ಪ್ಯಾರಾ ಮಿಲಿಟರಿ ಕ್ಯಾಂಟೀನ್‌‌‌ಗಳಲ್ಲಿ ಮಾರಾಟ ಮಾಡುವ 1,026 ವಿದೇಶಿ ಉತ್ಪನ್ನಗಳು ನಿಷೇಧ - ಆದೇಶ ವಾಪಾಸ್‌‌

•   Mon, Jun 01 2020 07:05:02 PM



• ನವದೆಹಲಿ, ಜೂ 01 (DaijiworldNews/PY) : ದೇಶಾದ್ಯಂತ ಪ್ಯಾರಾ ಮಿಲಿಟರಿ ಕ್ಯಾಂಟೀನ್‌‌‌ಗಳಲ್ಲಿ ಮಾರಾಟ ಮಾಡುವ ವಸ್ತುಗಳ ಪಟ್ಟಿಯಿಂದ 1,026 ವಿದೇಶಿ ಉತ್ಪನ್ನಗಳನ್ನು ತೆಗೆದು ಹಾಕುವ ಆದೇಶ ಹೊರ ಬಂದ ತಕ್ಷಣ ಕೇಂದ್ರ ಸರ್ಕಾರ ಆದೇಶ ಹಿಂಪಡೆದಿದ್ದು, ಪರಿಷ್ಕೃತ ಆದೇಶವನ್ನು ಶೀಘ್ರದಲ್ಲಿಯೇ ಹೊರಡಿಸುವುದಾಗಿ ಹೇಳಿದೆ.

  

  ಸೋಮವಾರ ಮಧ್ಯಾಹ್ನ ಹೊರಡಿಸಲಾದ ಆದೇಶದ ಪ್ರಕಾರ, ಇಂದಿನಿಂದ ಸಿಎಪಿಎಫ್‌ ಕ್ಯಾಂಟೀನ್‌ಗಳಲ್ಲಿ ಚಾಕೊಲೆಟ್‌, ಎಲೆಕ್ಟ್ರಾನಿಕ್‌ ಸಾಧನಗಳು, ಬ್ರ್ಯಾಂಡೆಡ್‌ ಚಪ್ಪಲಿ ಹಾಗೂ ಶೂಗಳು, ಮೈಕ್ರೊ ಓವನ್‌ಗಳು, ಪೊಲರಾಯ್ಡ್‌ ಕ್ಯಾಮೆರಾ ಸೇರಿದಂತೆ ಆಮದು ಮಾಡಿಕೊಳ್ಳುವ 1,000ಕ್ಕೂ ಹೆಚ್ಚು ವಸ್ತುಗಳು ಲಭ್ಯವಿರುವುದಿಲ್ಲ. ಜೂನ್‌ 1ರಿಂದ ಕ್ಯಾಂಟೀನ್‌ಗಳಲ್ಲಿ ಸ್ವದೇಶಿ ವಸ್ತುಗಳನ್ನು ಮಾತ್ರ ಮಾರಾಟ ಮಾಡಲು ಅವಕಾಶವಿದೆ.

  ಪೂರ್ಣ ಭಾರತದಲ್ಲಿಯೇ ಸಿದ್ಧಗೊಂಡಿರುವ ವಸ್ತುಗಳು, ಕಚ್ಚಾ ವಸ್ತುಗಳನ್ನು ಆಮದು ಮಾಡಿಕೊಂಡು, ಇಲ್ಲಿ ವಸ್ತುಗಳನ್ನು ಸಿದ್ಧಪಡಿಸುವುದು ಹಾಗೂ ಪೂರ್ಣ ಆಮದು ಮಾಡಿಕೊಳ್ಳುವ ವಸ್ತುಗಳು, ಹೀಗೆ ಪ್ಯಾರಾ ಮಿಲಿಟರಿ ಕ್ಯಾಂಟೀನ್‌ಗಳು ಮಾರಾಟ ಮಾಡುವ ವಸ್ತುಗಳನ್ನು ಮೂರು ರೀತಿ ವರ್ಗೀಕರಿಸಿಕೊಳ್ಳಲಾಗಿದೆ. ಪೂರ್ಣ ಆಮದು ಮಾಡಿಕೊಳ್ಳಲಾಗುವ ವಸ್ತುಗಳ ಮಾರಾಟಕ್ಕೆ ನಿರ್ಬಂಧ ವಿಧಿಸಲಾಗಿದೆ.

