ವಿಶ್ವಕಪ್: ರೋಹಿತ್ ದಾಖಲೆಯ 4ನೇ ಶತಕ-ಬಾಂಗ್ಲಾಕ್ಕೆ 315 ರನ್​ಗಳ ಟಾರ್ಗೆಟ್

•   Tue, Jul 02 2019 07:16:08 PM



• ಬರ್ಮಿಂಗ್​ಹ್ಯಾಮ್, ಜು 02 (Daijiworld News/SM): ಟೀಂ ಇಂಡಿಯಾದ ಆರಂಭಿಕ ಆಟಗಾರ, ಉಪ ನಾಯಕ ರೋಹಿತ್​ ಶರ್ಮಾ ಮತ್ತೊಮ್ಮೆ ಅಬ್ಬರಿಸಿದ್ದಾರೆ. ಅಮೋಘ ಶತಕ ಸಿಡಿಸಿ ರೋಹಿತ್ ಮಿಂಚಿದ್ದು, ಟೀಂ ಇಂಡಿಯಾ 314 ರನ್ ಗಳನ್ನು ಪೇರಿಸಿದೆ.

  

  ಇನ್ನು ರೋಹಿತ್ ಗೆ ಕೆ.ಎಲ್​.ರಾಹುಲ್​ ಸಾಥ್ ನೀಡಿದ್ದು,​ ಅರ್ಧಶತಕ ಸಿಡಿಸಿ ಮಿಂಚಿದ್ದಾರೆ. ಆರಂಭಿಕ ಉತ್ತಮ ಪ್ರದರ್ಶನದಿಂದ ಟೀಂ ಇಂಡಿಯಾ ಸುಸ್ಥಿಗೆ ತಲುಪಲು ಸಾಧ್ಯವಾಗಿದೆ. ಬಾಂಗ್ಲಾದೇಶಕ್ಕೆ ಗೆಲ್ಲಲು 315 ರನ್​ಗಳ ಟಾರ್ಗೆಟ್​ ನೀಡಿದೆ.

  ಟಾಸ್​ ಗೆದ್ದು ಮೊದಲು ಬ್ಯಾಟಿಂಗ್​ ಮಾಡಿದ ಟೀಂ ಇಂಡಿಯಾ ಆರಂಭಿಕರಾದ ರೋಹಿತ್​ ಶರ್ಮಾ ಹಾಗೂ ಕೆ.ಎಲ್. ರಾಹುಲ್ ​ಅವರ ಭರ್ಜರಿ ಪ್ರದರ್ಶನದಿಂದ ಮೊದಲ ವಿಕೆಟ್​ಗೆ 180 ರನ್​ ಸೇರಿಸಿದರು. ಈ ಜೋಡಿ ಬಾಂಗ್ಲಾ ಬೌಲಿಂಗ್​ನ್ನು ಸಮರ್ಥವಾಗಿ ಎದುರಿಸಿತು.

  ಈ ಮಧ್ಯೆ ರೋಹಿತ್​ ಶರ್ಮಾ ಈ ವಿಶ್ವಕಪ್​ನಲ್ಲಿ ದಾಖಲೆಯ 4ನೇ ಶತಕ ಸಿಡಿ ಮಿಂಚಿದರು. 92 ಎಸೆತಗಳನ್ನು ಎದುರಿಸಿದ ರೋಹಿತ್ 104 ರನ್​ ಬಾರಿಸಿದರು. ಸೌಮ್ಯ ಸರ್ಕಾರ್​ ಬೌಲಿಂಗ್​ನಲ್ಲಿ ವಿಕೆಟ್​ ಒಪ್ಪಿಸಿ ಫೆವೀಲಿಯನ್ ಸೇರಿದರು.

  ಇನ್ನು ಮತ್ತೊಂದೆಡೆ ಸಮಯೋಚಿತ ಬ್ಯಾಟಿಂಗ್​ ನಡೆಸಿದ ರಾಹುಲ್​ 77 ರನ್​ ಗಳಿಸಿ ಶತಕದ ಹಾದಿಯಲ್ಲಿ ಎಡವಿದರು. ಇನ್ನುಳಿದಂತೆ ನಾಯಕ ವಿರಾಟ್​ ಕೊಹ್ಲಿ 26 ಹಾಗೂ ರಿಷಭ್​ ಪಂತ್​ 48 ರನ್​ ಗಳಿಸಿ ತಂಡದ ಮೊತ್ತಕ್ಕೆ ಕೊಡುಗೆ ನೀಡಿದರು.