ಜಪಾನ್‌ನಲ್ಲಿ ವಿಚ್ಛೇದನಕ್ಕಾಗಿಯೇ ಇದೆ ದೇವಸ್ಥಾನ - ‘ಡಿವೋರ್ಸ್ ಟೆಂಪಲ್’ ಹಿಂದಿನ ಕಥೆ ಏನು?!

•   Mon, Sep 14 2026 11:24:13 AM



• ಜಪಾನ್, ಸೆ.14 (DaijiworldNews/TA): ಸಾಮಾನ್ಯವಾಗಿ ವೈವಾಹಿಕ ಜೀವನದಲ್ಲಿ ಸಮಸ್ಯೆಗಳು ಎದುರಾದಾಗ ದಂಪತಿಗಳು ದೇವಸ್ಥಾನಗಳಿಗೆ ತೆರಳಿ ಸಂಸಾರ ಸುಖವಾಗಿರಲಿ ಎಂದು ಪ್ರಾರ್ಥಿಸುವುದು ಸಾಮಾನ್ಯ. ಆದರೆ ಜಪಾನ್‌ನಲ್ಲಿ ಇದಕ್ಕೆ ಸಂಪೂರ್ಣ ಭಿನ್ನವಾದ ಉದ್ದೇಶ ಹೊಂದಿರುವ ವಿಶಿಷ್ಟ ದೇವಾಲಯವೊಂದಿದೆ. ವಿಚ್ಛೇದನ ಬಯಸುವ ಮಹಿಳೆಯರಿಗೆ ಆಶ್ರಯ ನೀಡುತ್ತಿದ್ದ ಈ ದೇವಾಲಯವನ್ನು ‘ಡಿವೋರ್ಸ್ ಟೆಂಪಲ್’ ಎಂದೇ ಕರೆಯಲಾಗುತ್ತದೆ. ಗಂಡನ ದೌರ್ಜನ್ಯದಿಂದ ಬಳಲುತ್ತಿದ್ದ ಮಹಿಳೆಯರು ಹಾಗೂ ಕೌಟುಂಬಿಕ ಜೀವನದಿಂದ ಮುಕ್ತಿ ಬಯಸುತ್ತಿದ್ದವರಿಗೆ ಈ ದೇವಾಲಯ ಒಂದು ಕಾಲದಲ್ಲಿ ಸುರಕ್ಷಿತ ತಾಣವಾಗಿತ್ತು. ಸುಮಾರು 700 ವರ್ಷಗಳ ಇತಿಹಾಸ ಹೊಂದಿರುವ ಈ ದೇವಾಲಯ ಇಂದಿಗೂ ಮಹಿಳಾ ಸಬಲೀಕರಣದ ಸಂಕೇತವಾಗಿ ಗುರುತಿಸಿಕೊಂಡಿದೆ.

  

  ಜಪಾನ್‌ನ ಕಾಮಕುರಾ ನಗರದಲ್ಲಿರುವ ಈ ದೇವಾಲಯಕ್ಕೆ ಸುಮಾರು 700 ವರ್ಷಗಳ ಇತಿಹಾಸವಿದೆ. ಇದರ ಮೂಲ ಹೆಸರು ಟೊಕೆಜಿ ದೇವಸ್ಥಾನ. ಬೌದ್ಧ ಸನ್ಯಾಸಿನಿ ಕಾಕುಸನ್ ಶಿಡೊ ಅವರೊಂದಿಗೆ ಈ ದೇವಾಲಯದ ಇತಿಹಾಸ ನಿಕಟವಾಗಿ ಬೆಸೆದುಕೊಂಡಿದೆ. 12 ಮತ್ತು 13ನೇ ಶತಮಾನದ ಜಪಾನಿನ ಸಮಾಜದಲ್ಲಿ ವಿಚ್ಛೇದನದ ಹಕ್ಕು ಬಹುತೇಕ ಪುರುಷರಿಗೆ ಮಾತ್ರ ಸೀಮಿತವಾಗಿತ್ತು. ಮಹಿಳೆಯರಿಗೆ ತಮ್ಮ ಇಚ್ಛೆಯಂತೆ ವೈವಾಹಿಕ ಬಂಧನದಿಂದ ಹೊರಬರಲು ಅವಕಾಶ ಇರಲಿಲ್ಲ. ಈ ಸಂದರ್ಭದಲ್ಲಿ ಸ್ವತಃ ಗಂಡನ ಕಿರುಕುಳ ಅನುಭವಿಸಿದ್ದ ಕಾಕುಸನ್ ಶಿಡೊ ಅವರು ಸನ್ಯಾಸ ದೀಕ್ಷೆ ಪಡೆದು, ತಮ್ಮಂತೆಯೇ ಕೌಟುಂಬಿಕ ಹಿಂಸೆಗೆ ಒಳಗಾದ ಮಹಿಳೆಯರಿಗೆ ಆಶ್ರಯ ನೀಡುವ ಉದ್ದೇಶದಿಂದ ಈ ದೇವಾಲಯವನ್ನು ಸ್ಥಾಪಿಸಿದರು ಎನ್ನಲಾಗಿದೆ.