  ಹಿಂದಿನ ಆದೇಶದಲ್ಲಿ ಸ್ಕೆಚರ್ಸ್‌, ಫೆರಾರೊ ಇಂಡಿಯಾ, ರೆಡ್‌ಬುಲ್‌ ಇಂಡಿಯಾ, ವಿಕ್ಟೋರಿನಾಕ್ಸ್‌, ಸಫಿಲೊ ಕಂಪನಿಗಳ ವಸ್ತುಗಳನ್ನು ಮಾರಾಟ ಮಾಡದಂತೆ ಸೂಚಿಸಲಾಗಿತ್ತು ಎಂದು ಸುದ್ದಿಸಂಸ್ಥೆಯೊಂದು ವರದಿ ಮಾಡಿತ್ತು.

  ಹೊಸ ಆದೇಶದಲ್ಲಿ ಮಾರಾಟದಿಂದ ಕೈಬಿಡಲಾಗಿರುವ ವಿದೇಶಿ ವಸ್ತುಗಳ ಪರಿಷ್ಕೃತ ಪಟ್ಟಿ ಇರಲಿದ್ದು, ದೇಶದಾದ್ಯಂತ ಸಿಎಪಿಎಫ್‌ ಕ್ಯಾಂಟೀನ್‌ಗಳಲ್ಲಿ ಸ್ವದೇಶಿ ವಸ್ತುಗಳು ಮಾತ್ರವೇ ಮಾರಾಟಗೊಳ್ಳಲಿವೆ ಎಂದು ಕೇಂದ್ರ ಗೃಹ ಸಚಿವ ಅಮಿತ್‌ ಶಾ ಘೋಷಿಸಿದ್ದರು. ಭಾರತದಲ್ಲಿ ಜೂನ್‌ನಿಂದ ತಯಾರಿಸಲಾಗಿರುವ ವಸ್ತುಗಳನ್ನಷ್ಟೇ ಮಾರಾಟ ಮಾಡಲಾಗುತ್ತದೆ ಎಂದು ಗೃಹ ಸಚಿವಾಲಯ ತಿಳಿಸಲಾಗಿತ್ತು.

  ಮಾರಾಟದಿಂದ ವಾರ್ಷಿಕ ಸುಮಾರು ₹2,800 ಕೋಟಿ ವಹಿವಾಟು ಪ್ಯಾರಾ ಮಿಲಿಟರಿ ಕ್ಯಾಂಟೀನ್‌ಗಳಲ್ಲಿ ನಡೆಯುತ್ತದೆ. ಸಿಆರ್‌ಪಿಎಫ್‌, ಬಿಎಸ್‌ಎಫ್‌, ಐಟಿಬಿಪಿ, ಸಿಐಎಸ್‌ಎಫ್‌, ಎಸ್‌ಎಸ್‌ಬಿ, ಎನ್‌ಎಸ್‌ಜಿ ಹಾಗೂ ಅಸ್ಸಾಂ ರೈಫಲ್ಸ್‌ನಲ್ಲಿ ಸೇವೆ ಸಲ್ಲಿಸುತ್ತಿರುವ 10 ಲಕ್ಷ ಭದ್ರತಾ ಸಿಬ್ಬಂದಿಗಳ ಸುಮಾರು 50 ಲಕ್ಷ ಕುಟುಂಬ ಸದಸ್ಯರಿಗೆ ಕ್ಯಾಂಟೀನ್‌ ಸೌಲಭ್ಯವಿದೆ.