ಖ್ಯಾತ ಕಾದಂಬರಿಕಾರ ಜೆಫ್ರಿ ಆರ್ಚರ್ ನಿಧನ

•   Tue, Oct 06 2026 10:45:37 AM



• ಲಂಡನ್, ಅ.06 (DaijiworldNews/TA): ಬ್ರಿಟನ್‌ನ ಖ್ಯಾತ ಕಾದಂಬರಿಕಾರ ಹಾಗೂ ಮಾಜಿ ಸಂಸದ ಜೆಫ್ರಿ ಆರ್ಚರ್ (86) ನಿಧನರಾಗಿದ್ದಾರೆ. ಅಕ್ಟೋಬರ್ 5ರಂದು ತಮ್ಮ ಮನೆಯಲ್ಲಿ ಅವರು ನಿಧನರಾಗಿದ್ದು, ಸಾವಿನ ಕಾರಣವನ್ನು ಸಾರ್ವಜನಿಕವಾಗಿ ಬಹಿರಂಗಪಡಿಸಲಾಗಿಲ್ಲ ಎಂದು ಅವರ ಪ್ರಕಾಶಕ ಹಾರ್ಪರ್‌ಕಾಲಿನ್ಸ್ ತಿಳಿಸಿದೆ.

  

  ವಿಶ್ವದಾದ್ಯಂತ ಕೋಟ್ಯಂತರ ಓದುಗರನ್ನು ತಮ್ಮ ರೋಮಾಂಚಕ ಕಥೆಗಳ ಮೂಲಕ ಸೆಳೆದಿದ್ದ ಆರ್ಚರ್, ಐದು ದಶಕಗಳಿಗೂ ಹೆಚ್ಚು ಕಾಲ ಸಾಹಿತ್ಯ ಕ್ಷೇತ್ರದಲ್ಲಿ ಸಕ್ರಿಯರಾಗಿದ್ದರು. ಅವರ ಕೃತಿಗಳು 100ಕ್ಕೂ ಹೆಚ್ಚು ದೇಶಗಳಲ್ಲಿ ಓದುಗರನ್ನು ತಲುಪಿದ್ದು, 30 ಕೋಟಿಗೂ ಅಧಿಕ ಪ್ರತಿಗಳು ಮಾರಾಟವಾಗಿವೆ ಎಂದು ವರದಿಯಾಗಿದೆ.

  ಜೆಫ್ರಿ ಆರ್ಚರ್ ಕೇವಲ ಸಾಹಿತಿಯಾಗಿರಲಿಲ್ಲ. ತಮ್ಮ 29ನೇ ವಯಸ್ಸಿನಲ್ಲೇ ಬ್ರಿಟನ್‌ನ ಕನ್ಸರ್ವೇಟಿವ್ ಪಕ್ಷದ ಸಂಸದರಾಗಿದ್ದರು. ಮಾರ್ಗರೇಟ್ ಥ್ಯಾಚರ್ ನೇತೃತ್ವದ ಸರ್ಕಾರದ ಅವಧಿಯಲ್ಲಿ ಪಕ್ಷದ ಹಿರಿಯ ಹುದ್ದೆಯನ್ನೂ ಅವರು ನಿರ್ವಹಿಸಿದ್ದರು. ಆದರೆ ಅವರ ರಾಜಕೀಯ ಜೀವನ ವಿವಾದಗಳಿಂದ ಕೂಡಿತ್ತು. 2001ರಲ್ಲಿ ಸುಳ್ಳು ಸಾಕ್ಷ್ಯ ಮತ್ತು ನ್ಯಾಯದ ಹಾದಿಯನ್ನು ವಿರೂಪಗೊಳಿಸಿದ ಪ್ರಕರಣದಲ್ಲಿ ಅವರಿಗೆ ಜೈಲು ಶಿಕ್ಷೆ ವಿಧಿಸಲಾಯಿತು. ಜೈಲಿನಲ್ಲಿದ್ದ ಅವಧಿಯನ್ನೂ ಅವರು ಬರವಣಿಗೆಗೆ ಬಳಸಿಕೊಂಡರು.

