ಕಿಂಗ್ಸ್‌ ಇಲೆವೆನ್ ಎದುರು ಗೆದ್ದು ಬೀಗಿದ ರಾಜಸ್ತಾನ್‌ ರಾಯಲ್ಸ್‌

•   Sun, Sep 27 2020 11:25:42 PM



• ಶಾರ್ಜಾ, ಸೆ. 27 (DaijiworldNews/MB) : ರಾಜಸ್ಥಾನ ರಾಯಲ್ಸ್ ತಂಡವು ಕಿಂಗ್ಸ್ ಇಲೆವೆನ್ ಪಂಜಾಬ್ ವಿರುದ್ಧದ ಬೃಹತ್ ಮೊತ್ತದ ಪಂದ್ಯದಲ್ಲಿ ನಾಲ್ಕು ವಿಕೆಟ್‌ಗಳಿಂದ ಗೆದ್ದು ಬೀಗಿದೆ.

  

  ಪಂದ್ಯದಲ್ಲಿ ಟಾಸ್‌ ಗೆದ್ದು ಬೌಲಿಂಗ್‌ ಆಯ್ಕೆ ಮಾಡಿ ರಾಯಲ್ಸ್ ನಾಯಕ ಸ್ಟೀವ್‌ ಸ್ಮಿತ್‌ ಎದುರಾಳಿಗೆ ಬ್ಯಾಟಿಂಗ್ ಬಿಟ್ಟುಕೊಟ್ಟಿದ್ದರು. ಟಾಸ್‌ ಸೋತು ಮೊದಲು ಬ್ಯಾಟಿಂಗ್‌ ಮಾಡಿದ ಕಿಂಗ್ಸ್ ಇಲೆವೆನ್ ಪಂಜಾಬ್ ಪಡೆ ಉತ್ತಮ ಬ್ಯಾಟಿಂಗ್‌ ಮಾಡಿ ನಿಗದಿತ 20 ಓವರ್‌ಗಳಲ್ಲಿ 2 ವಿಕೆಟ್‌ ನಷ್ಟಕ್ಕೆ 223 ರನ್ ಗಳಿಸಿ ರಾಯಲ್ಸ್‌ಗೆ 224 ರನ್‌ ಗುರಿ ನೀಡಿತ್ತು.

  ಈ ಗುರಿಯನ್ನು ಬೆನ್ನತ್ತಿದ ರಾಜಸ್ಥಾನ ರಾಯಲ್ಸ್ ತಂಡವು 19.3 ಓವರ್ ಗಳಲ್ಲಿ 4 ವಿಕೆಟ್ ನಷ್ಟದಲ್ಲಿ ಜಯ ಪಡೆದಿದೆ.

  ರಾಜಸ್ಥಾನದ ಪರ ಸ್ಟೀವನ್ ಸ್ಮಿತ್ 27 ಎಸೆತಗಳಲ್ಲಿ 50, ಸಂಜು ಸ್ಯಾಮ್ಸನ್ 42 ಎಸೆತಗಳಲ್ಲಿ 85 ಹಾಗೂ ರಾಹುಲ್ ತಿವಾಟಿಯ 31 ಎಸೆತಗಳಲ್ಲಿ 53 ರನ್ ಬಾರಿಸಿದರು. ಪಂಜಾಬ್‌ ಪರ ಶಮಿ ಮೂರು ವಿಕೆಟ್‌ ಪಡೆದರು.

  ಮೊದಲು ಬ್ಯಾಟಿಂಗ್‌ ಮಾಡಿದ ಪಂಜಾಬ್‌ ತಂಡದಲ್ಲಿ ಕನ್ನಡಿಗರಾದ ಮಯಾಂಕ್‌ ಅಗರವಾಲ್‌ ಮತ್ತು ಕೆ ಎಲ್‌ ರಾಹುಲ್‌ ರಾಜಸ್ತಾನ್‌ ರಾಯಲ್ಸ್‌ನ ಬಾಲರ್‌ಗಳ ಚೆಂಡಿನ ಎಸೆತವನ್ನು ಎದುರಿಸಿ ಭರ್ಜರಿ ಬ್ಯಾಟಿಂಗ್‌ ಮಾಡಿದ್ದರು. ಇವರಿಬ್ಬರ ಬ್ಯಾಟಿಂಗ್‌ನಿಂದ ಪಂಜಾಬ್‌ ನಿಗದಿತ 20 ಓವರ್‌ಗಳಲ್ಲಿ 2 ವಿಕೆಟ್‌ ನಷ್ಟಕ್ಕೆ 223 ರನ್ ಗಳಿಸಿತ್ತು. ರಾಯಲ್ಸ್‌ಗೆ 224 ರನ್‌ನ ಸವಾಲು ನೀಡಿದ್ದರು.

  ಮಯಾಂಕ್‌ 56 ಎಸೆತಗಳನ್ನು ಎದುರಿಸಿ 10 ಬೌಂಡರಿ ಮತ್ತು 7 ಸಿಕ್ಸರ್‌ ಸಹಿತ 106 ರನ್‌ ಗಳಿಸಿ ಔಟಾದರೆ, ನಾಯಕ ರಾಹುಲ್‌ 54 ಎಸೆತಗಳಿಂದ 7 ಬೌಂಡರಿ ಮತ್ತು 1 ಸಿಕ್ಸರ್‌ ಸಹಿತ 69 ರನ್‌ ಬಾರಿಸಿದರು. ಈ ಜೋಡಿ ಮೊದಲ ವಿಕೆಟ್‌ಗೆ 183 ರನ್‌ ಗಳಿಸಿತ್ತು. ಕೊನೆಯಲ್ಲಿ ಆಟವಾಡಿದ ನಿಕೋಲಸ್‌ ಪೂರನ್‌ ಕೇವಲ 8 ಎಸೆತಗಳಲ್ಲಿ 25 ರನ್‌ ಬಾರಿಸಿದರು. ಅವರಿಗೆ ಗ್ಲೇನ್‌ ಮ್ಯಾಕ್ಸ್‌ವೆಲ್ (13) ಉತ್ತಮ ಬೆಂಬಲ ನೀಡಿದ್ದರು.

  ಪಂಜಾಬ್‌ ತಂಡದ ಪರ ಅಂಕಿತ್‌ ರಜಪೂತ್‌ (9.80) ಹೊರತುಪಡಿಸಿ ಉಳಿದೆಲ್ಲ ಬೌಲರ್‌ಗಳೂ 10ಕ್ಕಿಂತ ಹೆಚ್ಚಿನ ಸರಾಸರಿಯಲ್ಲಿ ರನ್‌ ಬಿಟ್ಟುಕೊಟ್ಟಿದ್ದಾರೆ. ಟಾಮ್‌ ಕರನ್‌ ಮತ್ತು ಅಂಕಿತ್‌ ರಜಪೂತ್‌ ತಲಾ ಒಂದೊಂದು ವಿಕೆಟ್‌ ಪಡೆದಿದ್ದರು.