ಭಾರತೀಯ ಮಹಿಳೆಗೆ ಚೀನೀ ಅಧಿಕಾರಿಗಳ ಕಿರಿಕ್

•   Tue, Nov 25 2025 08:53:41 AM



• ನವದೆಹಲಿ, ನ. 25 (DaijiworldNews/TA): ಅರುಣಾಚಲ ಪ್ರದೇಶದಲ್ಲಿ ಜನಿಸಿ ಭಾರತೀಯ ಪಾಸ್‌ಪೋರ್ಟ್ ಹೊಂದಿರುವ ಯುಕೇ ವಾಸಿ ಪೆಮ್ ವ್ಯಾಂಗ್ ತೋಂಗ್‌ಡೋಕ್ ಅವರನ್ನು ಚೀನಾದ ಶಾಂಘೈ ಪುಡೋಂಗ್ ಅಂತಾರಾಷ್ಟ್ರೀಯ ವಿಮಾನ ನಿಲ್ದಾಣದಲ್ಲಿ ಅಧಿಕಾರಿಗಳು 18 ಗಂಟೆಗಳ ಕಾಲ ವಶಕ್ಕೆ ತೆಗೆದುಕೊಂಡಿರುವ ಘಟನೆ ಬೆಳಕಿಗೆ ಬಂದಿದೆ. ತಮ್ಮ ಎಕ್ಸ್‌ ಖಾತೆಯ ಮೂಲಕ ಪೋಸ್ಟ್‌ಗಳ ಸರಣಿ ಹಾಕಿ ಈ ಅನುಭವವನ್ನು ತೋಂಗ್‌ಡೋಕ್ ಹಂಚಿಕೊಂಡಿದ್ದಾರೆ.

  

  ಲಂಡನ್‌ನಿಂದ ಜಪಾನ್‌ಗೆ ಪ್ರಯಾಣಿಸುತ್ತಿದ್ದ ವೇಳೆ ನವೆಂಬರ್ 21ರಂದು ಈ ಘಟನೆ ನಡೆದಿದೆ. ವಲಸೆ ವಿಭಾಗದ ತಪಾಸಣೆಯ ನಂತರ ಅಧಿಕಾರಿಗಳು ಅವರ ಪಾಸ್‌ಪೋರ್ಟ್ ಪಡೆದು, ಕೆಲವು ಕ್ಷಣಗಳ ಬಳಿಕ ಮತ್ತೆ ಕರೆದುಕೊಂಡು ಹೋಗಿ ವಿಚಾರಣೆ ನಡೆಸಿದರು. “ನಿಮ್ಮ ಜನ್ಮಸ್ಥಳ ಅರುಣಾಚಲ ಪ್ರದೇಶ ಚೀನಾದ ಭೂಭಾಗ. ಆದ್ದರಿಂದ ನಿಮ್ಮ ಭಾರತೀಯ ಪಾಸ್‌ಪೋರ್ಟ್ ಮಾನ್ಯವಲ್ಲ,” ಎಂದು ಅಧಿಕಾರಿಗಳು ತಿಳಿಸಿದರೆಂದು ತೋಂಗ್‌ಡೋಕ್ ಹೇಳಿದ್ದಾರೆ.

  ವಿಮಾನ ಹತ್ತಲು ನಿರಾಕರಣೆ : ಜಪಾನ್‌ಗೆ ತೆರಳಲು ಸಿದ್ದವಾಗಿದ್ದ ತೋಂಗ್‌ಡೋಕ್ ಅವರ ಪ್ರಯಾಣವನ್ನು ತಡೆಯಲಾಗಿದೆ. ಹೊಸ ಟಿಕೆಟ್ ಖರೀದಿಸಿದರೆ ಮಾತ್ರ ಪ್ರಯಾಣಕ್ಕೆ ಅವಕಾಶ ನೀಡಲಾಗುತ್ತದೆ ಎಂದು ಚೀನೀ ಅಧಿಕಾರಿಗಳು ಸೂಚಿಸಿದರೆಂದು ಅವರು ಹೇಳಿದ್ದಾರೆ.

  ತಕ್ಷಣದ ಕರೆ - ಭಾರತದ ಹಸ್ತಕ್ಷೇಪ : ಸ್ಥಳೀಯ ಸಂಪರ್ಕಗಳ ನೆರವಿನಿಂದ ತೋಂಗ್‌ಡೋಕ್ ಶಾಂಘೈಯಲ್ಲಿನ ಭಾರತೀಯ ರಾಯಭಾರಿ ಕಚೇರಿಯನ್ನು ಸಂಪರ್ಕಿಸಿದರು. ಬಳಿಕ ಭಾರತೀಯ ಅಧಿಕಾರಿಗಳು ಮಧ್ಯಪ್ರವೇಶ ಮಾಡಿದ್ದು, ಅವರ ಹೊರಗಡೆ ಪ್ರಯಾಣಕ್ಕೆ ವ್ಯವಸ್ಥೆ ಮಾಡಿಕೊಟ್ಟಿದ್ದಾರೆ.

  ಸಾಮಾಜಿಕ ಜಾಲತಾಣದಲ್ಲಿ ಆಕ್ರೋಶ: ತೋಂಗ್‌ಡೋಕ್ ಅವರು ಈ ಘಟನೆ ಕುರಿತು ಅರುಣಾಚಲ ಪ್ರದೇಶ ಮುಖ್ಯಮಂತ್ರಿ ಪ್ರೇಮ್ ಖಂಡು, ಕೇಂದ್ರ ಸಚಿವ ಕಿರಣ್ ರಿಜಿಜು ಹಾಗೂ ಪ್ರಧಾನಿ ಕಚೇರಿಯನ್ನು ಟ್ಯಾಗ್‌ ಮಾಡಿ ಪ್ರಶ್ನಿಸಿದ್ದಾರೆ. “ಅರುಣಾಚಲ ಪ್ರದೇಶ ಚೀನಾದ ಭಾಗವೆಂದರೆ, ನನ್ನ ಭಾರತೀಯ ಪಾಸ್‌ಪೋರ್ಟ್ ಮಾನ್ಯವಲ್ಲವೆ? ಇದು ನಿಜವಾಗಿಯೂ ನ್ಯಾಯವೆ?”

  ಈ ಘಟನೆ ಚೀನಾ–ಭಾರತ ಗಡಿದ್ವಂದ್ವ ಮತ್ತು ಅರುಣಾಚಲ ಪ್ರದೇಶದ ಮಾಲೀಕತ್ವದ ಕುರಿತು ನಡೆಯುತ್ತಿರುವ ವಿವಾದಕ್ಕೆ ಮತ್ತೊಂದು ಸಂವೇದನಾಶೀಲ ಅಂಶ ಸೇರಿಸಿದೆ.

  @pemakhandu @kirenrijuju @PMOIndia I was held at Shanghai airport for over 18 hrs on 21st Nov, 2025 on claims by China immigration & @chinaeasternair They called my Indian passport invalid as my birthplace is Arunachal Pradesh which they claimed is Chinese territory. @cnnbrk

  — Pem Wang Thongdok (@wang_pem) November 23, 2025