ಯುಎಇಯಲ್ಲಿ ಇರಾನ್ ದಾಳಿ ವೀಡಿಯೋ ಮಾಡಿದರೆ ಬಂಧನ; ಈವರೆಗೆ 45 ಮಂದಿ ಅರೆಸ್ಟ್

•   Sat, Mar 14 2026 05:24:10 PM



• ಅಬುಧಾಬಿ, ಮಾ. 14 (DaijiworldNews/AA): ಯುಎಇಯಲ್ಲಿ ಇರಾನ್ ದಾಳಿಯ ವೀಡಿಯೋ ಮಾಡಿದವರನ್ನು ಅಬುಧಾಬಿ ಪೊಲೀಸರು ಬಂಧಿಸುತ್ತಿದ್ದು, ಇದುವರೆಗೆ ಸುಮಾರು 45 ಮಂದಿಯನ್ನು ಪೊಲೀಸರು ಬಂಧಿಸಿದ್ದಾರೆ ಎಂದು ತಿಳಿದುಬಂದಿದೆ.

  ಇರಾನ್ ನಡೆಸಿದ ದಾಳಿಯನ್ನು ವೀಡಿಯೋ ಮಾಡಿ ಸಾಮಾಜಿಕ ಮಾಧ್ಯಮ ವೇದಿಕೆಗಳಲ್ಲಿ ಪೋಸ್ಟ್ ಮಾಡಿದ್ದಕ್ಕಾಗಿ ವಿವಿಧ ಭಾಗದ 45 ಜನರನ್ನು ಬಂಧಿಸಲಾಗಿದೆ. ದಾಳಿಯ ವೀಡಿಯೋ ಹಂಚಿಕೊಳ್ಳುವುದು ಸಾರ್ವಜನಿಕ ಅಭಿಪ್ರಾಯವನ್ನು ಪ್ರಚೋದಿಸುವ ಮತ್ತು ಸಮುದಾಯದಲ್ಲಿ ವದಂತಿಗಳನ್ನು ಹರಡಿ ದಾರಿತಪ್ಪಿಸುವ ಕೃತ್ಯವಾಗಿದೆ ಎಂದು ಪೊಲೀಸರು ತಿಳಿಸಿದ್ದಾರೆ.

  ಇದು ಪತ್ರಿಕೋದ್ಯಮ ಅಥವಾ ಎಲ್ಲಾ ರೆಕಾರ್ಡಿಂಗ್‌ನ ನಿಷೇಧವಲ್ಲ. ನೇರ ಭದ್ರತಾ ಬಿಕ್ಕಟ್ಟಿನ ಸಂದರ್ಭದಲ್ಲಿ ಸೂಕ್ಷ್ಮ ಅಥವಾ ಪರಿಶೀಲಿಸದ ವೀಡಿಯೋ, ಮಾಹಿತಿ ಹಂಚಿಕೊಳ್ಳುವುದರ ವಿರುದ್ಧ ಜರುಗಿಸುವ ಕ್ರಮವಾಗಿದೆ.

  ಮಾರ್ಚ್ ಮೊದಲ ವಾರ ಯುಎಇ ಅಟಾರ್ನಿ ಜನರಲ್ ಡಾ. ಹಮದ್ ಸೈಫ್ ಅಲ್ ಶಮ್ಸಿ ಅವರು ಈ ಬಗ್ಗೆ ಎಚ್ಚರಿಕೆ ನೀಡಿದ್ದರು. ದಾಳಿ ನಡೆದ ಸ್ಥಳಗಳ ಫೋಟೋ ತೆಗೆಯುವುದು, ಪ್ರಕಟಿಸುವುದು ಅಥವಾ ಪ್ರಸಾರ ಮಾಡುವುದು, ತಪ್ಪಾದ ಮಾಹಿತಿ ಹಂಚಿಕೊಳ್ಳುವುದು ಸಾರ್ವಜನಿಕರಲ್ಲಿ ಭಯವನ್ನು ಉಂಟುಮಾಡಬಹುದು. ದೇಶದ ನೈಜ ಪರಿಸ್ಥಿತಿಯ ಬಗ್ಗೆ ತಪ್ಪು ಅಭಿಪ್ರಾಯವನ್ನು ಉಂಟುಮಾಡಬಹುದು ಎಂದು ಈ ಮೊದಲೇ ಅಧಿಕಾರಿಗಳು ಎಚ್ಚರಿಕೆ ನೀಡಿದ್ದರು.

  ಸೈಬರ್ ಅಪರಾಧದ ಕಾನೂನುಗಳನ್ನು ಉಲ್ಲಂಘಿಸುವ, ಸುಳ್ಳು ಸುದ್ದಿಗಳನ್ನು ಪ್ರಕಟಿಸುವ ಅಥವಾ ಮರುಪ್ರಕಟಿಸುವ, ದಾರಿತಪ್ಪಿಸುವ ವರದಿಗಳು ಅಥವಾ ಅಧಿಕೃತವಾಗಿ ಘೋಷಿಸಲಾದ ಮಾಹಿತಿಗೆ ವಿರುದ್ಧವಾಗಿ ವದಂತಿಗಳನ್ನು ಆನ್‌ಲೈನ್‌ನಲ್ಲಿ ಪ್ರಕಟಿಸುವ ಯಾರಿಗಾದರೂ ಕನಿಷ್ಠ ಒಂದು ವರ್ಷ ಜೈಲು ಶಿಕ್ಷೆ ಮತ್ತು ಕನಿಷ್ಠ AED 100,000 ದಂಡ ವಿಧಿಸಲಾಗುತ್ತದೆ. ಆದರೆ ಇದೀಗ ಯುದ್ಧದ ಸಮಯದಲ್ಲಿ ಜನರಲ್ಲಿ ಭಯವನ್ನು ಉಂಟುಮಾಡುವ ಅಥವಾ ಸಾರ್ವಜನಿಕ ಭದ್ರತೆಗೆ ಹಾನಿ ಮಾಡುವ, ಯುಎಇಯ ಯಾವುದೇ ಅಧಿಕಾರಿಗಳ ವಿರುದ್ಧ ಸಾರ್ವಜನಿಕ ಅಭಿಪ್ರಾಯವನ್ನು ಕೆರಳಿಸುವ ಗಂಭೀರ ಪ್ರಕರಣಗಳಲ್ಲಿ, ಕನಿಷ್ಠ ಎರಡು ವರ್ಷಗಳ ಜೈಲು ಶಿಕ್ಷೆ ಮತ್ತು ಕನಿಷ್ಠAED 200,000 ದಂಡ ವಿಧಿಸಬಹುದಾಗಿದೆ.