ಶಾಂತಿ ಮಾತುಕತೆಯ ವಿಚಾರ ಪಾಕಿಸ್ತಾನ ತೆಗೆದುಕೊಳ್ಳುವ ಕ್ರಮದ ಮೇಲೆ ನಿಂತಿದೆ - ಅಮೆರಿಕಾ

•   Fri, Oct 25 2019 02:55:05 PM



• ವಾಷಿಂಗ್ಟನ್, ಅ.25(Daijiworld News/SS): ಭಯೋತ್ಪಾದಕ ಸಂಘಟನೆಗಳ ವಿರುದ್ಧ ಪಾಕಿಸ್ತಾನ ಸ್ಥಿರ ಮತ್ತು ಕಠಿಣ ಕ್ರಮ ತೆಗೆದುಕೊಂಡರೆ ಮಾತ್ರ ಭಾರತ ಮಾತುಕತೆಗೆ ಸಿದ್ಧವಿದೆ. ಹೀಗಾಗಿ ಶಾಂತಿ ಮಾತುಕತೆಯ ವಿಚಾರ ಪಾಕಿಸ್ತಾನ ತೆಗೆದುಕೊಳ್ಳುವ ಕ್ರಮದ ಮೇಲೆ ನಿಂತಿದೆ ಎಂದು ಅಮೆರಿಕಾ ಹೇಳಿದೆ.

  

  ಭಾರತ ಮತ್ತು ಪಾಕಿಸ್ತಾನ ಎರಡೂ ರಾಷ್ಟ್ರಗಳು ಒಪ್ಪಿದರೆ ಮಾತ್ರ ಕಾಶ್ಮೀರ ವಿವಾದ ವಿಚಾರವಾಗಿ ಮಾತುಕತೆ ನಡೆಸಲು ಅಮೆರಿಕಾ ಅಧ್ಯಕ್ಷ ಡೊನಾಲ್ಡ್ ಟ್ರಂಪ್ ಸಿದ್ದರಿದ್ದಾರೆ ಎಂದು ಸರ್ಕಾರದ ಹಿರಿಯ ಆಡಳಿತಾಧಿಕಾರಿಯೊಬ್ಬರು ಪುನರುಚ್ಛರಿಸಿದ್ದಾರೆ.

  ಕಾಶ್ಮೀರ ವಿಚಾರವಾಗಿ ಪಾಕಿಸ್ತಾನ ಮತ್ತು ಭಾರತದ ಮಧ್ಯೆ ಇರುವ ಆತಂಕ ಮತ್ತು ಉದ್ವಿಗ್ನತೆ ಬಗ್ಗೆ ಅಧ್ಯಕ್ಷ ಟ್ರಂಪ್ ಅವರಿಗೆ ಕಳವಳವಿದೆ. ಈ ಕುರಿತು ಕಳೆದ ತಿಂಗಳು ಉಭಯ ದೇಶಗಳ ಪ್ರಧಾನಿ ಜೊತೆ ಮಾತನಾಡುವಾಗ ನೇರವಾಗಿ ಹೇಳಿದ್ದಾರೆ ಎಂದು ತಿಳಿಸಿದರು.

  ಡೊನಾಲ್ಡ್ ಟ್ರಂಪ್ ಅವರು ಮಧ್ಯೆ ಪ್ರವೇಶಿಸಲು ಸಿದ್ದರಿದ್ದಾರೆ. ಆದರೆ ಎರಡು ದೇಶಗಳು ಒಪ್ಪಿದರೆ ಮಾತ್ರ. ಹೊರಗಿನವರ ಮಧ್ಯಪ್ರವೇಶದ ಸಹಕಾರ ಕೋರುವುದು ಬೇಡ ಎನ್ನುವುದು ಭಾರತದ ಅಭಿಪ್ರಾಯವಾಗಿದೆ ಎಂದು ಹೇಳಿದರು.

  ಕರ್ತಾರ್ ಪುರ್ ಕಾರಿಡಾರ್ ನಿರ್ಮಾಣಕ್ಕೆ ನಿಲುವಳಿ ಒಪ್ಪಂದ ಎರಡೂ ದೇಶಗಳ ಮಧ್ಯೆ ವಿಶ್ವಾಸಾರ್ಹತೆ ಬೆಳೆಸುವ ಕ್ರಮವಾಗಿದ್ದು ಇದರಿಂದ ಜನರ ಮಧ್ಯೆ ಸಂಪರ್ಕ ಹೆಚ್ಚಾಗಲಿದೆ. ಇದು ಒಂದು ಸಣ್ಣ ಹೆಜ್ಜೆಯಾಗಿದ್ದರೂ, ರಚನಾತ್ಮಕ, ಸದ್ಭಾವನೆ ಮತ್ತು ಉತ್ತಮ ವಾತಾವರಣವನ್ನು ಸೃಷ್ಟಿಸಲು ನಮಗೆ ಈ ರೀತಿಯ ಕ್ರಮ ಇನ್ನಷ್ಟು ಅಗತ್ಯವಿದೆ ಎಂದು ಹೇಳಿದರು.