  1976ರಲ್ಲಿ ‘Not a Penny More, Not a Penny Less’ ಕಾದಂಬರಿಯ ಮೂಲಕ ಸಾಹಿತ್ಯ ಲೋಕಕ್ಕೆ ಪ್ರವೇಶಿಸಿದ ಆರ್ಚರ್, 1979ರಲ್ಲಿ ಪ್ರಕಟವಾದ ‘Kane & Abel’ ಮೂಲಕ ಜಾಗತಿಕ ಖ್ಯಾತಿ ಗಳಿಸಿದರು. ಈ ಕೃತಿ ಹಲವು ಭಾಷೆಗಳಿಗೆ ಅನುವಾದಗೊಂಡು ಕೋಟ್ಯಂತರ ಪ್ರತಿಗಳು ಮಾರಾಟವಾಗಿವೆ. ಜೈಲಿನ ಅನುಭವದ ಆಧಾರದ ಮೇಲೆ ಅವರು ಬರೆದ ‘A Prison Diary’ ಕೂಡ ಓದುಗರ ಗಮನ ಸೆಳೆಯಿತು. ರಾಜಕೀಯ ಜೀವನದ ಏಳುಬೀಳುಗಳ ನಡುವೆಯೂ ಸಾಹಿತ್ಯವನ್ನು ಅವರು ಕೈಬಿಡಲಿಲ್ಲ.

  ವಿಶೇಷವೆಂದರೆ, ಆರ್ಚರ್ ಅವರ 31ನೇ ಹಾಗೂ ಕೊನೆಯ ಕಾದಂಬರಿ ‘Adam & Eve’ ಅಕ್ಟೋಬರ್ 6ರಂದು ಬಿಡುಗಡೆಯಾಗಬೇಕಿತ್ತು. ಆದರೆ ಪುಸ್ತಕ ಓದುಗರ ಕೈ ಸೇರುವ ಕೆಲವೇ ಗಂಟೆಗಳ ಮುನ್ನ, ಅಕ್ಟೋಬರ್ 5ರಂದು ಅವರು ನಿಧನರಾಗಿದ್ದಾರೆ. 86ನೇ ವಯಸ್ಸಿನಲ್ಲೂ ಬರವಣಿಗೆಯನ್ನು ಮುಂದುವರಿಸಿದ್ದ ಆರ್ಚರ್, ತಮ್ಮ ಕೊನೆಯ ದಿನಗಳವರೆಗೂ ಸಾಹಿತ್ಯ ರಚನೆಯಲ್ಲಿ ತೊಡಗಿಸಿಕೊಂಡಿದ್ದರು ಎಂದು ಪ್ರಕಾಶಕರು ತಿಳಿಸಿದ್ದಾರೆ. ರಾಜಕೀಯ ಪ್ರವೇಶದಿಂದ ಆರಂಭಿಸಿ, ವಿವಾದಗಳು, ಜೈಲುವಾಸ ಹಾಗೂ ಸಾಹಿತ್ಯ ಲೋಕದ ಅಪಾರ ಯಶಸ್ಸಿನವರೆಗೆ ಸಾಗಿದ ಜೆಫ್ರಿ ಆರ್ಚರ್ ಅವರ ಜೀವನ ಪಯಣ ಹಲವು ಏರಿಳಿತಗಳಿಂದ ಕೂಡಿತ್ತು. ಆದರೆ ವಿಶ್ವದಾದ್ಯಂತ ಕೋಟ್ಯಂತರ ಓದುಗರನ್ನು ಸಂಪಾದಿಸಿದ ಲೇಖಕರಾಗಿ ಅವರ ಸಾಹಿತ್ಯ ಪಯಣ ನೆನಪಿನಲ್ಲಿ ಉಳಿಯಲಿದೆ.