'ಇರಾನ್ ಜೊತೆಗಿನ ಯುದ್ಧ ಶೀಘ್ರ ಅಂತ್ಯ ಸಾಧ್ಯ' - ಡೊನಾಲ್ಡ್ ಟ್ರಂಪ್ ಹೇಳಿಕೆ

•   Thu, Mar 12 2026 10:36:28 AM



• ವಾಷಿಂಗ್ಟನ್, ಮಾ. 12 (DaijiworldNews/TA): ಇರಾನ್‌ನೊಂದಿಗಿನ ಯುದ್ಧ ಶೀಘ್ರದಲ್ಲೇ ಅಂತ್ಯಗೊಳ್ಳುವ ಸಾಧ್ಯತೆ ಇದೆ ಎಂದು ಅಮೇರಿಕಾ ಅಧ್ಯಕ್ಷ ಡೊನಾಲ್ಡ್ ಟ್ರಂಪ್ ತಿಳಿಸಿದ್ದಾರೆ. ಅಮೇರಿಕಾ ಹಾಗೂ ಇಸ್ರೇಲ್ ಸೇನೆಗಳು ಇರಾನ್‌ನಲ್ಲಿ ಪ್ರಮುಖ ಗುರಿಗಳನ್ನು ಈಗಾಗಲೇ ನಾಶಪಡಿಸಿದ್ದಾಗಿ ಅವರು ಹೇಳಿದ್ದಾರೆ.

  

  ಈ ಕುರಿತು ಮಾತನಾಡಿದ ಟ್ರಂಪ್, “ಇರಾನ್‌ನಲ್ಲಿ ಗುರಿಯಾಗಿಸಲು ಪ್ರಾಯೋಗಿಕವಾಗಿ ಇನ್ನೇನೂ ಉಳಿದಿಲ್ಲ. ಮಿಲಿಟರಿ ಕಾರ್ಯಾಚರಣೆಗಳಿಂದ ಅವರಿಗೆ ಭಾರೀ ಹಾನಿಯಾಗಿದೆ” ಎಂದು ಹೇಳಿದ್ದಾರೆ. ಇರಾನ್‌ನ ಕ್ಷಿಪಣಿಗಳು ಚದುರಿಹೋಗಿವೆ ಮತ್ತು ಅವರ ಡ್ರೋನ್‌ಗಳನ್ನು ಎಲ್ಲೆಡೆ ಸ್ಫೋಟಿಸಲಾಗುತ್ತಿದೆ ಎಂದು ಟ್ರಂಪ್ ತಿಳಿಸಿದ್ದಾರೆ. ಜೊತೆಗೆ ಡ್ರೋನ್ ಉತ್ಪಾದನೆಯೂ ಸ್ಥಗಿತಗೊಂಡಿದೆ ಎಂದು ಹೇಳಿದ್ದಾರೆ.

  ಇರಾನ್‌ನ ನೌಕಾಪಡೆ, ವಾಯುಪಡೆ ಮತ್ತು ಮಿಲಿಟರಿ ಮೇಲೆ ಟೆಹ್ರಾನ್ ಸರ್ಕಾರಕ್ಕೆ ಈಗ ಯಾವುದೇ ಹಿಡಿತ ಅಥವಾ ಸಾಮರ್ಥ್ಯ ಇಲ್ಲ ಎಂದು ಟ್ರಂಪ್ ಆರೋಪಿಸಿದ್ದಾರೆ. “ಅವರು ಮತ್ತೆ ಯಾವುದೇ ತಪ್ಪು ಹೆಜ್ಜೆ ಇಟ್ಟರೆ ಅದು ಇರಾನ್‌ನ ಅಂತ್ಯವಾಗಬಹುದು. ಆಗ ಆ ದೇಶದ ಹೆಸರನ್ನೇ ಮತ್ತೆ ಕೇಳಲು ಸಾಧ್ಯವಾಗದಿರಬಹುದು” ಎಂದು ಅವರು ಎಚ್ಚರಿಕೆ ನೀಡಿದ್ದಾರೆ. “ಯುದ್ಧ ಕಾರ್ಯಾಚರಣೆ ನಿರೀಕ್ಷೆಗಿಂತ ಹೆಚ್ಚು ಯಶಸ್ವಿಯಾಗಿ ನಡೆಯುತ್ತಿದೆ. ಮೊದಲ ಆರು ವಾರಗಳಲ್ಲೇ ನಾವು ಊಹಿಸಿದ್ದಕ್ಕಿಂತ ಹೆಚ್ಚಿನ ಹಾನಿಯನ್ನು ಇರಾನ್‌ಗೆ ಉಂಟು ಮಾಡಿದ್ದೇವೆ” ಎಂದು ಟ್ರಂಪ್ ಹೇಳಿದ್ದಾರೆ.