'ಮೋದಿ ಜೀ, ನ್ಯಾಯ ಕೊಡಿಸಿ' - ಪ್ರಧಾನಿಗೆ ಪಾಕ್ ಮಹಿಳೆಯ ಮನವಿ!

•   Sun, Dec 07 2025 10:41:16 AM



• ಪಾಕಿಸ್ತಾನ, ಡಿ. 07 (DaijiworldNews/TA): ಭಾರತ-ಪಾಕಿಸ್ತಾನ ಸಂಬಂಧಗಳ ನಡುವೆ ಮಾನವೀಯ ಹಕ್ಕುಗಳ ಪ್ರಶ್ನೆಯನ್ನು ಕೇಂದ್ರೀಕರಿಸಿದ ಪ್ರಕರಣವೊಂದು ಈ ಮಧ್ಯೆ ಬೆಳಕಿಗೆ ಬಂದಿದೆ. ಪಾಕಿಸ್ತಾನದ ಕರಾಚಿ ನಿವಾಸಿ ನಿಕಿತಾ ನಾಗ್ದೇವ್, ತಮ್ಮ ಗಂಡ ವಿಕ್ರಮ್ ನಾಗ್ದೇವ್ ಅವರ ವಿರುದ್ಧ ಗಂಭೀರ ಆರೋಪಗಳನ್ನು ಹೊರ ಹಾಕಿ, ಪ್ರಧಾನಮಂತ್ರಿ ನರೇಂದ್ರ ಮೋದಿ ಸೇರಿದಂತೆ ಭಾರತದ ಕಾನೂನು ವ್ಯವಸ್ಥೆಯಿಂದ ನ್ಯಾಯ ಕೋರಿ ಮನವಿ ಮಾಡಿದ್ದಾರೆ. ಅವರ ವೀಡಿಯೊ ಸಂದೇಶ ಇದೀಗ ಎರಡೂ ದೇಶಗಳ ಸಾಮಾಜಿಕ ಮಾಧ್ಯಮಗಳಲ್ಲಿ ವ್ಯಾಪಕ ಚರ್ಚೆಗೆ ಕಾರಣವಾಗಿದೆ.

  

  ಕರಾಚಿಯಲ್ಲಿ ಜನವರಿ 26, 2020ರಂದು ಹಿಂದೂ ಸಂಪ್ರದಾಯದಂತೆ ನಿಕಿತಾ ಮತ್ತು ವಿಕ್ರಮ್ ನಾಗ್ದೇವ್ ದಾಂಪತ್ಯ ಜೀವನಕ್ಕೆ ಕಾಲಿಟ್ಟರು. ದೀರ್ಘಾವಧಿ ವೀಸಾದ ಮೇಲೆ ಭಾರತದಲ್ಲಿ ವಾಸಿಸುತ್ತಿದ್ದ ಪಾಕಿಸ್ತಾನಿ ಮೂಲದ ವಿಕ್ರಮ್, ಮದುವೆಯ ನಂತರ ಒಂದೇ ತಿಂಗಳ ಬಳಿಕ ಫೆಬ್ರವರಿ 26ರಂದು ಭಾರತಕ್ಕೆ ಮರಳಿದರು. ಈ ವೇಳೆ ನಿಕಿತಾ ಶೀಘ್ರದಲ್ಲೇ ಭಾರತಕ್ಕೆ ಕರೆಸಿಕೊಳ್ಳಲ್ಪಡುವ ನಿರೀಕ್ಷೆಯಲ್ಲಿದ್ದರೂ, ಅಲ್ಲಿಂದ ಅವರ ಜೀವನದಲ್ಲಿ ಸಂಕಷ್ಟಗಳು ಆರಂಭವಾದವು.

  ನಿಕಿತಾ ಹೇಳುವ ಪ್ರಕಾರ, ಜುಲೈ 9, 2020ರಂದು ವೀಸಾದ ತಾಂತ್ರಿಕ ಕಾರಣವನ್ನು ನೀಡಿ, ಅವರನ್ನು ಅಟ್ಟಾರಿ ಗಡಿಯಲ್ಲಿ ಬಲವಂತವಾಗಿ ಇಳಿಸಿ ಪಾಕಿಸ್ತಾನಕ್ಕೆ ಹಿಂತಿರುಗಿಸಲಾಯಿತು. ಆಗಿನಿಂದಲೂ ವಿಕ್ರಮ್ ಅವರು ಅವರನ್ನು ಭಾರತಕ್ಕೆ ಕರೆಸಿಕೊಳ್ಳಲು ಯಾವುದೇ ಪ್ರಯತ್ನ ಮಾಡಿಲ್ಲವೆಂದು ಅವರು ಆರೋಪಿಸಿದ್ದಾರೆ. “ನ್ಯಾಯಕ್ಕಾಗಿ ನಾನು ಬೇಡಿಕೊಳ್ಳುತ್ತಿದ್ದೇನೆ. ನನ್ನನ್ನು ಯಾರೂ ಕೇಳಿಕೊಳ್ಳದಿದ್ದರೆ ಅನೇಕ ಮಹಿಳೆಯರು ಕಾನೂನು ವ್ಯವಸ್ಥೆಯ ಮೇಲೆ ನಂಬಿಕೆ ಕಳೆದುಕೊಳ್ಳುತ್ತಾರೆ,” ಎಂದು ಅವರು ನೋವಿನಿಂದ ಹೇಳಿದರು.

