ಹಾಲಿವುಡ್ ಅಂಗಳದಲ್ಲಿ ಕೋಸ್ಟಲ್ ವುಡ್ ನ 'ಗಿರಿಗಿಟ್'

•   Mon, Oct 07 2019 03:42:22 PM



• ಮಂಗಳೂರು, ಅ 7 (Daijiworld News/RD): ಕೋಸ್ಟಲ್ ವುಡ್ ನಲ್ಲಿ ಭರ್ಜರಿ ಪ್ರದರ್ಶನ ಕಾಣುವ ಮೂಲಕ ಹೊಸ ಅಲೆಯನ್ನು ಸೃಷ್ಠಿಸಿದ ಗಿರಿಗಿಟ್ ಚಿತ್ರವು ಹಾಲಿವುಡ್ ಅಂಗಳ ಪ್ರವೇಶಿಸಿದ್ದು, ಅಮೇರಿಕಾದಲ್ಲಿ ಈ ಚಿತ್ರ ಪ್ರದರ್ಶನಗೊಳ್ಳಲಿದೆ.

  

  ಕೋಸ್ಟಲ್ ವುಡ್ ನ ಸ್ಟಾರ್ ನಟ ರೂಪೇಶ್‌ ಶೆಟ್ಟಿ ಅವರ ನಿರ್ದೇಶನದ ಗಿರಿಗಿಟ್‌ ಚಿತ್ರವು, ಇದೇ ಬರುವ ಅಕ್ಟೋಬರ್ 12 ಮತ್ತು 13 ರಂದು ಅಮೇರಿಕಾದ ಸಾನ್ ಜೊಸೆ ಹಾಗೂ ಲಾಸ್ ಏಂಜೆಲ್ಸ್ ನಲ್ಲಿ ಬಿಡುಗಡೆಯಾಗಲಿದೆ. ಈಗಾಗಲೇ ಗಿರಿಗಿಟ್ ಸಿನಿಮಾವು ಚಿತ್ರಮಂದಿರಗಳಲ್ಲಿ ಯಶಸ್ವಿಯಾಗಿ ಪ್ರದರ್ಶನ ಕಾಣುತ್ತಿದ್ದು, ತುಳು ಚಿತ್ರ ಮಾರುಕಟ್ಟೆಯನ್ನು ವಿಶ್ವದೆಲ್ಲೆಡೆ ವಿಸ್ತರಿಸುತ್ತಿದೆ.

  ಚಿತ್ರದ ಟೀಸರ್ ಅನ್ನು ಅಮೇರಿಕಾದಲ್ಲಿ ಬಿಡುಗಡೆಗೊಳಿಸಿದ ಚಿತ್ರತಂಡ. ಕರಾವಳಿ ಸೇರಿದಂತೆ ಬೆಂಗಳೂರಿನಲ್ಲಿಯೂ ಚಿತ್ರ ಬಿಡುಗಡೆಗೊಂಡಿದ್ದು, ಸಿನಿ ಪ್ರಿಯರಿಗೆ ನಗುವಿನ ಬಾಡೂಟ ನೀಡಿತ್ತು. ಈಗಾಗಲೇ ಚಿತ್ರವು  ದುಬೈ, ಬಹ್ರೇನ್, ಕುವೈಟ್ ದೇಶಗಳಲ್ಲಿ ತೆರೆಕಾಣುವ ಮೂಲಕ ಯಶಸ್ವಿಯಾಗಿ ಪ್ರದರ್ಶನಗೊಂಡಿದ್ದು, ಜೊತೆಗೆ ಭರ್ಜರಿ ಕಲೆಕ್ಷನ್ ಮಾಡುವ ಮೂಲಕ ದಾಖಲೆಯನ್ನು ನಿರ್ಮಿಸಿ ಹೆಗ್ಗಳಿಕೆಗೆ ಗಿರಿಗಿಟ್ ಚಿತ್ರ ಪಾತ್ರವಾಗಿದೆ.