾಪ್ಟನ್ ಸ್ಮಿತ್, ನನ್ನ ಪ್ರಾಣ ಉಳಿಸಿದ ಸಿಬ್ಬಂದಿ, ಪ್ರಯಾಣಿಕರು ಹಾಗೂ ಅತ್ಯುತ್ತಮ ಚಿಕಿತ್ಸೆ ನೀಡಿದ ಯುಎಇ ಸರ್ಕಾರಕ್ಕೆ ನಾನು ಸದಾ ಚಿರಋಣಿ.