'ಚೀನಾ ನಮಗೆ ಮ್ಯಾಗ್ನೆಟ್ ನೀಡಲಿಲ್ಲವೆಂದರೆ ಪರಿಣಾಮ ನೆಟ್ಟಗಿರಲ್ಲ'- ಡೊನಾಲ್ಡ್ ಟ್ರಂಪ್ ಎಚ್ಚರಿಕೆ

•   Tue, Aug 26 2025 01:32:29 PM



• ವಾಷಿಂಗ್ಟನ್, ಆ. 26 (DaijiworldNews/AA): 'ಚೀನಾವೇನಾದರೂ ತಮಗೆ ಮ್ಯಾಗ್ನೆಟ್ ನೀಡಲಿಲ್ಲವೆಂದರೆ ಪರಿಣಾಮ ನೆಟ್ಟಗಿರಲ್ಲ. ಅಮೆರಿಕಕ್ಕೆ ಚೀನಾ ವಿರಳ ಭೂ ಅಯಸ್ಕಾಂತಗಳನ್ನು ಒದಗಿಸಬೇಕು. ಇಲ್ಲದಿದ್ದರೆ ಟ್ಯಾರಿಫ್ ಅನ್ನು ಶೇ. 200ಕ್ಕೆ ಏರಿಸುತ್ತೇವೆ' ಎಂದು ಅಮೆರಿಕ ಅಧ್ಯಕ್ಷ ಡೊನಾಲ್ಡ್ ಟ್ರಂಪ್ ಎಚ್ಚರಿಕೆ ನೀಡಿದ್ದಾರೆ.

  ದಕ್ಷಿಣ ಕೊರಿಯಾ ಅಧ್ಯಕ್ಷ ಲೀ ಜೇ ಮ್ಯೂಂಗ್ ಅವರು ವಾಷಿಂಗ್ಟನ್‌ನಲ್ಲಿ ಅಮೆರಿಕ ಅಧ್ಯಕ್ಷ ಡೊನಾಲ್ಡ್ ಟ್ರಂಪ್ ಅವರನ್ನು ಭೇಟಿಯಾಗಿದ್ದರು. ಈ ವೇಳೆ ಚೀನಾ ವಿಚಾರ ಪ್ರಸ್ತಾಪ ಮಾಡಿ ಸುದ್ದಿಗಾರರೊಂದಿಗೆ ಮಾತನಾಡಿದ ಅವರು, "ಚೀನಾ ನಮಗೆ ಮ್ಯಾಗ್ನೆಟ್ ನೀಡಬೇಕು. ಒಂದು ವೇಳೆ ನೀಡದೇ ಹೋದರೆ ಅವರಿಗೆ ಶೇ. 200 ಟ್ಯಾರಿಫ್ ಹಾಕುತ್ತೇವೆ. ಅದರಲ್ಲಿ ನಮಗೇನೂ ಸಮಸ್ಯೆ ಇಲ್ಲ" ಎಂದು ಬೆದರಿಕೆ ಹಾಕಿದ್ದಾರೆ.

  "ಚೀನಾ ಬಳಿ ಕೆಲ ಅಸ್ತ್ರಗಳಿವೆ. ನಮ್ಮ ಬಳಿ ಮಹಾ ಅಸ್ತ್ರಗಳಿವೆ. ಆದರೆ, ನಾವು ಅದನ್ನು ಪ್ರಯೋಗಿಸಲು ಇಚ್ಛಿಸುವುದಿಲ್ಲ. ಒಂದು ವೇಳೆ ನಾವು ಆ ಅಸ್ತ್ರ ಉಪಯೋಗಿಸಿದರೆ ಚೀನಾ ನಾಶವಾಗಿ ಹೋಗುತ್ತದೆ" ಎಂದು ಕಿಡಿಕಾರಿದ್ದಾರೆ.

  ವಿರಳ ಭೂ ಖನಿಜಗಳು ಇಂದು ಎಲೆಕ್ಟ್ರಿಕ್ ವಾಹನಗಳು ಇತ್ಯಾದಿ ಎಲೆಕ್ಟ್ರಾನಿಕ್ಸ್ ಮತ್ತು ಎಲೆಕ್ಟ್ರಿಕ್ ಉದ್ಯಮಕ್ಕೆ ಅಗತ್ಯವಾಗಿವೆ. ಇವುಗಳು ಬಲವಾದ ಅಯಸ್ಕಾಂತ ಗುಣ ಹೊಂದಿರುತ್ತವೆ. ಕಡಿಮೆ ಗಾತ್ರದ ವಸ್ತುವಿನಲ್ಲಿ ಹೆಚ್ಚಿನ ಮ್ಯಾಗ್ನೆಟಿಕ್ ಪವರ್ ಇರುತ್ತದೆ. ಹೀಗಾಗಿ, ಮ್ಯಾಗ್ನೆಟ್ ಗೆ ಬೇಡಿಕೆ ಹೆಚ್ಚಿದೆ. ಈ ವಿರಳ ಭೂ ಖನಿಜ ಅಥವಾ ಮ್ಯಾಗ್ನೆಟ್‌ಗಳ ತಯಾರಿಕೆಯಲ್ಲಿ ಚೀನಾ ಮುಂಚೂಣಿಯಲ್ಲಿದೆ.