ನ್ಯೂಯಾರ್ಕ್ ಮೇಯರ್ ಆಗುತ್ತಿದ್ದಂತೆ ಟ್ರಂಪ್​ಗೆ ಮಮ್ದಾನಿ ಎಚ್ಚರಿಕೆ!

•   Thu, Nov 06 2025 11:39:49 AM



• ನ್ಯೂಯಾರ್ಕ್, ನ. 06 (DaijiworldNews/TA): ಭಾರತೀಯ ಮೂಲದ ಜೋಹ್ರಾನ್ ಮಮ್ದಾನಿ ನ್ಯೂಯಾರ್ಕ್ ನಗರದ ಮೇಯರ್ ಚುನಾವಣೆಯಲ್ಲಿ ಗೆದ್ದು ಇತಿಹಾಸ ನಿರ್ಮಿಸಿದ್ದಾರೆ. ಕೇವಲ 34 ವರ್ಷ ವಯಸ್ಸಿನ ಮಮ್ದಾನಿ, ಅಮೆರಿಕದ ರಾಜಕೀಯದಲ್ಲಿ ವಲಸಿಗರ ಶಕ್ತಿಯ ಹೊಸ ಅಧ್ಯಾಯ ಬರೆದಿದ್ದಾರೆ. ಅವರು ಶೇಕಡಾ 50 ಕ್ಕಿಂತ ಹೆಚ್ಚು ಮತಗಳನ್ನು ಪಡೆದು ನ್ಯೂಯಾರ್ಕ್‌ನ ಹೊಸ ಮೇಯರ್ ಆಗಿ ಆಯ್ಕೆಯಾಗಿದ್ದಾರೆ.

  

  ಮಮ್ದಾನಿ ಅವರು ಪ್ರಸಿದ್ಧ ಭಾರತೀಯ ಚಲನಚಿತ್ರ ನಿರ್ದೇಶಕಿ ಮೀರಾ ನಾಯರ್ ಹಾಗೂ ಉಗಾಂಡಾದ ಬರಹಗಾರ ಮಹಮೂದ್ ಮಮ್ದಾನಿ ಅವರ ಪುತ್ರ. ಈ ಗೆಲುವು ಅಮೆರಿಕದಲ್ಲಿ ವಲಸಿಗರ ವಿರುದ್ಧ ನಡೆಯುತ್ತಿರುವ ಟ್ರಂಪ್ ಶೈಲಿಯ ಕಠಿಣ ನೀತಿಗಳಿಗೆ ತೀವ್ರ ಪ್ರತಿಕ್ರಿಯೆ ಎಂದು ರಾಜಕೀಯ ವಲಯ ವಿಶ್ಲೇಷಿಸಿದೆ.

  ಮೇಯರ್ ಆಗಿ ಆಯ್ಕೆಯಾದ ಬಳಿಕ ಮಮ್ದಾನಿ ನೀಡಿದ ಮೊದಲ ಭಾಷಣದಲ್ಲಿ ಟ್ರಂಪ್‌ಗೆ ನೇರ ಸಂದೇಶ ನೀಡಿದರು. “ನೀವು ನನ್ನನ್ನು ನೋಡುತ್ತಿದ್ದೀರಿ ಎಂಬುದು ನನಗೆ ಗೊತ್ತಿದೆ. ನಿಮಗಾಗಿ ನನ್ನ ನಾಲ್ಕು ಮಾತುಗಳಿವೆ ‘ಟರ್ನ್ ದಿ ವಾಲ್ಯೂಮ್ ಅಪ್!” ಎಂದು ಘೋಷಿಸಿದರು. “ಭವಿಷ್ಯ ನಮ್ಮ ಕೈನಲ್ಲಿದೆ,” ಎಂದರು.