  ತಮ್ಮ ಮದುವೆಯ ನಂತರ ಅತ್ತೆಯ ಮನೆಗಳಲ್ಲಿ ಎದುರಿಸಿದ ವರ್ತನೆಯ ಬದಲಾವಣೆ, ಗಂಡನಿಗೆ ತಮ್ಮದೇ ಸಂಬಂಧಿಕೆಯೊಂದಿಗಿನ ಅಕ್ರಮ ಸಂಬಂಧವಿರುವ ಶಂಕೆ ಮತ್ತು ಇದನ್ನು ಮನೆಯಿಂದ ಲಘುವಾಗಿ ತಳ್ಳಿ ಹಾಕಿದ ಘಟನೆಗಳು ನಿಕಿತಾಳನ್ನು ಮತ್ತಷ್ಟು ಅಸಮಾಧಾನಕ್ಕೆ ದೂಡಿದವು. ಕೋವಿಡ್–19 ಲಾಕ್‌ಡೌನ್ ವೇಳೆಯಲ್ಲಿ ವಿಕ್ರಮ್ ಅವರನ್ನು ಪಾಕಿಸ್ತಾನದಲ್ಲೇ ಉಳಿಯುವಂತೆ ಒತ್ತಾಯಿಸಿದರು. ಅಲ್ಲಿದ್ದಾಗಲೇ ದೆಹಲಿಯ ಮತ್ತೊಬ್ಬ ಮಹಿಳೆಯೊಂದಿಗೆ ವಿಕ್ರಮ್ ತಮ್ಮ ಎರಡನೇ ಮದುವೆಯ ಸಿದ್ಧತೆ ನಡೆಸುತ್ತಿರುವುದನ್ನು ನಿಕಿತಾ ತಿಳಿದುಕೊಂಡರು. ಇದರಿಂದ ತಮ್ಮ ವೈವಾಹಿಕ ಜೀವನಕ್ಕೆ ಭಾರೀ ಹೊಡೆತ ಬಿದ್ದಿದೆ ಎಂದು ಅವರು ಹೇಳಿದ್ದಾರೆ.

  ಈ ಹಿನ್ನೆಲೆಯಲ್ಲಿ ನಿಕಿತಾ ಜನವರಿ 27, 2025ರಂದು ಅಧಿಕೃತವಾಗಿ ದೂರು ದಾಖಲಿಸಿದರು. ಪ್ರಕರಣವನ್ನು ಸಿಂಧಿ ಪಂಚ ಮಧ್ಯಸ್ಥಿಕೆ ಮತ್ತು ಕಾನೂನು ಸಲಹೆ ಕೇಂದ್ರ ವಹಿಸಿಕೊಂಡು ವಿಕ್ರಮ್ ಹಾಗೂ ಎರಡನೇ ವಧುವಿಗೆ ನೋಟೀಸ್ ನೀಡಿತು. ವಿಚಾರಣೆ ನಡೆದರೂ ಮಧ್ಯಸ್ಥಿಕೆ ವಿಫಲವಾಯಿತು. ಏಪ್ರಿಲ್ 30, 2025ರಂದು ಕೇಂದ್ರವು ಸಲ್ಲಿಸಿದ ವರದಿ ಪ್ರಕಾರ, ಇಬ್ಬರೂ ಭಾರತೀಯರಲ್ಲದ ಕಾರಣ ಪ್ರಕರಣವು ಪಾಕಿಸ್ತಾನದ ನ್ಯಾಯವ್ಯಾಪ್ತಿಗೆ ಒಳಪಡುವುದಾಗಿ ತಿಳಿಸಿದೆ. ಜೊತೆಗೆ ವಿಕ್ರಮ್ ಅವರನ್ನು ಪಾಕಿಸ್ತಾನಕ್ಕೆ ಗಡೀಪಾರು ಮಾಡಬೇಕೆಂದು ಶಿಫಾರಸು ಮಾಡಲಾಗಿದೆ.

  ಪ್ರಕರಣವು ಇದೀಗ ಇಂದೋರ್ ಆಡಳಿತದ ಗಮನಕ್ಕೂ ತಲುಪಿದ್ದು, ಕಳೆದ ಮೇ ತಿಂಗಳಲ್ಲಿ ಸಾಮಾಜಿಕ ಪಂಚಾಯತ್ ಕೂಡ ವಿಕ್ರಮ್ ಅವರನ್ನು ಗಡೀಪಾರು ಮಾಡಲು ಸೂಚಿಸಿತ್ತು. “ತನಿಖೆ ನಡೆಯುತ್ತಿದೆ. ವರದಿಯ ಆಧಾರದ ಮೇಲೆ ಮುಂದಿನ ಕ್ರಮ ಕೈಗೊಳ್ಳಲಾಗುವುದು,” ಎಂದು ಇಂದೋರ್ ಕಲೆಕ್ಟರ್ ಆಶಿಷ್ ಸಿಂಗ್ ತಿಳಿಸಿದ್ದಾರೆ. ಪರಿಸ್ಥಿತಿ ಈಗ ಎರಡೂ ದೇಶಗಳ ನ್ಯಾಯಾಂಗ ಮತ್ತು ಆಡಳಿತಾತ್ಮಕ ವ್ಯವಸ್ಥೆಗಳ ನಡುವೆ ಮಾನವೀಯ ಪ್ರಕರಣವಾಗಿ ಪರಿಣಮಿಸಿದ್ದು, ಮುಂದಿನ ಬೆಳವಣಿಗೆಗಳತ್ತ ಎಲ್ಲರ ದೃಷ್ಟಿ ನಟ್ಟಿದೆ.