  ಆ ಕಾಲದಲ್ಲಿ ಪುರುಷರು ವಿವಿಧ ಕಾರಣಗಳನ್ನು ನೀಡಿ ಪತ್ನಿಗೆ ವಿಚ್ಛೇದನ ನೀಡಬಹುದಾಗಿತ್ತು. ಆದರೆ ಮಹಿಳೆಯರಿಗೆ ಅದೇ ಹಕ್ಕು ಇರಲಿಲ್ಲ. ಗಂಡನ ದೌರ್ಜನ್ಯ ಎದುರಿಸುತ್ತಿದ್ದ ಮಹಿಳೆಯರಿಗೆ ವೈವಾಹಿಕ ಸಂಬಂಧದಿಂದ ಹೊರಬರುವುದು ಅತ್ಯಂತ ಕಷ್ಟಕರವಾಗಿತ್ತು. ಇಂತಹ ಪರಿಸ್ಥಿತಿಯಲ್ಲಿ ಗಂಡನ ಕ್ರೌರ್ಯದಿಂದ ತಪ್ಪಿಸಿಕೊಂಡು ಬರುವ ಮಹಿಳೆಯರಿಗೆ ಈ ದೇವಾಲಯದ ಬಾಗಿಲುಗಳು ತೆರೆದಿರುತ್ತಿದ್ದವು. ಇಲ್ಲಿ ಅವರಿಗೆ ಸುರಕ್ಷಿತ ಆಶ್ರಯ, ಮಾನಸಿಕ ನೆಮ್ಮದಿ ಹಾಗೂ ಆಧ್ಯಾತ್ಮಿಕ ಬೆಂಬಲ ದೊರೆಯುತ್ತಿತ್ತು. ಜೊತೆಗೆ ಸ್ವಾವಲಂಬಿ ಜೀವನ ನಡೆಸಲು ಅಗತ್ಯವಾದ ತರಬೇತಿಯನ್ನೂ ನೀಡಲಾಗುತ್ತಿತ್ತು.