  ಮಮ್ದಾನಿ ತಮ್ಮ ಭಾಷಣದ ವೇಳೆ ಅಮೆರಿಕ ಅಧ್ಯಕ್ಷರಿಗೂ ಸವಾಲು ಹಾಕಿದರು. ಜನರ ಹರ್ಷೋದ್ಗಾರಗಳ ನಡುವೆ ಅವರು, “ನ್ಯೂಯಾರ್ಕ್ ನಿವಾಸಿಗಳು ಒಗ್ಗಟ್ಟಾಗಿ ನಿಂತಿದ್ದಾರೆ. ನಾವು ಬದಲಾವಣೆ ತರಲು ಬಂದಿದ್ದೇವೆ, ಭಯಪಡಿಸಲು ಅಲ್ಲ,” ಎಂದು ಘೋಷಿಸಿದರು. ಅವರ ಈ ಶೈಲಿ ಯುವ ಮತದಾರರ ಮೆಚ್ಚುಗೆಗೆ ಪಾತ್ರವಾಯಿತು.

  ಉಗಾಂಡಾದ ಕಂಪಾಲಾದಲ್ಲಿ ಜನಿಸಿದ ಮಮ್ದಾನಿ, ತಮ್ಮ ಕುಟುಂಬದೊಂದಿಗೆ ಬಾಲ್ಯದಲ್ಲೇ ಅಮೆರಿಕಗೆ ವಲಸೆ ಬಂದರು. ಅವರು 2018ರಲ್ಲಿ ಅಮೆರಿಕನ್ ಪೌರತ್ವ ಪಡೆದರು. ಅವರ ತಾಯಿ ಮೀರಾ ನಾಯರ್ ‘ಮೋನ್ಸೂನ್ ವೆಡ್ಡಿಂಗ್’ ಸೇರಿದಂತೆ ಹಲವು ಅಂತರರಾಷ್ಟ್ರೀಯ ಚಲನಚಿತ್ರಗಳ ನಿರ್ದೇಶಕಿ. ತಂದೆ ಮಹಮೂದ್ ಮಮ್ದಾನಿ ಕೊಲಂಬಿಯಾ ವಿಶ್ವವಿದ್ಯಾಲಯದ ಪ್ರೊಫೆಸರ್ ಆಗಿದ್ದಾರೆ.

  ಪ್ರಚಾರದ ಸಮಯದಲ್ಲಿ ಅಮೆರಿಕದ ಮಾಜಿ ಅಧ್ಯಕ್ಷ ಡೊನಾಲ್ಡ್ ಟ್ರಂಪ್ ಮಮ್ದಾನಿಯನ್ನು ಟೀಕಿಸಿ, ಅವರನ್ನು “ಎಡಪಂಥೀಯ ಹುಚ್ಚ” ಎಂದು ಕರೆದಿದ್ದರು. ನ್ಯೂಯಾರ್ಕ್ ಮೇಯರ್ ಚುನಾವಣೆಯಲ್ಲಿ ಮಮ್ದಾನಿ ಸೋತರೆ ಅವರನ್ನು ನಗರದಿಂದ ಹೊರಹಾಕುವುದಾಗಿ ಟ್ರಂಪ್ ಬೆದರಿಕೆ ಹಾಕಿದ್ದರು. ಆದರೆ ಮತದಾರರು ಟ್ರಂಪ್‌ ಅವರ ಹೇಳಿಕೆಗೆ ತಿರುಗೇಟು ನೀಡುತ್ತಾ ಮಮ್ದಾನಿಗೆ ಬಹುಮತ ನೀಡಿದರು.

  ಮಮ್ದಾನಿ ಈಗ ನ್ಯೂಯಾರ್ಕ್ ನಗರದ ಇತಿಹಾಸದಲ್ಲೇ ಅತಿ ಕಿರಿಯ ಮೇಯರ್ ಆಗಲಿದ್ದು, 2026ರ ಜನವರಿ 1ರಂದು ಅಧಿಕಾರ ವಹಿಸಿಕೊಳ್ಳಲಿದ್ದಾರೆ. ಅವರ ಗೆಲುವು ಅಮೆರಿಕಾದ ರಾಜಕೀಯದಲ್ಲಿ ವಲಸಿಗರ ಸಮಾನತೆ ಮತ್ತು ವೈವಿಧ್ಯತೆಗೆ ಜಯದ ಸಂಕೇತವಾಗಿದೆ ಎಂದು ವಿಶ್ವಮಾಧ್ಯಮಗಳು ವರದಿ ಮಾಡಿವೆ.