  ಈ ದೇವಾಲಯ ಕೇವಲ ಆಶ್ರಯ ನೀಡುವುದಕ್ಕೆ ಸೀಮಿತವಾಗಿರಲಿಲ್ಲ. ಅಲ್ಲಿಗೆ ಬಂದು ನೆಲೆಸಿದ ಮಹಿಳೆಯರಿಗೆ ವೈವಾಹಿಕ ಬಂಧನದಿಂದ ಕಾನೂನುಬದ್ಧವಾಗಿ ಹೊರಬರುವ ಅವಕಾಶವೂ ಇತ್ತು. ಆರಂಭದಲ್ಲಿ ದೇವಾಲಯದಲ್ಲಿ ಮೂರು ವರ್ಷಗಳ ಕಾಲ ವಾಸಿಸಿದ ಬಳಿಕ ವಿಚ್ಛೇದನ ಪಡೆಯುವ ಅವಕಾಶ ಇತ್ತು. ನಂತರ ಈ ಅವಧಿಯನ್ನು ಎರಡು ವರ್ಷಗಳಿಗೆ ಇಳಿಸಲಾಯಿತು ಎಂದು ಇತಿಹಾಸ ಹೇಳುತ್ತದೆ. ಹೀಗಾಗಿ ಈ ದೇವಾಲಯ ಮಹಿಳೆಯರಿಗೆ ಕೌಟುಂಬಿಕ ಹಿಂಸೆಯಿಂದ ಹೊರಬಂದು ಹೊಸ ಜೀವನ ಆರಂಭಿಸಲು ನೆರವಾಗುವ ಪ್ರಮುಖ ತಾಣವಾಗಿ ಗುರುತಿಸಿಕೊಂಡಿತ್ತು.

  ಮಹಿಳೆಯರ ಸುರಕ್ಷತೆಯನ್ನು ಖಚಿತಪಡಿಸುವ ಉದ್ದೇಶದಿಂದ 1902ರವರೆಗೆ ದೇವಾಲಯಕ್ಕೆ ಪುರುಷರ ಪ್ರವೇಶವನ್ನು ಕಟ್ಟುನಿಟ್ಟಾಗಿ ನಿರ್ಬಂಧಿಸಲಾಗಿತ್ತು. ಮಹಿಳೆಯರಿಗೆ ಸಂಪೂರ್ಣ ಸುರಕ್ಷಿತ ವಾತಾವರಣ ಕಲ್ಪಿಸುವುದು ಇದರ ಪ್ರಮುಖ ಉದ್ದೇಶವಾಗಿತ್ತು. ಆದರೆ ನಂತರ ದೇವಾಲಯದ ಆಡಳಿತ ಮತ್ತು ಉಸ್ತುವಾರಿಯನ್ನು ಎಂಗಾಕು-ಜಿ ಮಠ ವಹಿಸಿಕೊಂಡ ಬಳಿಕ ಹಲವು ನಿಯಮಗಳಲ್ಲಿ ಬದಲಾವಣೆಗಳಾದವು. ಪುರುಷ ಮಠಾಧೀಶರನ್ನು ನೇಮಿಸುವ ವ್ಯವಸ್ಥೆಯೂ ಜಾರಿಗೆ ಬಂತು.

  ಇಂದು ಈ ದೇವಾಲಯವು ಹಿಂದಿನ ರೀತಿಯಲ್ಲಿ ವಿಚ್ಛೇದನ ಆಶ್ರಯತಾಣವಾಗಿ ಕಾರ್ಯನಿರ್ವಹಿಸದಿದ್ದರೂ, ಮಹಿಳೆಯರ ಹಕ್ಕು, ಸ್ವಾತಂತ್ರ್ಯ ಹಾಗೂ ಕೌಟುಂಬಿಕ ದೌರ್ಜನ್ಯದ ವಿರುದ್ಧದ ಹೋರಾಟದ ಐತಿಹಾಸಿಕ ಸಂಕೇತವಾಗಿ ಗುರುತಿಸಿಕೊಂಡಿದೆ. ಮದುವೆ ಜೀವನ ಸುಖವಾಗಿರಲಿ ಎಂದು ದೇವಾಲಯಗಳಿಗೆ ತೆರಳುವ ಸಂಪ್ರದಾಯದ ನಡುವೆ, ಮಹಿಳೆಯರಿಗೆ ದೌರ್ಜನ್ಯದ ಸಂಬಂಧದಿಂದ ಹೊರಬರಲು ಆಶ್ರಯ ನೀಡಿದ ಈ ‘ಡಿವೋರ್ಸ್ ಟೆಂಪಲ್’ ಜಪಾನ್‌ನ ವಿಶಿಷ್ಟ ಸಾಮಾಜಿಕ ಇತಿಹಾಸವನ್ನು ಪರಿಚಯಿಸುವ ತಾಣವಾಗಿದೆ.